Мәрвайит һапиз ханим "конкордийә мунбири" йиғинида уйғурларниң нөвәттики еғир әһвалини тонуштурған

Ихтиярий мухбиримиз әркин тарим
2021-09-13
Share
Мәрвайит һапиз ханим Явропадики уйғур рәссам мәрвайит һапиз ханим португалийә пайтәхти лисбон шәһиридә өткүзүлгән "конкордийә мунбири йиғини" ға тәклип бойичә қатнашқан. 2021-Йили 9-сентәбир. Лисбон, португалийә.
Social Media

Явропадики уйғур рәссам мәрвайит һапиз ханим портигалийә пайтәхти лисбон шәһиридә өткүзүлгән "конкордийә мунбири йиғини" ға тәклип бойичә қатнашқан. 9-Айниң 9-күнидин 12-күнигичә өткүзүлгән мәзкур йиғинға америка, канада вә явропа дөләтлиридә туруватқан һәр саһәдә муваппәқийәтлик болған мусулманлар тәклип қилинған болуп, уйғурларға вакалитән өз кәспидә көзгә көрүнгән рәссам мәрвайит һапиз ханим тәклип бойичә қатнашқан. Униң билдүрүшичә, йиғинда уйғурларниң һазирқи еғир вәзийити тоғрисидиму музакирә елип берилған.

Merwayit-Hapiz-The-Concordia-Forum -20210-02.jpg

Бу һәқтә зияритимизни қобул қилған мәрвайит һапиз ханим мундақ деди: "мән портигалийәниң лисбон шәһридин һәммиңләрға салам йоллаймән. Лисбон шәһридики 1400-йили селинған әң чоң черкавни мәркәз қилған тарихий залда ‹конкордийә мунбири' намида йиғин өткүзүлди. Бу мунбәр 2009-йили қурулған икән. Бу йәр шари характерлиқ бир қурулуш болуп, бу йиғинға һәр саһәдә мувәппәқийәт қазанған мусулманлар сәрхилар, ‹қандақ қилғанда мусулманлар дунясини әң яхши шәкилдә тәрәққий қилдуралаймиз?' дегән темини асас қилған һалда мусулман дунясидики мәвҗут мәсилиләр тоғрисида музакирә елип баридикән."

Мәрвайит һапиз ханим бу қетимқи йиғинға һәр саһә вә һәр кәспләрдә мувәппәқийәт қазанған90 нәпәр мусулман сәрхилниң қатнашқанлиқини, уйғурларға вакалитән өзиниң иштирак қилғанлиқини баян қилип, мундақ деди: "бу 13-қетимлиқ йиғин икән. Бу қетимлиқ йиғинға дуняниң һәр қайси җайлирида яшаватқан 90 нәпәрдәк сәрхил тәклип қилинипту. Буларниң ичидә бәшимиз сәнәткар икәнмиз. Мән бу йиғинға сәнәткарлиқ салаһийитим билән тәклип қилиндим. Һәр саһәдин кишиләр бар икән. Мәсилән, сиясәтчиләр, карханичилар, иқтисадшунаслар вә язғучилар бар икән. Қисқиси, һәр қайси саһәләрдә җәмийәткә өзини қобул қилдурған, қабилийәтлик, иқтисаслиқ кишиләр бар икән. Бу мунбәрдә нуқтилиқ һалда мусулманларниң мәсилилири музакирә қилинип, буларни һәл қилишниң йоллири муһакимә қилинидикән. Булар уйғурларға ярдәм қилишни халайдикән, әмма уйғур мәсилисини яхши чүшәнмәйдикән. Шуңа мән бу мунбәрдә уйғурларниң һазирқи еғир вәзийитиниң, болупму җаза лагерлири мәсилисиниң тонуштурулушини наһайити муһим дәп ойлидим."

1996-Йилидин тартип германийәдә яшаватқан, һәр қайси дөләтләрдә көп қетим рәсим көргәзмиси ачқан рәссам мәрвайит һапир бу қетим португалийәдики йиғинда уйғурларниң нөвәттики еғир вәзийити билән өзиниң вәтәндики аилиси дуч кәлгән паҗиәләрни аңлатқан. У өзиниң қумулда оқутқучилиқ қиливатқан иниси батур һапиз билән униң аяли гүлсүмай батурниң 2018-йилиниң ахири тутқун қилинғанлиқи, инисиниң 15 йиллиқ, униң аялиниң 7 йиллиқ кесилип кәткәнликини баян қилған. Мәрвайит һапиз ханим бу һәқтә бизгә тәпсилий мәлумат бәрди.

"конкордийә мунбири" гә америка қошма шитатлиридин келип қатнашқан түрк аял рәссам фаһрийә ханим зияритимизни қобул қилип, бу йиғинда уйғурларниң һазирқи еғир вәзийити тоғрисида музакирә елип берилғанлиқини баян қилди: "биз бу йиғинда уйғур түрклиригә қандақ ярдәм қилалайдиғанлиқимиз һәққидә баш қатурдуқ. Уйғурларниң һазирқи әһвалидин бәк әнсиридуқ. Көңлимиз бәк йерим болуватиду. Уйғурлар муһим бир милләт. Шуңа бу йиғинда уйғурларни хитайниң һазирқи еғир бесим сияситидин қутулдуруш үчүн қолимиздин немиләр келиду, немиләрни қилалишимиз мумкин, дегән мәсилиләр бойичә музакирә елип бардуқ. Мәрвайит ханим бу йиғинда уйғурларниң һазирқи еғир вәзийити тоғрисида мәлумат бәрди. Мәнчә, бу наһайити пайдилиқ бир йиғин болди."

"конкордийә мунбири" йиғиниға 2019-йили уйғур һәрикити тәшкилатиниң рәиси рушән аббас қатнашқан икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт