Үрүмчи сақчи архиплирида өзини өлтүрүвалғанлиқи хатириләнгән мәрйәм исмаилниң дадиси түрмидә җан үзгән

Өткән йили ашкариланған үрүмчи сақчи архиплирида шинҗаң университети оқуғучиси мәрйәм исмаилниң, 2017-йили дадиси тутқун қилинғанлиқи вә аниси еғир паракәндичиликкә учриғанлиқи үчүн өзини өлтүрүвалғанлиқи қәйт қилинғаниди. Архиптики бу учур үстидә елип барған ениқлашлиримиз давамида, мәрйәм исмаилниң дадиси исмаил миҗитниң 9 йиллиқ кесилип түрмидә җан үзгәнлики ашкариланди.

Үрүмчи сақчи архиплирида хатирилинишичә, шинҗаң университети қанун институтиниң 2013-йиллиқ оқуғучиси мәрйәм исмаил, 2017-йили 19-декабир күни оқуғучилар ятиқида есилип өлүвалған. Архипта йәнә хатирилинишичә, униң өлүмигә шу йили дадисиниң тутқун қилинғанлиқи вә аписиниң сақчилар тәрипидин изчил сораққа тартилип аваричиликкә учриши сәвәб болған.

Биз архиптики бу учурларниң тоғрилиқини дәлилләш вә мәрйәм исмаилниң ата-анисиниң нөвәттики әһвалини ениқлаш үчүн, шинҗаң университетиға телефон қилдуқ.

Телефонимизни қобул қилған қанун институти ишхана хадими шәхсий учурларни ашкарилашқа болмайдиғанлиқини баһанә қилип, соаллиримизға җаваб беришни рәт қилди.

Мәзкур архиптин мәлум болушичә, мәрйәм исмаил һәққидики учурлар шинҗаң университетиниң ваңвей вә өмәрҗан мамут исимлик икки нәпәр сақчи хадими тәрипидин хатириләнгән вә алақидар органға йолланған. Университет сақчихана хадими, мәрйәм исмаилниң өлүвелиш вәқәсиниң бәш йил бурунқи иш икәнлики, униң үстигә сәзгүр бир вәқә икәнлики вә дөләт мәхпийәтликигә ятидиғанлиқини билдүрүп, бу һәқтә мәмтимин исимлик бир сақчи билән алақилишишимизни тәвсийә қилди. Йәнә бир сақчи хадимиму, мәрйәм исмаил вә аилисиниң әһвалини қисқа вақит ичидә дәп берип болалмайдиғанлиқини баян қилди һәм бу һәқтә тәңритағ районлуқ сақчи идарисидин әһвал игилишимизни тәвсийә қилди. Әмма уму мәзкур архиптики мәрйәм исмаил вә ата-аниси һәққидики учурларниң тоғрилиқини инкар қилмиди.

Мәзкур архипта йәнә хатирилинишичә, сақчи өмәрҗан мамут, мәрйәм исмаилниң өлүмидин кейин, униң ятақ бинаси әтрапини изчил назарәт қилған вә шу күнләрдә шинҗаң университетида шу өлүм вәқәсидин башқа һечқандақ ғәйринормал әһвал байқалмиғанлиқини хатирә қалдурған. Телефонимизни қобул қилған өмәрҗан исимлик сақчи, бу учурларни ашкарилимаслиқ һәққидә алаһидә уқтуруш барлиқини әскәртип, соалимизға җаваб беришни рәт қилди.

Телефон зиярәтлиримиз давамида, өз ашкарилашни халимиған бир сақчи хадими, мәрйәм исмаилниң тәтилдики мәзгилидә дадисиниң қол телефонини ишләткәнлики вә телефонда бир қисим “қанунсиз учурлар” ни көргәнлики, бу сәвәблик дадисиниң сораққа елинғанлиқи вә қизиниң бихәтәрликини көздә тутуп сорақ җәрянида мәсулийәтни өз үстигә алғанлиқи һәм телефонини қизи ишләткәнликини йошурғанлиқи шуниңдәк бу сәвәбтин “дөләт бихәтәрликигә тәһдит йәткүзүш җинайити” билән әйиблинип 9 йиллиқ кесиветилгәнликини ашкарилиди.

Архипта, мәрйәм исмаилниң әсли нопуси шаяр наһийә, гүлбағ йеза ақериқ кәнтигә тәвә икәнлики йезилған. Гүлбағ йезилиқ әдлийә понкити хадими, мәрйәм исмаилниң мәһәллидә маригүл исмаил дәп атилидиғанлиқи, униң дадисиниң буниңдин бирқанчә ай аввал җан үзгәнликини ашкарилиди. Бу хадимниң баянлиридин мәлум болушичә, мәрйәмгүл дадиси тутқун қилиништин аввал йезилиқ хәлқ қурултийи вәкили, аписи болса, пенсийәгә чиққан кәнт секретари икән. Гүлбағ йезилиқ сақчиханисидики бир хадим, исмаил миҗитниң телефонидин “чатақ” чиқип 9 йиллиқ кесилгәнликини дәлиллисә, йәнә бир хадим, униң түрмидә җан үзгәнликини дәлиллиди.

Архипта хатирилинишичә, мәрйәмгүлниң аниси өзи учраватқан аваричиликини униңға көз йеши қилған һалда давамлиқ мәлум қилип турған вә бу әһвал мәрйәм исмаилға қаттиқ тәсир қилғаникән.

Телефонимизни қобул қилған гүлбағ йеза ақериқ сақчи хадими, шу йилларда өзиниң мәрйәм исмаилниң аниси билән бирликтә 5 нуқтилиқ шәхскә мәсул болғанлиқи, уларни һәр вақит ишханисиға чақиртип кәйпиятини дәңсәйдиғанлиқи вә әтрапидикиләр билән болған бериш-келишиниму назарәт қилидиғанлиқини дәлиллиди.