Xoten we qeshqerde köp sandiki meschit munarlirining chéqiwétilgenliki delillendi

Muxbirimiz shöhret hoshur
2019-06-17
Élxet
Pikir
Share
Print
Uyghur diyaridiki munarliri bilen hilal ayliri chéqiwétilgen bir meschitning esli we hazirqi haliti.
Uyghur diyaridiki munarliri bilen hilal ayliri chéqiwétilgen bir meschitning esli we hazirqi haliti.
Social Media

Muxbirimizning Uyghur rayonigha qarita élip barghan téléfon ziyaretliridin ashkarilinishiche, xoten we qeshqerlerde ötken yili yuqiridin kelgen bir uqturushqa asasen meschitlerning munarliri bilen hilal ayliri "Diniy esebiylikning alamiti" dep qarilip, yéqinqi 2-3 ay ichide asasen dégüdek chéqiwétilgen. Xotendiki bir kent sékrétari özining chongbazar aldidiki bostan meschitining munarisini chéqishqa qatnashqanliqini tilgha aldi. Qeshqerdiki bir kent ayallar komitétining mudirimu öz tewelikidiki meschit munarining chéqiwétilgenlikini delillidi.

Yéqinda muhajirettiki pa'aliyetchilerdin asiye Uyghurning féysbuk bétide Uyghur rayondiki melum bir meschitning buningdin bir yil burunqi we nöwettiki süriti sélishturulup élan qilindi. Sürettin mezkur meschitning munarining bir yil awwal barliqi, nöwette bolsa késip chüshürüwétilgenliki, yeni munarning peqet kötiki qalghanliqi ashkarilandi. Amérikadiki pa'aliyetchilerdin yene behram sintashning mexsus meschitler heqqidiki süretler toplimidimu Uyghur diyaridiki zor bir türküm meschitlerning munarilirining késiwétilgenliki körsitilgen. Biz bu uchurlargha asasen xoten we qeshqerdiki bir qisim kent ahaliler komitétining xadimlirigha téléfon qilip, ularning tewelikidiki meschitler munarlirining bar-yoqluqi heqqide melumat soriduq. Téléfonimizni qobul qilghan bir kent sékrétari xotendiki meschitlerde munar we hilal ayning asasen dégüdek chéqilip yaki késilip bolghanliqini bayan qildi. Uning déyishiche, da'iriler meschit munarliri bilen hilal ayni "Diniy esebiylikning alamiti" dep békitken. Qeshqerdiki bir kent ayallar komitétining mudirimu öz tewelikide meschitlerning chéqilip azaytilghanliqini tilgha élish bilen birlikte qépqalghan meschit munarlirining yiqitilghanliqini delillidi. 

Xotendiki mezkur kent sékrétarining ashkarilishiche, xoten chong bazar etrapidiki bostan meschitning munarimu chéqiwétilgen. Bu meschit munarning chéqilishigha u özi ishtirak qilghan iken. Uning bayan qilishiche, da'iriler bultur yil béshida öy-imaretlerdiki diniy tüsi qoyuq bolghan barliq shekil we neqishlerni yoqitiwétish heqqide uqturush chüshürgen. Bu uqturush 2-3 ay ichide omumyüzlük ijra qilinip bolghan.
Hörmetlik radi'o anglighuchilar, 2016‏-yilning ottura we axirliri "Meschitlerni saghlamlashturush" nami astida xoten we qeshqerlerde az dégende 5 mingdin artuq meschitning chéqiwétilgenliki ashkarilan'ghan. 2018‏-Yiligha kelgende shu aman qalghan cheklik sandiki meschitlerning munarliri chéqiwétilgen. Bezi weziyettin xewerdar kishiler Uyghur rayonda meschit munarlirini örüsh yaki késiwétish ishining emeliyette birqanche yil awwal otturigha chiqqanliqini, emma hazirqidek omumlashmighanliqini ilgiri sürmekte.

Toluq bet