Америка дөләт мәҗлиси әзаси майкел меккавл тәйвән парламент әзалирини “уйғур ирқий қирғинчилиқи” ға қарши турушқа чақирди

Мухбиримиз мәмәтҗан җүмә
2021.08.01
Америка дөләт мәҗлиси әзаси майкел меккавл тәйвән парламент әзалирини “уйғур ирқий қирғинчилиқи” ға қарши турушқа чақирди Америка дөләт мәҗлиси ташқи мунасивәтләр комитетиниң рәиси майкел меккавл.
Social Media

Америка дөләт мәҗлиси ташқи мунасивәтләр комитетиниң рәиси майкел меккавл 30-июл тәйвән парламенти кишилик һоқуқ комитетида қилған сөзидә тәйвән парламент әзалирини “уйғур ирқий қирғинчилиқи” ға қарши турушта америка билән бир сәптә турушқа чақирди.

У сөзидә тәйвәнниң һәр күни хитай компартийәсиниң иқтисадий тәһдити вә территорийәлик таҗавузчилиқиға учрап туридиғанлиқини билдүрди.

У мундақ деди: “тәйвән дуняға һөрлүкниң чоқум хитай компартийәсиниң зулуми үстидин ғалип келидиғанлиқиниң ярқин үлгисини яратти. Мана бу үлгини тәйвән уйғур қирғинчилиқиға қарши күрәшкә тәтбиқлиялайду.”

У йәнә тәйвән вә дуня җамаәтчиликини хитай компартийәсиниң тәһдитидин агаһландуруп мундақ деди: “хитай компартийәсиниң уйғур, қазақ вә башқа мусулман аз санлиқ милләтләр үстидин йүргүзүватқан ирқий қирғинчилиқи кишилик һоқуққа қаритилған дәпсәндичиликниң әң еғир түри болупла қалмастин, бәлки у хитай компартийәси бәрпа қилмақчи болуватқан дуняниң қандақ дуня болидиғанлиқи тоғрисида агаһландуруш бериду.”

Майкел меккавл сөзидә йәнә, әркинликни сөйидиған кишиләрниң бу ирқий қирғинчилиқниң җавабсиз давамлишишиға йол қоймайдиғанлиқини билдүрди вә тәйвәнни уйғур ирқий қирғинчилиқиға қарши туруватқан әлләрниң сепигә қошулушқа чақириди.

У мундақ деди: “хитай компартийәсиниң зулумиға қарши турушниң алдинқи сепидә туруватқан тәйвәнниң бу күрәштә ойнайдиған роли алаһидә. Тәйвән хитай компартийәсиниң әң зор тәһдитигә дуч келиватқан бир демократик дөләт сүпитидә сөз қилалайду. Тәйвәнниң авази биваситә зулумниң қара көләңгисиниң астидин келидиған болғачқа, униң техиму вәзни бар. Һөр тәйвәнликләрниң сайланған вәкили болуш сүпитиңлар билән буниңдики муһимлиқини техиму яхши билисиләр. Шуңа силәрни буниңға қарши оттуриға чиқиш вә һәрикәт қоллиништа бизгә қошулушқа дәвәт қилимән.”

У сөзидә йәнә “уйғур ирқий қирғинчилиқи” ға қарши туруш үчүн америка дөләт мәҗлисидә “уйғур кишилик һоқуқ сиясити қануни”, уйғур мәҗбурий әмгикиниң алдини елиш қануни” қатарлиқ қанунларниң мақулланғанлиқини, хитайниң мунасивәтлик әмәлдарлириниң җазаланғанлиқини ейтти.

У йәнә мундақ деди: “америка дөләт мәҗлиси ташқи мунасивәтләр комитети мән тонуштурған қанун лайиһәсини мақуллап уйғурларға қаритилған җинайәтләрни ‛ирқий қирғинчилиқ‚ дәп рәсмий һалда бекитти. Мән һазир бу қанун лайиһисиниң пүтүн дөләт мәҗлисидә пат арида авазға қоюлушиға һәйдәкчилик қиливатимән.”

У нутқиниң давамида, дуняниң һәрқайси җайлиридики демократик әлләрниң уйғурларға қаритилған зулумларни барғанчә тонуп йетиватқанлиқини, канада, голландийә, әнглийә, литва вә чехийә қатарлиқ әлләр парламентлириниң уйғур қирғинчилиқини етирап қилғанлиқини ейтти вә тәйвәнниму бу сәпкә қетилишқа чақириди.

У мунда деди: “әркин дуня бу ирқий қирғинчилиқни хтитиш үчүн һәрикәткә өтти. Мән силәрниму бизгә қошулушқа чақиримән.”

Җумһурийәтчиләр партийәсидин болған майкел меккавл уйғур мәсилисигә йеқиндин көңүл бөлүп келиватқан дөләт мәҗлиси әзалиридин бири болуп, у бу йил 14-апрел хитайниң уйғурларға қаратқан ирқий қирғинчилиқи әйибләш темисидики бир қарар лайиһәсини тонуштурған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.