Mayik pompéyo roza héytliq tebriknamiside Uyghurlarni alahide tilgha aldi

Amérika tashqi ishlar ministiri mayik pompéyo roza héytliq tebriknamiside Uyghurlarni alahide tilgha aldi we zulumgha uchrighanlar bilen bir septe turidighanliqini bildürdi.

U, tebriknamiside dunyaning herqaysi jayliridiki musulmanlargha semimiy tileklirini izhar qildi we dunyawi waba seweblik özgergen dunyada amérika we dunyaning her qaysi jayliridiki musulmanlarning ötken bir ay jeryanida roza tutqanliqini, meniwi oylinish, jama'etchilik we minnetdarliq, rehimdilliq we séxiyliq qediryetlirini merkez qilip diniy mejburiyetlirini beja keltürügenlikini hemde roza tutush yosunlirinimu munasip halda tengshigenlikini bildürdi.

U tebriknamisining dawamida Uyghurlarning keskin xirislargha duch kelgenlikini tilgha aldi.

U mundaq dédi: “Ramzan we héyt jama'etning ehmiyiti, mulazimet heriketliri we din yaki étiqad qatarliqlarni öz ichige alghan négizlik erkinliklerni qoghdashning neqeder muhimliqini eskertish rolini oynaydu. Bu dunyawi waba mezgilde Uyghur, rohin'ga qatarliq musulmanlar jama'iti we bashqilar étiqadigha emel qilishta qurbanliq qilinish, parakendichilikke uchrash we qamilish qatarliqlarni öz ichige alghan éghir riqabet we téximu köp tehditlerge duch keldi.”

Pompéyo tebriknamisining axirida zulumgha uchrighanlar bilen bir septe turidighanliqini bildürüp mundaq dédi: “Biz musulman jemetige jor bolup, zulumgha uchurghuchilar bilen bir septe turimiz. Din we diniy chüshenchisining qandaq bolushidin qet'iy nezer barliq hökümetlerni barche puqralarning diniy erkinlikini qoghdashqa chaqirimiz.”

Amérika tashqi ishlar ministiri mayik pompéyo xitayning Uyghurlargha qaratqan basturush siyasetlirini izchil we küchlük rewishte tenqidlep kéliwatqan amérika rehberlirining biri.