Mélborn filim féstiwalida “Shawqun-süren” filimi awstraliye xelqi bilen uchrashti

Mélborn filim féstiwalida “Shawqun süren” filimining quyulushidin kéyin körürmenlerning so'allirigha jawab bérilmekte. 2024-Yili 27-iyul, mélborn, awstraliye.

27-Iyul küni norwégiyediki Uyghur ziyaliysi, Uyghur ma'aripi tetqiqatchisi abduweli ayup bilen jewher ilhamning hayat hékayisi we eslimiliri teswirlen'gen “Shawqun-süren” filimi awstraliyening mélborn shehiride ötküzülgen xelq'araliq höjjetlik filim féstiwalida awstraliye xelqi bilen uchrashti.

Abduweli ayupning bildürüshiche, bu filim 21-we 22-iyul künliri aldi bilen awstraliyening sidnéy shehiride qoyulghandin kéyin, 27-iyuldin bashlap mélborn xelq'ara höjjetlik filim féstiwalida körsitilgen. Bu filimida ikki yashning eslimisi arqiliq Uyghur irqiy qirghinchiliqi, shuningdek xitay hökümitining Uyghur élidiki insaniyetke qarshi jinayiti delil-ispatliri bilen yorutup bérilgen.

Bu munasiwet bilen radiyomizning ziyaritini qobul qilghan abduweli ayup, awstraliyening mélborn we we adélayd sheherliridiki pa'aliyetliri heqqide bezi tepsilatlarni radiyo anglighuchilar bilen ortaqlashti.

RFA/Hebibulla Izchi

 Mélbornda ötküzülgen bu qétimqi filim féstiwalida “Shawqun-süren” filimining béliti aldin sétilip bolghan bolup, filim quyulghan zalgha tamashibinlar liq tolghan. Filimning qoyulushigha awstraliyelik yashlar, siyasetchiler, awstraliyediki türk teshkilatliri her qaysi döletlerning awstraliyediki konsulliri qatnashqan.

Mélbornda “Shawqun-süren” filimi quyulushtin burun “Wiktoriye Uyghur jem'iyiti”, “Awstraliye tengritagh Uyghur xanim qizlar jem'iyiti” qatarliq teshkilatlar we türk teshkilatliri, shuningdek bir qisim siyasetchilerning qatnishishida “Sen'et arqiliq Uyghur dawasida obraz yaritish” témisida Uyghur dawasini awstraliyede élip bérishning yolliri we bundin kéyinki hemkarliqlar heqqide söhbet ötküzülgen. Abduweli ayup bu heqte qisqiche melumat bérip, bu filimining qoyulushi we bu söhbette otturigha quyulghan témilar heqqidiki tepsilatlarni radiyo anglighuchilar bilen ortaqlashti.

RFA/Hebibulla Izchi

 “Shawqun-süren” filimining bu qétim awstraliyediki filim féstiwalida qoyulushi üchün “Awstraliye tengritagh Uyghur xanim qizlar jem'iyiti” mu köp küch chiqarghan. Bu jem'iyetning re'isi ramile xanimmu ziyaritimizni qobul qilip, “Shawqun-süren” filimining qoyulushi we bu filimning awstraliyediki bu filim féstiwaligha qatnishishining jeryani heqqide melumat berdi.

Awstraliyening mélborn shehiride texminen 70 ming etrapida türk yashaydighan bolup, türkler bu yerde belgilik tesirge ige köchmenler jama'iti hésablinidiken. Abduweli ayupning bildürüshiche, bu qétimqi mélborn filim féstiwalidin kéyin awstraliyediki türkche radiyo ZZZ uni mexsus ziyaret qilghan. Ziyarette u bu pursettin paydilinip awstraliye we yéngi zélandiyediki türk xelqige Uyghur irqiy qirghinchiliqini tonushturghan.

RFA/Hebibulla Izchi

 “Shawqun-süren” filimining qoyulushigha awstraliye parlaméntining bir qisim ezaliri hemde her qaysi partiyelerning wekilliri qatnashqandin bashqa yene, awstraliyede tughulup chong bolghan ikkinchi ewlad yashlarmu qizghinliq bilen qatnashqan, shundaqla bu yashlarning pewqul'adde qiziqishini qozghighan. Bezi yashlar özining bu filimni körgendin kéyinki tesiratini abduweli bilen ortaqliship, bundin kéyin özlirining Uyghur dawasini awstraliyege tonushturushta téximu aktip bolidighanliqini bildürüshken. Bu filimni yene awstraliye parlaméntida quyushmu pilan qilinmaqta iken.