Qirghizistan Uyghurliri bu yilliq milliy armiye xatire künide péshqedem milliy armiye jengchisini ziyaret qildi

Ixtiyariy muxbirimiz féruze
2022-04-12
Share
Qirghizistan Uyghurliri bu yilliq milliy armiye xatire künide péshqedem milliy armiye jengchisini ziyaret qildi Qirghizistan Uyghurlirimu “Ittipaq” jem'iyitining bashchiliqida sabiq milliy armiye jengchisi 94 yashliq ablimit bekri ependini ziyaret qilishti. 2022-Yili 8-aprél, qirghizistan.
RFA/Féruze

20-Esirning aldinqi yérimida Uyghur xelqi milliy azadliq inqilabi élip bérip, 1933-yili qeshqerde, 1944-yili ghuljade ikki qétim sherqiy türkistan jumhuriyitini qurghan idi. Gerche bu jumhuriyetler uzun muddet mewjut bolup turalmighan bolmisimu, lékin Uyghur xelqining bügünki zaman milliy küresh tarixida eng yarqin sehipilerni yaratqan idi.

Derweqe, Uyghurlarning 20-esirdiki milliy azadliq küreshliride, bolupmu ili inqilabida milliy armiye muhim rol oynighan idi. Milliy armiye 1945-yili 8-aprél küni ghuljada qurulghan idi. Shu munasiwet bilen dunyaning her qaysiy jaylardiki Uyghurlar her yili 8-april küni türlük pa'aliyetlerni élip bérip, milliy armiyening qurulghan xatire künini tebriklep kelmekte. Bu yil 8-aprilda qirghizistan Uyghurlirimu “Ittipaq” jem'iyitining bashchiliqida sabiq milliy armiye jengchisi 94 yashliq ablimit bekri ependini ziyaret qilishti. Ablimit bekri 18 yéshida milliy armiyege qatniship, manas deryasining boyighiche qanliq jenglerge qatnashqan idi.

Qirghizistan Uyghurlirimu “Ittipaq” jem'iyitining bashchiliqida sabiq milliy armiye jengchisi 94 yashliq ablimit bekri ependini ziyaret qilishti. 2022-Yili 8-aprél, qirghizistan.

Adette qirghizistan Uyghurliri “Ittipaq” jem'iyitining yétekchilikide her yili milliy armiye künige béghishlap ay-yultuzluq kök bayraqlarni kötürüp, dokladlar anglap, chong murasim uyushturatti. Bu yilliq milliy armiyening xatire küni ramazan éyigha toghra kelgechke, “Ittipaq” jem'iyiti merkiziy kéngishi milliy bu künde qirghizistandiki sabiq milliy armiye jengchisi eblimit bekri ependini ziyaret qilip yoqlashni qarar qildi. “Ittipaq” jem'iyitining re'isi esqer qasimof, mu'awin re'isi ekberjan bawudunof, aqsaqallar kéngishining re'isi muzepperxan qurbanof, ayallar kéngishining re'isi tursun'ay islam, “Lébédinowka” yézisi ayallar kéngishining re'isi qeminur lobanowa we nowopokrowka yézisining yigitbéshi gheyrat jahanof hemde “Ittipaq” gézitining bash muherriri zumret roziyéwalar bolup, ghazi ependi ablimit bekrini ziyaret qildi.

Radiyomiz ziyaritini qobul qilghan “Ittipaq” jem'iyitining aqsaqallar kéngishining re'isi muzepperxan qurbanof, ablimit bekrining yéshi chong bolsimu eslimiliri éniq ikenligini eskertip ötti. U ablimit bekri ependining milliy küresh sepidiki qehriman sepdashlirini her da'im eslep turidighanlighini éytti.

Ziyaret dawamida ablimit bekri öz béshidin kechürgen weqelerni, jümlidin manas deryasi boyida bolghan jengler toghrisida sözlep ötti, ziyaretchiler öz atiliridin anglighan-bilgen weqelerni sözlep ablimit bekrining kechmishliri bilen ortaqlashti. Radiyomiz ziyaritini qobul qilghan sabiq milliy armiye jengchisi islam qasimining qizi tursun'ay islam, ablimit bekri ependini tewerük dep atidi.

8-Aprél milliy armiye xatire künide yene qirghizistanning jenubidiki jalal'abad shehiridimu xatirilesh pa'aliyetliri ötküzüldi. Mezkur pa'aliyet “Ittipaq” jem'iyiti jalal'abad shöbisining re'isi elishir nasiraxunowning teshebbusida uyushturuldi. Radiyomiz ziyaritini qobul qilghan elishir nasiraxunow 2017-yildin tartip Uyghur xelqining tarixidiki ammiwiy weqelerni dawamliq xatirlep kéliwatqanlighini tekitlep ötti.

Qirghizistandiki Uyghurlar asasliqi bishkek shehiri we uning etrapigha tarqalghan bolup, ular özlirining milliy medeniyiti we milliy kimlikini bir qeder yaxshi saqlap qalghan. Yéqinqi yillardin buyan xitayning Uyghur élida élip bériwatqan irqiy qirghinchiliqi, yeni Uyghurlarni lagérlargha solash, ménge yuyush, Uyghur tili we ma'aripini yoqitish qilmishliri bu qirghizistandiki Uyghurlarningmu qattiq naraziliqini qozghimaqta. Ular özlirining milliy medeniyiti, tili, örp-adetliri hem kimlikini qoghdash we rawajlandurushqa alahide ehmiyet bérip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet