تۈركىيەنىڭ ئەڭ چوڭ ۋە قەدىمىي نەشرىياتلىرىدىن بىرى بولغان «ئۆتۈكەن» نەشرىياتىنىڭ «مىللىي مەجمۇئە» ژۇرنىلى شەرقىي تۈركىستان توغرىسىدا مەخسۇس سان چىقاردى.
مەزكۇر ژۇرنالدا ئىستانبۇل ئۇنىۋېرسىتېتى تارىخ ئوقۇتقۇچىسى ئالى ئاخمەتبېيئۇغلۇنىڭ «2009-يىلى 5-ئىيۇل كۈنىگىچە شەرقىي تۈركىستاندا يۈز بەرگەن ۋەقەلەر» ، بەيكەنت ئۇنىۋېرسىتېتىنىڭ ئوقۇتقۇچىسى مەغفىرەت كامال يۇنۇسوغلۇ خانىم يازغان «ياركەن خانلىقى مەزگىلىدىكى مەدەنىيەت ۋە ئەدەبىيات» ، ئەگە ئۇنىۋېرسىتېتى تۈرك دۇنياسى تەتقىقات ئىنىستىتۇتىنىڭ پروفېسورى ئالىمجان ئىنايەتنىڭ «تۈركىيەنىڭ شەرقىي تۈركىستان سىياسىتىگە نەزەر»، ئىستانبۇل ئۇنىۋېرسىتېتى ئوقۇتقۇچىسى دوتسېنت دوكتور راھىلە قەشقەرلى خانىمنىڭ «شەرقىي تۈركىستانلىق مەشھۇر رەسسام غازى ئەمەت»، ئامېرىكادىكى دوكتور نەبىجان تۇرسۇننىڭ «قىزىل رۇسيەنىڭ شەرقىي تۈركىستان ئىستراتېگىيەسىدە ئۇيغۇر مىللىي مۇستەقىللىق ھەرىكىتى» (1917-1924) ماۋزۇلۇق ماقالىسىنى ئۆز ئىچىگە ئالغان 14 پارچە ماقالىگە ئورۇن بېرىلگەن.
شەرقىي تۈركىستان توغرىسىدا مەخسۇس سان چىقارغان «مىللىي مەجمۇئە» ژۇرنىلىنىڭ مەسئۇلى ياسىن ئۇستا ئەپەندى ئۇيغۇرلار ۋە شەرقىي تۈركىستان توغرىسىدا مەخسۇس سان چىقىرىش پىكىرىنىڭ قانداق ئوتتۇرىغا چىققانلىقى توغرىسىدىكى سوئالىمىزغا مۇنداق جاۋاب بەردى: «‹مىللىي مەجمۇئە› ژۇرنىلى 6 يىلدىن بۇيان نەشر قىلىنىۋاتقان تۈرك مىللەتچىلىرىنى ئوبيېكت قىلغان ژۇرنال. بۇ ساندا مەخسۇس شەرقىي تۈركىستان توغرىسىدىكى ماقالىلەرگە ئورۇن بەردۇق. بىزدە شەرقىي تۈركىستاننىڭ ئورنى بەك مۇھىم، لېكىن بۇنى تۈركلەرگە ياخشى ئاڭلىتالمىدۇق. شۇڭا بىز ئۇيغۇرلارنىڭ تىلى، تارىخى، ئەدەبىياتى، كۈلتۈرى ۋە نۆۋەتتىكى ۋەزىيىتىنى تېخىمۇ چوڭقۇر ۋە ئەتراپلىق ئاڭلىتىش مەقسىتى بىلەن بۇ مەخسۇس ساننى چىقاردۇق. بۇ مەخسۇس سان توغرىسىدا ياخشى ئىنكاسلار كېلىۋاتىدۇ.»
پروفېسسور، دوكتور ئالىمجان ئىنايەت ئەپەندى مەزكۇر ژۇرنالنىڭ ئۇيغۇرلار ئۈچۈن ئايرىلغان مەخسۇس سانىدا ئېلان قىلىنغان ماقالىلەرنىڭ مەزمۇنى توغرىسىدا مەلۇمات بەردى. ئۇ، مۇنداق دېدى: «بۇ ژۇرنالدا شەرقىي تۈركىستان بىلەن مۇناسىۋەتلىك 14 پارچە ماقالىگە ئورۇن بېرىلگەن بولۇپ، بۇ ماقالىلەردە تارىخ، سىياسەت، دىپلوماتىيە، مەدەنىيەت، جەمئىيەتشۇناسلىق، سەنئەت، ئەدەبىيات ۋە فولكلور بىلەن مۇناسىۋەتلىك تېمىلار بايان قىلىنغان. شۇنىڭ بىلەن بىرلىكتە يەنە خىتاينىڭ ئۇيغۇرلارغا قارىتا ئېلىپ بېرىۋاتقان ئىرقىي قىرغىنچىلىقى ۋە قەتلىئاملىرىمۇ ئىلمىي يوسۇندا چۈشەندۈرۈلگەن. ‹مىللىي مەجمۇئا› ژۇرنىلىنىڭ بۇ مەخسۇس سانى تۈركىيە جامائەتچىلىكىگە شەرقىي تۈركىستاننى تونۇتۇش ۋە چۈشەندۈرۈشتە ئىنتايىن مۇھىم.»
پروفېسسور، دوكتور ئالىمجان ئىنايەت ئەپەندى يېقىنقى يىللاردىن بېرى تۈركىيەدىكى بەزى ژۇرناللارنىڭ ئۇيغۇرلار توغرىسىدا مەخسۇس سان چىقىرىۋاتقانلىقىنى، لېكىن تۈركىيەدىكى ئۇزۇن تارىخقا ئىگە، ئەڭ چوڭ نەشرىياتلاردىن بىرى ھېسابلىنىدىغان «ئۆتۈكەن» نەشرىياتىنىڭ «مىللىي مەجمۇئە» ژۇرنىلىنىڭ شەرقىي تۈركىستان توغرىسىدا مەخسۇس سان چىقىرىشىنىڭ ئۇيغۇر تەتقىقاتى ۋە ئۇيغۇر دەۋاسى ئۈچۈن زور ئەھمىيەتكە ئىگە ئىكەنلىكىنى بايان قىلدى.
2009-يىلىدىكى «5-ئىيۇل ئۈرۈمچى قىرغىنچىلىقى» دىن كېيىن، تۈركىيەدىكى ئەڭ چوڭ ژۇرناللاردىن بىرى بولغان «تارىخ» ژۇرنىلى، «تۈركىيە گۈندەمى» ژۇرنىلى، ئۈلكۈ ئوجاقلىرى تەشكىلاتىنىڭ ژۇرنىلى قاتارلىقلار ئۇيغۇرلار ۋە شەرقىي تۈركىستان توغرىسىدا مەخسۇس سان چىقارغان ئىدى.