Ghayib mir'adil hesenning anisi tursun'gül toxtiniyaz heqqide ashkarilighan uchurlirining toghriliqi delillendi

Muxbirimiz shöhret hoshur
2020-09-16
Share
miradil-hesen-youtube.jpg Ijtima'iy taratqularda özining jyangsu ölkiside turuwatqanliqini ilgiri sürgen mir'adil hesen Uyghur rayonida irqiy qirghinchiliq dawam qiliwatqanliqini otturigha qoymaqta. 2020-Yili séntebir.
Social Media

Ikki heptining aldida ijtima'iy taratqularda özining jyangsu ölkiside turuwatqanliqini ilgiri sürgen mir'adil hesen isimlik bir yash Uyghurche, xitayche we in'glizche üch xil tilda yotub qanili arqiliq bayanat élan qilip, Uyghur rayonida irqiy qirghinchiliq dawam qiliwatqanliqini otturigha qoyghan idi. U bayanatlirining biride anisi tursun'gül toxtiniyazning pilanliq tughut tedbirining ziyankeshlikige uchrighanliqi we bu sewebtin 2017-yili ürümchidiki ösme késellikler doxturxanisida dawalan'ghanliqini tilgha alghan. Muxbirimizning onsu nahiyesi we ürümchi shehiridiki ösme késellikler doxturxanisigha qarita élip barghan téléfon ziyaretliri dawamida bayanatta déyilgen tursun'gül toxtiniyazning olturaq adrésining toghriliqi we uning mezkur doxturxanida bir mezgil dawalan'ghanliqi delillendi.

Bu yil 5-séntebirdin kéyin iz-déreksiz ghayib bolghan mir'adil hesen 3-séntebirdiki xitayche bayanatida xitayning Uyghur rayonida irqiy qirghinchiliq yürgüzüwatqanliqini otturigha qoyghan we bu qirghinchiliqning pakitliridin biri süpitide anisi tursun'gül toxtiniyazning xitayning pilanliq tughut siyasitining ziyankeshlikige uchrighanliqi we 2017-yili ürümchidiki ösme késellikler doxturxanisida dawalan'ghanliqini pash qilghan idi. Biz bu uchurning toghra-xataliqini delillesh üchün aldi bilen onsu nahiyesidiki alaqidar organlargha téléfon qilduq.

Mir'adil hesenning mezkur bayanatida anisining onsu baziri dapsen ahaliler komitétida olturushluq ikenliki tilgha élin'ghan. "Beydu" uchur ambirida körsitilishiche, onsu baziri dapsen ahaliler komitéti, qumderwaza ahaliler komitéti we mepixana ahaliler komitéti qatarliq9 ahaliler komitétidin teshkillen'gen iken.

Téléfonimizni qobul qilghan qumderwaza ahaliler komitétidiki bir xadim tursun'gül toxtiniyazning dapsen ahaliler komitétigha nopusluq ikenlikini bayan qilish bilen birlikte, uning 2018‏-yili ürümchidiki ösme késellikler doxturxanisining bashliqi merdan dégen kishi üstidin shikayet qilip yürgenlikini tilgha aldi. Bu xadim mir'adilning ish chiqirip qoyghanliqini tilgha alghan bolsimu, uning nöwettiki ehwali we anisi tursun'gülning hayat yaki emesliki heqqide melumat bérelmidi.

Téléfonimizni qobul qilghan ürümchidiki ösme késellikler doxturxanisining bir xadimi deslepte balnétsa nomuri bolmay turup, sabiq bimarlarning kimlikini tapqini bolmaydighanliqini éytti. Bu xadimning déyishiche, ürümchide birla ösme késellikler doxturxanisi bar bolup, bu Uyghur aptonom rayonluq ösme késellikler doxturxanisidur. Mezkur xadim tursun'gül toxtiniyazning shikayet qilip yürgenliki ilgiri sürülgen merdan isimlik kishining bu doxturxanida ilgiri mes'ul rehber bolup ishligenlikini delillidi. Biz bu xadimdin tursun'gül toxtiniyazni isim-familisi boyiche, doxturxanining kompyutér sistémisidin izdep béqishini telep qilduq. Xadim sistémini közdin kechürgendin kéyin, sabiq bimarlar tizimlikide tursun'gül toxtiniyaz isimlik bir ayal bimarning bar ikenlikini bayan qildi. U yene sistémida tursun'gül toxtiniyazning adrésining mir'adilning bayanatida déyilgen bilen eynen ikenlikini ashkarilidi. Mir'adil hesen bayanatida anisining nöwette hayat yaki emeslikidin xewersizlikini bayan qilghan idi. Mezkur doxturxana xadimidin tursun'gül toxtiniyazgha qandaq di'agnoz qoyulghanliqi we qandaq dawalash élip bérilghanliqini sorighinimizda, u bimarlarning bu tür uchurlirini ashkarilashqa bolmaydighanliqini éytti. Biz uningdin tursun'gül toxtiniyazning nöwette hayat yaki emeslikini sorighinimizda, u bu so'algha jawab bérishnimu qet'iy yosunda ret qildi.

Biz axirida uningdin tursun'gül toxtiniyazning bu doxturxana mes'uli merdanning üstidin erz sun'ghan waqtining qachan ikenlikini sorighinimizda u "2018‏-Yili" dep jawab berdi.

Yuqirida ghayib mir'adil hesenning bayanatlirida tilgha élin'ghan anisi tursun'gül toxtiniyazning adrési we bir mezgil ürümchidiki ösme késellikler doxturxanisida dawalan'ghanliqining delillen'genliki heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.