Ghayip mir'adil hesenning jyangsu ölkiside tutqun qilin'ghanliqi onsu hökümet xadimi teripidin delillendi

Muxbirimiz shöhret hoshur
2020-09-18
Élxet
Pikir
Share
Print
Xitayning jyangsu ölkiside turup, ijtima'iy taratqularda Uyghur rayonidiki irqiy qirghinchiliqni pash qilghan mir'adil hesen özining anisi qatarliq a'ile-tawabi'atlirining lagér we türmilerde ikenliki toghrisida guwahliq bériwatqan körünüsh. 2020-Yili séntebir.
Xitayning jyangsu ölkiside turup, ijtima'iy taratqularda Uyghur rayonidiki irqiy qirghinchiliqni pash qilghan mir'adil hesen özining anisi qatarliq a'ile-tawabi'atlirining lagér we türmilerde ikenliki toghrisida guwahliq bériwatqan körünüsh. 2020-Yili séntebir.
Social Media

Xitay ölkiside turup xitaygha qarshi yotubta bayanat élan qilghan aqsu onsuluq yash mir'adil hesen heqqide élip barghan éniqlashlirimiz dawamida onsu nahiyelik hökümetning bir xadimi mir'adil hesenning xitayning jyangsu ölkiside tutqun qilin'ghanliqini ashkarilidi. U mir'adilning tutulush sewebi söpitide uning torda atalmish "Ighwa tarqitip, xitay dölitining yüzige qara sürkigenliki we onsu nahiyesining yüzini tökkenliki" ni ilgiri sürdi

Ghayip mir'adil hesen amérikadiki yotubchi shadiman maxmut bilen ötküzgen söhbet xatirisida, özining yotubta uchur we bayanat élan qilishni üch ayche dawamlashturush pilani barliqini éytqan, emma shuningdin birqanche sa'et kéyin uning tashqiy dunya bilen alaqsi üzülüp, iz-dériksiz ghayip bolghan. Norwégiyediki pa'aliyetchi abduweli ayup 7‏-séntebir féysbokta élan qilghan bir yazmisida mir'adil hesenning tutulup bolghanliqi heqqide wetendiki ishenchlik bir menbedin uchur kelgenlikini ashkarilighan idi. Biz Uyghur rayonidiki alaqidar idare-organlardin mir'adilning aqiwiti heqqide melumat soriduq. Uyghur aptonum rayonluq j x nazaritidin téléfonimizni qobul qilghan bir xadim özining mir'adilning ehwalidin xewersizlikini éytti. 

Ghayip mir'adil hesen yotubtiki bayanatida özining2018 ‏-yili onsuda lagérgha tutulushtin qéchip, özi aliy mektepni oqughan jyangsu ölkisige kéliwalghanliqi, ish-izdep shangxey we nenjinglargha barghan bolsimu, emma Uyghur kimliki sewebidin ishqa élinmighan yaki bir nechche kündin kéyin ishtin chiqirilanliqi, 2 yildin buyan sergardan halette yashawatqanliqini bayan qilish arqiliq Uyghurlarning jiddiy siyasiy weziyitini körsitip bergen idi. 

Uyghur aptonum rayonluq edliye nazaritining bir xadimidin nazarettiki tutqunlar tizimlikide mir'adil hesen isimlik bir kishining bar-yoqluqini sorighinimizda, u Uyghurlarning ismining nisbeten uzunluqi we her xil yézilidighanliqini bayan qilip, tépishning qéyinliqini bayan qildi. 

Mir'adil hesen bayanatida yene aqsudiki lagérning xeritisini we özi uchratqan bir Uyghur qizining mejburiy emgekke sélinish hékayisini teswirligen idi.

Edliye nazaritidiki yene bir xadimdin mir'adil hesenning anisi we bowisining tutqunlar tizimlikide bar-yoqluqini sorighinimizda, u xatirini axturup körgen bolsimu, emma bu heqte jawap bérishtin özini tartti. 

Téléfonimizni qobul qilghan onsu bazarliq hökümet xadimi bu heqte özining melumati yoqluqini bildürüp, ehwalni j x tarmaqliridin igilishimizni tewsiye qildi. Onsu nahiyelik xelq hökümitidiki bir xadim torda "Ighwa" tarqatqan mir'adil hesenning tutulghan-tutulmighanliqi heqqidiki so'alimizgha jawaben, uning jyangsu ölkiside tutulghanliqini delillidi. Emma u mir'adilning qachan tutulghanliqi we nöwette nede tutup turuliwatqanliqi heqqidiki so'alimizni jawap bermidi. U peqet mir'adil hesenning "Torda ighwa tarqatqanliqi" üchün tutulghanliqini delillidi. Mir'adilning nahayiti chong bir ish térighanliqini bayan qilghan bu xadim, uning "Döletning obrazigha qara sürkigenliki we onsu nahiyesining yüzini tökkenliki" ni ilgiri sürdi. 
Miradil bayantida anisidin bashqa yene bowisi toxtiniyaz toxti, momisi xanzade we taghisi aqniyazlarnimu tilgha alghan shundaqla özi seweplik bowsining pénsiye pulining toxtitilghanliqini pash qilghan idi. Mezkur xadim toxtiniyaz toxtining mir'adil hesenning bowo'isi ikenliki we bir pénsiyonér ikenlikini delillidi. 

Mir'adil hesen yutobtiki üch qisimliq bayanati we bir ziyaret xatiriside xitayning Uyghur rayondiki irqiy qirghinchiliqini pash qilipla qalmastin, belki yene muhajirettiki Uyghurlarghimu xitap qilip, xitaygha qarshi herketliride téximu jesur bolushqa chaqirghan idi. U bir insan herqanche erkin dölette yashisimu eger jesur bolmisa, bu erkin dölette yashashning shu kishining özigimu, Uyghur millitigimu payda élip kelmeydighanliqini nuqtiliq eskertken. U bu eskertmisini xitay ichide turup xitaygha qarshi bayanat élan qilishtek emeliy herkiti bilen belgilik derijide tesi'ir küchige ige qilghan idi.

Hörmetlik radiyo anglighuchilar, bügünki éniqlashlirimizdin ghayip mir'adil hesenning jyangsu ölkiside tutqun qilin'ghanliqi delillendi, emma uning nede tutup turuliwatqanliqi hazirche melum emes.

Toluq bet