Мирадил һәсән паш қилған ақсудики хуафу фабрикисиниң 20 миңдин артуқ лагер тутқунини ишқа селиватқанлиқи дәлилләнди

Мухбиримиз шөһрәт һошур
2020-10-21
Елхәт
Пикир
Share
Принт
Иҗтимаий таратқуларда өзиниң җяңсу өлкисидә туруватқанлиқини илгири сүргән мирадил һәсән уйғур районида ирқий қирғинчилиқ давам қиливатқанлиқини оттуриға қоймақта. 2020-Йили сентәбир.
Иҗтимаий таратқуларда өзиниң җяңсу өлкисидә туруватқанлиқини илгири сүргән мирадил һәсән уйғур районида ирқий қирғинчилиқ давам қиливатқанлиқини оттуриға қоймақта. 2020-Йили сентәбир.
Social Media

Хитай өлкисидә туруп хитайға қарши баянат елан қилған ғайиб мирадил һәсән баянатлириниң биридә ақсудики хуафу тоқумичилиқ завутиниң йәрлик даириләр билән шериклишип, лагер тутқунлирини мәҗбурий әмгәккә селиватқанлиқини паш қилғаниди. Мухбиримизниң бу йип учиға асасән елип барған ениқлашлири давамида, мәзкур завутниң шенҗендики ишхана хадими өзлириниң ақсуда лагердин йөткәп келингән 20 миңдин артуқ ишчиси барлиқини ашкарилиди.

Ғайиб мирадил һәсән хитай өлкилиридә туруп бәргән баянатида ақсудики җеҗаңлиқ хитайлар тәрипидин башқурулуватқан хуафу тоқумичилиқ фабрикисида, уйғур яшлириниң төвән иш һәққи билән мәҗбурий ишқа селиниватқанлиқини тилға алғаниди. Тордики материялларда көрситилишичә ақсудики хуафу тоқумичилиқ фабрикиси җеҗаң өлкисидә 2011 ‏-йили қурулған хуафу тоқумичилиқ ширкитигә тәвә болуп, бу ширкәтниң шенҗен вә «шинҗаң» шөбилири мәвҗут икән. Ширкәтниң «шинҗаң шөбиси» ниң ақсуда 12 орунда завут фабрикилири бар икән.

Ғайиб мирадил һәсән баянатида, хуафу тоқумичилиқ ширкитиниң йәрлик даириләр билән җүмлидин учтурпан даирилири билән бәлгилик мәнпәәтлири үчүн шерикләшкәнлики вә лагердикиләрни хуафу завутидикиләргә өткүзүп бәргәнликини әскәрткәниди. Учтурпан даирилири, бу һәқтә мәлумат беришни кәскин рәт қилди,

Тордики учурлардин мәлум болушичә, мирадил паш қилған фабрика ақсу шәһириниң ечиветиш райониға җайлашқан болуп, бу ақсудики фабрикиларниң ичидики нисбәтән көлими чоңрақи һесаблинидикән. Мәзкур ширкәтниң ақсудики шөбә вә фабрикилириниң телефонлири елинмиғандин кейин, шенҗендики ишханисиға телефон қилдуқ. Мәзкур хадимниң дейишичә ширкәтниң җеҗаңдики ишханисида 100 нәччә, шенҗендики шөбисидә 20 нәччә хизмәтчиси бар болуп, булар асаслиқи мәмурий вә сетиш ишлириға мәсул икән. Ақсудики тармақлирида 30 миңдин артуқ ишчи-хизмәтчи бар болуп булар ишләпчиқиришқа мәсул икән. Дейилишичә ақсуда асаслиқи тоқумичилиқ хам әшялири вә үскүнилири ишләпчиқирилидикән. Биз бу хадимдин ширкәтниң омумий әһвали һәққидә қисқичә мәлуматқа еришкәндин кейин, мәзкур ширкәтниң ишчи-хизмәтчиләр қошуниниң тәркиби һәққидә мәлумат соридуқ. Биз униңдин ширкәтниң шенҗен вә җеҗаң шөбилиридә уйғурлар бар йоқлуқини сориғинимизда, у «йоқ» дәп җаваб бәрди вә уйғурларниң пәқәт ақсудики завут-фабрикиларда ишчи икәнликини ишарәтлиди.

Биз мәзкур хадимдин бу ширкәтниң ақсудики фабрикилирида лагердин йөткәп келингән ишчилар бар-йоқлуқини соридуқ. У бу соалимизға «бар» дәп җаваб бәрди. Биз униңдин саниниң җәмий қанчә икәнликини сориғинимизда, лагердин йөткәп келингән ишчилар саниниң 20 миңдин артуқ икәнликини ашкарилиди.

Биз униңдин бу лагердин йөткәп келингәнләрниң қанчилик мааш билән, қандақ шараитта, қандақ келишим билән ишләватқанлиқини сориғинимизда, у бу һәқтә ширкәтниң җеҗаңдики баш ишханиси билән көрүшүшимизни тәвсийә қилди. Әмма җеҗаңдики баш ширкәт хадими, ширкәтниң бу учурлири һәққидә мәлумат беришкә болмайдиғанлиқини тәкитлиди.

Йәнә мирадил һәсән ашкарилиған бир учтурпанлиқ қизниң хуафу фабрикисида ишлитиливатқанлиқи һәққидики учурға асасән илгири елип барған ениқлашлиримиз давамида, учтурпан имамлиримдики ханзөһрә сәйдәхмәт вә арзугүл сәмәт исимлик икки қизниң лагердин чиқип аилисидә бир күнла турғузулғандин кейин завутқа әкетилгәнлики йәрлик сақчи хадимлири тәрипидин дәлилләнгәниди.

Һөрмәтлик радио аңлиғучилар, юқирида ғайиб мирадил һәсән паш қилған хуафу тоқумичилиқ ширкитиниң ақсудики фабрикилирида лагердин йөткәп келингән 20 миңдин артуқ тутқунниң мәҗбури ишқа селиватқанлиқи һәққидә аңлитиш бәрдуқ.

Пикирләр (0)
Share
Толуқ бәт