Miradil hesen pash qilghan aqsudiki xu'afu fabrikisining 20 mingdin artuq lagér tutqunini ishqa séliwatqanliqi delillendi

Muxbirimiz shöhret hoshur
2020-10-21
Share
miradil-hesen-youtube.jpg Ijtima'iy taratqularda özining jyangsu ölkiside turuwatqanliqini ilgiri sürgen mir'adil hesen Uyghur rayonida irqiy qirghinchiliq dawam qiliwatqanliqini otturigha qoymaqta. 2020-Yili séntebir.
Social Media

Xitay ölkiside turup xitaygha qarshi bayanat élan qilghan ghayib miradil hesen bayanatlirining biride aqsudiki xu'afu toqumichiliq zawutining yerlik da'iriler bilen shérikliship, lagér tutqunlirini mejburiy emgekke séliwatqanliqini pash qilghanidi. Muxbirimizning bu yip uchigha asasen élip barghan éniqlashliri dawamida, mezkur zawutning shénjéndiki ishxana xadimi özlirining aqsuda lagérdin yötkep kélin'gen 20 mingdin artuq ishchisi barliqini ashkarilidi.

Ghayib miradil hesen xitay ölkiliride turup bergen bayanatida aqsudiki jéjangliq xitaylar teripidin bashquruluwatqan xu'afu toqumichiliq fabrikisida, Uyghur yashlirining töwen ish heqqi bilen mejburiy ishqa séliniwatqanliqini tilgha alghanidi. Tordiki matériyallarda körsitilishiche aqsudiki xu'afu toqumichiliq fabrikisi jéjang ölkiside 2011 ‏-yili qurulghan xu'afu toqumichiliq shirkitige tewe bolup, bu shirketning shénjén we "Shinjang" shöbiliri mewjut iken. Shirketning "Shinjang shöbisi" ning aqsuda 12 orunda zawut fabrikiliri bar iken.

Ghayib miradil hesen bayanatida, xu'afu toqumichiliq shirkitining yerlik da'iriler bilen jümlidin uchturpan da'iriliri bilen belgilik menpe'etliri üchün shérikleshkenliki we lagérdikilerni xu'afu zawutidikilerge ötküzüp bergenlikini eskertkenidi. Uchturpan da'iriliri, bu heqte melumat bérishni keskin ret qildi,

Tordiki uchurlardin melum bolushiche, miradil pash qilghan fabrika aqsu shehirining échiwétish rayonigha jaylashqan bolup, bu aqsudiki fabrikilarning ichidiki nisbeten kölimi chongraqi hésablinidiken. Mezkur shirketning aqsudiki shöbe we fabrikilirining téléfonliri élinmighandin kéyin, shénjéndiki ishxanisigha téléfon qilduq. Mezkur xadimning déyishiche shirketning jéjangdiki ishxanisida 100 nechche, shénjéndiki shöbiside 20 nechche xizmetchisi bar bolup, bular asasliqi memuriy we sétish ishlirigha mes'ul iken. Aqsudiki tarmaqlirida 30 mingdin artuq ishchi-xizmetchi bar bolup bular ishlepchiqirishqa mes'ul iken. Déyilishiche aqsuda asasliqi toqumichiliq xam eshyaliri we üsküniliri ishlepchiqirilidiken. Biz bu xadimdin shirketning omumiy ehwali heqqide qisqiche melumatqa érishkendin kéyin, mezkur shirketning ishchi-xizmetchiler qoshunining terkibi heqqide melumat soriduq. Biz uningdin shirketning shénjén we jéjang shöbiliride Uyghurlar bar yoqluqini sorighinimizda, u "Yoq" dep jawab berdi we Uyghurlarning peqet aqsudiki zawut-fabrikilarda ishchi ikenlikini isharetlidi.

Biz mezkur xadimdin bu shirketning aqsudiki fabrikilirida lagérdin yötkep kélin'gen ishchilar bar-yoqluqini soriduq. U bu so'alimizgha "Bar" dep jawab berdi. Biz uningdin sanining jem'iy qanche ikenlikini sorighinimizda, lagérdin yötkep kélin'gen ishchilar sanining 20 mingdin artuq ikenlikini ashkarilidi.

Biz uningdin bu lagérdin yötkep kélin'genlerning qanchilik ma'ash bilen, qandaq shara'itta, qandaq kélishim bilen ishlewatqanliqini sorighinimizda, u bu heqte shirketning jéjangdiki bash ishxanisi bilen körüshüshimizni tewsiye qildi. Emma jéjangdiki bash shirket xadimi, shirketning bu uchurliri heqqide melumat bérishke bolmaydighanliqini tekitlidi.

Yene miradil hesen ashkarilighan bir uchturpanliq qizning xu'afu fabrikisida ishlitiliwatqanliqi heqqidiki uchurgha asasen ilgiri élip barghan éniqlashlirimiz dawamida, uchturpan imamlirimdiki xanzöhre seydexmet we arzugül semet isimlik ikki qizning lagérdin chiqip a'iliside bir künla turghuzulghandin kéyin zawutqa ekétilgenliki yerlik saqchi xadimliri teripidin delillen'genidi.

Hörmetlik radi'o anglighuchilar, yuqirida ghayib miradil hesen pash qilghan xu'afu toqumichiliq shirkitining aqsudiki fabrikilirida lagérdin yötkep kélin'gen 20 mingdin artuq tutqunning mejburi ishqa séliwatqanliqi heqqide anglitish berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.