Motsiklit rémontchisi memettursun metniyazning tumshuq türmisidin jesiti chiqqanliqi delillendi

Muxbirimiz shöhret hoshur
2023.05.21
Altay 5 ‏-ottura mektipining “Qosh tilliq” oqutushidin narazi bolghan 3 oqutquchisi muddetsiz we 17 yilliqtin késiwétilgen Qoralliq eskerning qeshqer türmisining qarawulxanisida turghan körünüshi. 2021-Yili 3-may, qeshqer.
REUTERS

 Maralbéshidiki tumshuq türmisidin roza héyttin awwal bir türküm kishilerning jesiti chiqqanliqi heqqidiki xewer yip uchigha ige bolghandin kéyin, bu heqte élip bériwatqan éniqlashlirimiz dawamida, maralbéshi bazirida eslide motsiklit rémontchiliqi bilen shughullinidighan memettursun metniyaz isimlik kishining buningdin 40 künche awwal türmidin jesiti chiqqanliqi delillendi.

Maralbéshi weziyitidin xewerdar bir kishining yetküzgen mezkur inkasida bayan qilinishiche, jesetler roza héyttin bir hepte awwal maralbéshidiki tumshuq türmisidin élip chiqilghan we sériqbuya qatarliq bir qisim yéza-bazarliq saqchixanilargha tarqitilghan. Biz bu uchurlarning toghra-xataliqini aydinglashturush üchün, maralbéshidiki alaqidar idare-organlargha téléfon qilduq. Inkasta jesetlerdin birining sériqbuya bazarliq ottura mektepning mudiri qadir dégen kishining oghli abdughéni ikenliki bayan qilin'ghan.

Téléfonimizni qobul qilghan sériqbuya baziridiki dukandarlardin biri, roza héyttin bir heptiche burun sériqbuya bazirida gheyriy-resmiy bir jiddiy halet yüz bergenlikini ashkarilidi. Uning déyishiche, shu küni maralbéshi baziridin bir qatar saqchi mashiniliri heywe bilen chiqip kelgen, bu chaghda dukandarlar kochilarni boshitishqa we dukanlargha kirip kétishke buyrulghan. Bixeterlik xizmitini ishlewatqan saqchilar dukandar we ahalilerge bu jiddiychilikning sewebini chüshendürmigen.

Mezkur dukandar, etisi saqchilarning 3‏-ahaliler komitétidiki bir a'ilige jeset tapshurup bergenlikidin xewer tapqan.

Téléfonimizni qobul qilghan 3‏-ahaliler komitétining bir xadimi, özining buningdin  40 kün awwal bir a'ilige ölüm petisini nazaret qilish üchün barghanliqini ashkarilidi. Uning déyishiche, ölgüchining ismi memettursun metniyaz bolup, yéshi 55-60 arisida iken.

Maralbéshidiki yene bir saqchixana xadimi, roza héytning aldida bir türküm jesetlerning tarqitilghanliqini tilgha alghan bolsimu, emma jesetlerning sani, menbesi we ölüm sewebi heqqide melumat bérelmidi.

Mezkur ahaliler komitéti xadimining déyishiche, motsiklit rémontchisi memettursun metniyazning jesiti tumshuq türmisidin élip chiqilghan. U ilgiri hej ibaditini ada qilghanliqi üchün, 2017-yili tutulghan we türmide jaza mudditini ötewatqan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.