"4-Nöwetlik istratégiye muhakime yighini" gollandiyede échildi

Ixtiyariy muxbirimiz erkin tarim
2019-11-18
Élxet
Pikir
Share
Print
Merkizi enqerediki Uyghur tetqiqat institutining uyushturushida, gollandiyening amstérdam shehiride échilghan "4-Nöwetlik istratégiye muhakime yighini" korunush. 2019-Yili noyabir.
Merkizi enqerediki Uyghur tetqiqat institutining uyushturushida, gollandiyening amstérdam shehiride échilghan "4-Nöwetlik istratégiye muhakime yighini" korunush. 2019-Yili noyabir.
RFA/Erkin Tarim

Xelq'arada Uyghur mesilisining yüksilishige egiship dunyaning her qaysi jayliridiki Uyghurlar bundin kéyin dunya weziyitide qandaq özgirish bolidighanliqi, bundaq bir weziyet özgirishining dunya weziyitige körsitidighan tesiri, bundaq bir weziyette Uyghurlarning némilerni qilishi kérekliki toghrisida bash qaturmaqta.

Bu heqte muzakire élip bérish üchün gollandiyening amstérdam shehiride "4-Nöwetlik istratégiye muhakime yighini" ötküzüldi. Yighinni merkizi enqerediki Uyghur tetqiqat instituti uyushturghan bolup, gollandiyediki yawropa sherqiy türkistan ma'arip jem'iyiti sahibxaniliq qilghan. Yighin'gha kanada, awstraliye, gérmaniye, gollandiye, shiwétsiye we türkiyedin bolup 17 mutexessis we bezi chong ammiwi teshkilatlarning mes'ullirimu ishtirak qildi.

Yighinni uyushturghan merkizi enqerediki Uyghur tetqiqat instituti mudiri, tarixchi doktor erkin ekrem ependi yighinda xelq'ara weziyet toghrisida muzakire élip bérip, Uyghur dewasida némilerni qilish kérekliki toghrisida pikir birliki hasil qilin'ghanliqini bayan qildi.

15-Noyabirdin 18-noyabir künigiche dawamlashqan yighinda mewjut xelq'ara sistéma we dunya tüzümidiki özgirishler, iqtisad we soda, mudapi'e we qorallinish, xewpsizlik mesililiri, yüksiliwatqan xitay we xelq'ara sistéma, yéngi dunya tüzümi, yüksiliwatqan xitayning xelq'ara sistéma we dunya tüzümige körsitiwatqan tesirliri, xitayning rayon xaraktérlik we dunya xaraktérlik tesirliri, xelq'ara weziyettiki özgirishler we chet'ellerdiki Uyghur teshkilatliri, nöwettiki weziyette Uyghurlar qandaq ishlarni qilishqa bolidu? dégen'ge oxshash témilarda pikir bayan qilinip, muzakire élip bérildi.

Gollandiyening amstérdam shehiride chaqirilghan "4-Nöwetlik istratégiye muhakime yighini" gha dunya Uyghur qurultiyi re'isi dolqun eysa ependimu alahide teklip boyiche qatnashti. Dolqun eysa ependi ziyaritimizni qobul qilip, mezkur yighinda d u q pa'aliyetliride paydilinishqa tégishlik pikirlerning otturigha qoyulghanliqini, gerche qarar maqullanmighan bolsimu Uyghur dewasigha yol körsitidighan qimmetlik oy-pikirlerning peyda bolghanliqini bayan qildi.

Istanbulda pa'aliyet élip bériwatqan sherqiy türkistan ma'arip we hemkarliq jem'iyiti re'isi hidayetulla oghuzxan ependi 4 qétimliq istratégiye yighinining hemmisige ishtirak qilghanliqini, bu qétimqi yighinning burunqi yighin'gha oxshimaydighan yighin bolghanliqini bayan qildi.

"4-Nöwetlik istratégiye muhakime yighini" gha sahibxaniliq qilghan merkizi gollandiyening amstérdam shehiride turushluq yawropa sherqiy türkistan jem'iyiti re'isi abduraxman abdullah ependi yighinning muweppeqiyetlik ötkenlikini éytti.

Istratégiye muhakime yighinining birinchi nöwetliki shimaliy siprush türk jumhuriyitining girne shehiride, ikkinchi qétimliqi bolsa gérmaniyening bérlin shehiride, üchinchi nöwetliki bélgiyening paytexti biryussélda chaqirilghanidi.

Toluq bet