Almatada yash‏-ösmürlerning boks musabiqisi ötküzüldi

Ixtiyari muxbirimiz oyghan
2017-05-12
Share
Boks-musabiqisidin -korunush   Boks musabiqe meydanidin bir körünüsh, 2017 - yili 8-may
RFA/Oyghan

8-Mayda almata shehiride yash-ösmürler arisida uyushturulghan jumhuriyetlik 12-qétimliq boks musabiqisi ayaqlashti. Musabiqini qazaqistanning "Dinamo" tenheriket jem'iyiti, almata sheherlik hakimchiliqi we ichki ishlar bashqarmisi bilen birlikte uyushturghan. U qazaqistan weten himayichiliri küni hem sowét-gérman urushining ayaqlashqanliqining 72 yilliqi, shundaqla  urush qehrimani mesim yaqupof xatirisige béghishlandi. Besh kün'ge sozulghan mezkur musabiqige 300 din oshuq  qiz-yigit qatnashti. Bokschilar asasen almata shehiri we almata wilayitining, shundaqla taldiqorghan, taraz sheherlirining her xil boks kulublirining wekilliri.

Musabiqe uyushturghuchilirining biri, qazaqistanning boks boyiche xizmet körsetken trénéri rehim sidiqofning éytishiche, mundaq musabiqiler her yili ötküzülüp, uning qatnashquchiliri barghanséri köpeymekte. Deslep qétim boks musabiqisi almata shehirining sultanqorghan mehelliside orunlashqan mesim yaqupof namidiki ottura mektepte ötküzülgen. R. Sidiqof mezkur musabiqilerning uyushturulush meqsiti heqqide toxtilip, mundaq dédi: "Birinchi nöwette, balilar arisida  öz xelqining tarixini bilish, uninggha hörmet bilen qarash, urushta bolghan ata-bowilirini qedirlesh we ularni untumasliq oxshash ishlarni teshwiq qilish. Shundaqla biz bu arqiliq balilarni yaman adetlerdin saqlash hem jem'iyetning aktip puqraliri qilip yétildürüsh oxshash meqsetlernimu közlewatimiz. Biz almata shehirining ichki ishlar organliri bilen birlikte "tenheriketke yol" programmisi boyiche mejruh balilargha, yitim-yésirlargha, turmushi nachar a'ililerge béghishlan'ghan xeyrixahliq pa'aliyetlirini ötküzüwatimiz. Köpinche ene shundaq a'ililerdin dangliq bokschilar chiqidu. Mesilen, almataliq walériy rachkof dunya chémpiyoni bolghan tunji qazaqistanliq bokschi bolup, u yitim balilar öyide terbiyilen'gen. Mundaq balilar özlirining tirishchanliqi bilen ter töküp, ene  shundaq utuqlargha yétidu."

R. Sidiqof mezkur musabiqige köpligen dangliq bokschilarning méhman bolup kelgenlikini, shularning arisida Uyghur bokschisi, sowét ittipaqining ikki qétimliq chémpiyoni atalghan abduréshit abdraxmanofningmu kelgenlikini alahide tekitlidi.

Qazaqistanliq bokschilar ichidin birinchilerdin bolup "Xelq'ara derijidiki tenheriket mahiri" atalghan a. Abdraxmanof radiyomiz ziyaritini qobul qilip, qazaqistan musteqil bolghandin buyan yash bokschilargha alahide ghemxorluq körsitiliwatqanliqini ilgiri sürüp, mundaq dédi: "Hemme nerse ularning özlirige baghliq. Hazir körüwatimizki, tebi'itidin talantliq balilar ösüp kéliwatidu. Shundaqla ularning kélechiki trénérlarghimu baghliq. Ular balilarning qabiliyitini yaxshi bilishi, chüshinishi kérek. Baligha bashtinla durus xet yézishni ügetmise, ömrining axirighiche xetni eski yazidighan bolidu. Boksmu xuddi shuninggha oxshash. Shuning üchün yaxshi boks mektipi lazim."

Almatada ötken musabiqige Uyghurlar zich olturaqlashqan yézilardinmu  köpligen yash bokschilar qatnashti. Emgekchiqazaq nahiyisining paltiway yézisidiki boks kulubining trénéri perhat rozibaqiyéfning éytishiche, bu yerdin 15 adem qatniship, ulardin 36 we 40 kilogram salmaqta ikkisi üchinchi, ikkisi ikkinchi orunni égilep, ikki bokschi chémpiyon ataldi. U musabiqe heqqide toxtilip, mundaq dédi: "Musabiqidin alghan tesirat intayin yuqiri, yuqiri derijide uyushturulghan, adil bahalandi. Bu musabiqe urush qatnashquchiliri xatirisige béghishlan'ghan, chünki biz mushuning bilen yashawatimiz. Biz mesim yaqupof oxshash qehrimanlirimizni untumasliqimiz kérek. Men shundaq musabiqilerni ötküzüwatqinidin xushalmen. Men shundaqla bu musabiqige köpligen Uyghur baliliriningmu qatnishiwatqanliqidin xursenmen. Balilargha trénér bolup ishlewatqinimgha toqquz yil boldi. Bu waqit ichide bizdin sekkiz bala qazaqistan boyiche aldinqi orunlarni aldi. Balilarning ichide her xil millet wekilliri bar."

Emgekchiqazaq nahiyisining qaraturuq yézisidin 12 bokschi kelgen bolup, ularning trénéri nur'exmet raziyéf alte tenheriketchining üchinchi orunni, bir bokschining ikkinchi orunni égiligenlikini bildürüp, mundaq dédi: "Biz yéza balilirini boksqa chaqirimiz. Bizdinmu yaxshi bokschilar chiqiwatidu. Mesilen, "astana arlans" kulubidin dilmurat mijitof chiqip kéliwatidu. Ümidimiz ene shu. Biz Uyghur baliliridin olimpik, dunya chémpiyonlirini chiqirish üchün emgek qiliwatimiz. Men qaraturuq yézisida 2000-yildin bashlap balilarni meshiqlendürüwatimen. Yigirme nechche bala bar. Ular oblast, jumhuriyet boyiche orunlarni élip kéliwatidu."

N. Raziyéfning éytishiche, uning kulubida on yashtin on besh yashqiche bolghan balilar terbiyiliniwatqan bolup, ularning arisida tenheriketning ushu-senda, kik-boks, yekmu-yek küresh oxshash türliridinmu talantliq balilar yétilip chiqiwatmaqta. U shundaqla mezkur musabiqige kelgen dangliq Uyghur bokschisi abduréshit abdraxmanofqa minnetdarliqini bildürüp, köpligen balilarning uning qolidin mukapatlar élip, buningdin qattiq pexirlen'genlikini otturigha qoydi.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet