127 яшлиқ алмихан сейит ана дуня мәтбуатлириниң диққитини чәкмәктә

Ихтиярий мухбиримиз қутлуқ
2013-08-31
Share
almixan-ana-127-yashliq-2-305.png 127 яшлиқ алмихан сейит ана
AFP


Хитай мәркизи телевизийә истансиси 8-айниң 28-күни 127 яшлиқ хитайдики әң узун өмүр көргүчи алмихан сейитниң аниниң иш паалийәтлирини тонуштуруп, униң дуня җинс рекортиға өзини илтимас қилиш арзусиниң барлиқини елан қилған.

Шу күни японийә телевизийә қаналлири, асия хәвәрлири қатарлиқ телевизийә қаналлирида алмихан сейит аниниң узун өмүр көрүш тоғрисида бәс муназириләр башланди.

Мәзкур программидин вақип болған японийәдики уйғур сиясий актиплиридин гүлистан ханим 127 яшлиқ алмихан сейит аниниң узун өмүр көрүши һәққидә өзиниң қарашлирини баян қилип өтти.

Японийә телевизийә қаналлириниң хитайниң мәркизи телевизийә истансисиниң тарқатқан хәвиридин нәқил елинған хәвиридә алмихан сейит аниниң турмуш адәтлири тонуштурулғандин кейин көплигән японларда японларға охшимайдиған униң турмуштики йемәк-ичмәк адитидә гөшни көп истемал қилишидәк адити японларда күчлүк инкас қозғиди.

Бу һәқтики телевизийә программисини көргән йеши атмиштин ашқан японийәлик ямагаҗо әпәндим өзиниң қарашлирини баян қилип мундақ деди: мениң анам һазир сәксән бәштин яштин ашти, әмма пәқәтла гөш истемал қилмайду. японийәдә адәттә кишиләр йеши әлликтин ашқандин кейин гөшсиз йемәкликләрни йейишкә көпрәк йейишкә әһмийәт бериду. Әмма 127 яшлиқ уйғур аниниң гөшни көп истемал қилиши бәлким шу йәрниң һава килимати билән мунасивәтлик болуши мумкин дәп ойлаймән. Шундақтиму бу әһвал японлар үчүн толиму ғәлитә туюлиду.

Сәуди әрәбистандин чиқидиған “әрәб хәвәрлири” гезитиниң 29-авғусттики санидики хитайниң мәркизи телевизийә истансисиниң чаршәнбә күндики хәвиридин нәқил елинған хәвиридә, хитайдики әң узун өмүр көргүчи уйғур аял алмихан сейит шинҗаңниң қирғизистанға йеқин чегра райони қәшқәрдә туғулған. Бу йил 127 яш. У, 1886-йили 6-айниң 25-күни туғулған. Дейилгән.

“әрәб хәвәрлири” гезитидә шинҗаңниң һөкүмәт тор бетидин елинған,“у туғулған вақит гровер клевеланд америкиға президент болған, вилям гландстон әнглийәгә баш вәзир болған дәврләргә тоғра келиду” дегән нәқилму көрситилгән.

Әрәб хәвәрлири гезитидә:“хитайдики узун өмүр көргүчиләр адәттә хәлқарада етирап қилинмайду. Сәвәби уларда ишәнчлик мәнбә йоқ. Хитай дөлитидә пәқәт 1949-йили хитай компартийиси һоқуқни қолға алғандин кейинла уларда туғулған бовақларға испатнамә бериш түзүми йолға қойған” дейилгән.

Хәвәрдә йәнә:“хитайдики узун өмүр көргүчи алмихан сейит аниниң туғулған вақти шинҗаңға яқуб бәг һөкүмранлиқ қиливатқан, шундақла русийә шинҗаңниң бир қисмини башқуруватқан вақитқа тоғра келиду” дейилгән.

Хитайда чиқидиған “җәнубий шәһәр почтиси” хәвиридиму,127 яшлиқ хитайдики узун өмүр көргән уйғур ана алмихан сейитниң өзи җәмәтиниң 56-әвлади икәнликини, униң яз вә қиш соғуқ су ичидиғанлиқи, гөшни көп истемал қилидиғанлиқи, сода-сетиқ қилиш, базарға беришни яхши көридиғанлиқини, униң муһәббәт нахшилирини яқтуруп аңлайдиғанлиқини билдүргән.

Хәвәрдә алмихан сейит аниниң өй ишлирини қилиштин башқа от үзүш вә балларға қараштәк аилә ишлиридиму җанлиқ икәнликини көрсәткән.

Хәвәрдә дейилишичә дуня җинс рекорти комитетиниң хитайдики вәкили чарлес,“һазирчә алмихан сейитниң җинс рекортиға илтимас қилиш тәклипини қобул қилимиз. Җинс рекотидики узун өмүр көргүчиләрдин франсийилик җеанне чалмент болуп, у 122 яшта иди. Һазирчә җинс рекортидики әң узун өмүр көргүчи вә һаят киши японийилик 115 яшлиқ мисао окава ханим. Шуңа биз һазирчә алмихан сейитниң өмүрниң тоғурлиқини турғузушқа амалсиз, биз алди билән тезликтә униң тәклипини тапшуруп алғандин кейин, кәлгүсигә үмид билән қараймиз,"дегән.

Иреландийә чиқидиған “ иреландийә вақит” гезитидә: “127 яшлиқ алмихан сейит узун өмүр көрүш хәлқара җинс рекортиға илтимас қилди. У хитайдики шинҗаңниң қәшқәр дегән йеридә, чиң суласи дәвридә туғулған 17 йешида ятлиқ қилинған һазирчә 40 нәччә нәвриси бар. Соғуқ суни көп ичиш, нахша аңлаш вә чақчақни яхши көрүши униң узун өмүр көрүшиниң сири болса, йәнә бир сири униң балларни яхши көрүшидин болуши керәк” дәп көрсәткән.

Ундин башқа чәтәлдики кәплигән телевизийә истансилири алмиханниң юрти қәшқәргә берип униң күндилик турмуш адәтлирини зиярәт қилған.

Уйғур ана алмихан сейитниң узун өмүр көрүши һәққидә өзиниң қарашлирини баян қилған японийәдики уйғур зиялийси доктор турмуһәммәт һашим бу һәқтә тохтилип өтти.

Аваз улинишидин тәпсилатини аңлаң.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт