Ғулҗидики деһқанлар: “бина өйләр сақ қалди, топа өйләр өрүлди” (1)

Мухбиримиз әзиз
2015.11.23
Share on WhatsApp
Share on WhatsApp
su-apiti-ili-derya-wadisi-7.jpg Или вилайитиниң или дәряси вадисидики бәш наһийидә қара ямғур йеғип, кәлкүн апити йүз бәргән. 2015-Йили июн.
Social Media

Хитайдики һөкүмәт тәрәп мәнбәлиридин бири болған “хитай хәвәрлири тори” дин мәлум болушичә, 13-ноябирдин 22-ноябирға қәдәр или вадисида тохтимай яғқан қар арилаш ямғур түпәйлидин еғир һөлчилик вә кәлкүн апити йүз бәргән. Һөл-йеғин миқдари тарихтики әң юқири чәккә йәткән болуп, 108 миллиметирдин ашқан. Игилишимизчә, бу қетимқи апәт буниңдин төт ай бурунқи бир һәптилик уда ямғур йеғиш сәвәбидин келип чиққан һөлчилик вә кәлкүндин кейин бу районда йүз бәргән охшаш характерлик иккинчи қетимлиқ апәт икән. Охшимайдиғини алдинқи қетимлиқ апәт һава иссиқ болған яз мәзгилидә көрүлгән болса, бу қетимқиси қиш пәсли башлинип һава совуп кәткән бир вақитта йүз бәргән, шундақла бу қетимқи апәт җәрянида боранму узақ вақит давам қилған. “или хәвәрлири тори”ниң мәлуматлириға асасланғанда, бу қетимқи апәтниң биваситә зийиниға учриған амма 80 миңдин ашидиған болуп, йәттә миңға йеқин аилиниң 15 миң еғиз өйи өрүлүп чүшкән. Биваситә иқтисадий зиян хәлқ пули һесабида бир милярд сомға йәткән. Биз бу һәқтики алақидар әһвалларни игиләш үчүн бир қисим йәрлик аһалә билән телефон арқилиқ сөһбәтләштуқ.

Зиярәт җәрянида биз ямғурниң әһвалини сориғинимизда, йәрлик кишиләр ямғурниң һазирму йеғиватқинини, конирақ бина өйләрниң көпинчисидин тамчә өтүватқанлиқини, шундақла бир қисим топа өйләрниң өрүлүп чүшкәнликини баян қилди.

Шундақла мушу җәрянда ямғур түпәйлидин өрүлгән өйләрдә олтуруватқанларниң асасән дегүдәк деһқанлар икәнлики, бу өйләрниң һәддидин зиядә конирап кәткәнлики мушу қетимлиқ һөлчиликтә өрүлүп чүшүшкә сәвәб болғанлиқи айдиңлашти.

Мушу хилдики зиярәт арқилиқ шәһәр мәркизи вә униңға йеқин җайлардики бина өйләрдә олтуруватқанларда бу хилдики әһвалниң асасән көрүлмигәнлики, ямғур сәвәбидин йүз бәргән һөлчиликниң биваситә зийиниға учриғучиларниң лай өйләрдә олтурушлуқ деһқанлар вә кона бина өйләрдә олтуруватқанлар икәнлики мәлум болди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.