"Men kalman" kitabi türkiyede tunji nöwetlik bir xelq'araliq yighinning échilishigha seweb boldi

Muxbirimiz gülchéhre
2018-04-16
Élxet
Pikir
Share
Print
"Kalman sindromi" késelliki heqqide türkiyede tunji nöwetlik ilmiy muhakime yighinida abduraxman öztürk ependi muxbirlarning ziyaritini qobul qilmaqta. 2018-Yili 14-aprél, türkiye.
"Kalman sindromi" késelliki heqqide türkiyede tunji nöwetlik ilmiy muhakime yighinida abduraxman öztürk ependi muxbirlarning ziyaritini qobul qilmaqta. 2018-Yili 14-aprél, türkiye.
RFA/Gülchéhre

"Kalman sindromi" késelliki heqqide türkiyede tunji nöwetlik ilmiy muhakime yighini, 14-aprél küni istanbulning émirgan rayonidiki zésit yighin zalida bolup ötti. Bu xelq'araliq yighin'gha, türkiyediki "Kalman sindromi" késellik mutexessisliri, amérika we yene bashqa döletlerdiki bu késel heqqide tetqiqat élip bériwatqan rohiy késellikler doxturliri we mutexessisler, bu xil késellik bimarliri we bir qanche nopuzluq axbarat agéntliqlirining muxbirliridin bashqa yene yaponiye, türkiyening bir qisim saxawetchiliri hem fondi jem'iyetlerning wekilliridin bolup 70 etrapida kishi ishtirak qilghan.

Yighinning bash uyushturghuchisi, ijtima'iy alaqiler shirkitide pa'aliyet mudiriliqini atquruwatqan zhurnalist duygu xanim, "Kalman sindromi" témisida mundaq bir xelq'araliq yighinning türkiyede tunji qétim échilishigha abduraxman öztürk ependining "Men kalman" namliq türkche yézilghan kitabining seweb bolghanliqini bildürdi. Duygu xanim yene mezkur eserning bir "Kalman sindromi" bimarining özining késili heqqide türkiyede neshr qildurghan tunji kitab bolush süpiti diqqet qozghighanliqini, 5 aydin artuq teyyarliqtin kéyin yighinning muweppeqiyetlik échilghanliqidin bekmu memnun bolghanliqini bayan qildi.

Duygu xanim yighin programmisi heqqide chüshendürüsh bérip, yighinning ehmiyitining zor ikenlikini, bolupmu abduraxman öztürk we bir qanche kalman késili bimarlirining yighinda, özlirining bu xil késellik bilen yashap, bu késel seweblik uchrighan rohiy bésimlarni yéngish jeryanliri heqqide söz qilip, özlirining, hayatta küchlük turushi kéreklikini anglatqanliqini körsetti. U: "Bu xil késellik sewebidin özini perqliq yaki töwen körüsh psixikisi shekillendürüwalghan kishilerning chüshinishke we köngül bölüshke mohtajliqini anglitish türkiye jem'iyitide zor bir bösüsh" dep baha berdi.

Duygu xanimning bildürüshiche, "Chüshining, chüshendürüng we yardem qiling" dégendek basquchlar boyiche dawam qilghan bir künlük bu yighinda, deslep amérika boston institutining "Kalman sindromi" késelliki tetqiqati boyiche mutexessis, doktor andré'e dwayér bilen hemkarlishiwatqan né'il simit, "Kalman sindromi" késellikining dunya miqyasida az uchraydighan késel bolupla qalmay, belki dawalash sahesi üchünmu téxi dawamliq tetqiqatlar élip bériliwatqan bir xil tughma irsiyet késelliki ikenliki shundaqla uning bimargha élip kélidighan psixikiliq selbiy tesirliri heqqide qisqiche chüshendürüsh bergen.

Ijtima'iy sahelerge meblegh salghuchi, yeni mezkur yighinining échilishida asasliq iqtisadni temin etken yaponiyelik saxawetchi furuséyi mamiko xanim teklip bilen söz qilip, bu xildiki az uchraydighan késellik tetqiqati we bimarlar üchün jem'iyetni köplep ehmiyetlik xizmet qilishqa chaqirghan.

Axirda yene méditsina we ijtima'iy sahediki mutexessisler, "Kalman sindromi" bimarlirigha emeliy yardemlerni qilish, bu késellik tetqiqati üchün emeliy pilanlarni tüzüsh, mexsus jem'iyet we fondlar qurush heqqide pikir teklipler bergen hem meslihetler élip barghan.

Duygu xanim bu "Kalman sindromi" késelliki tetqiqati we bimarliri üchün bir yaxshi bashlinish ikenliki, buningdin kéyin yene bu heqte mexsus témidiki pa'aliyetlerning élip bérilidighanliqini tilgha élip ötti.

Türkiyedin yighin'gha qatnashqan doxtur exmetjan polat ependi, yighinning ehmiyitige yuqiri baha berdi, shundaqla mezkur késellik heqqide qisqiche chüshendürüsh berdi.

Mezkur yighinning échilishigha türtke bolghuchi, özining "Kalman sindromi" bimari ikenlikini étirap qilip türkiyede tunji qétim bu heqte kitab yazghan rézhissor abduraxman Uyghur öztürk ependi ziyaritimizni qobul qilip, gerche özi 25 yil özini kemtük hés qilip bu késelning azabini tartip yashighan bolsimu, biraq bu késelge giriptar bolghandin kéyin özide bolghan özgirishlerni bashqilargha bildürüsh üchün we kishilerni anche tonushluq bolmighan mezkur "Kalman sindromi" késelliki heqqide deslepki tonushqa ige qilishtin sirt yene bu xil késellik bimarlirining ümidlik yashishigha ilham bérish istikide bu yighinni uyushturghanliqini bildürdi.

Abduraxman ependi yene özining Uyghur qérindashliridin gerche özi bu xil késelge muptila bolmighan bolsimu, emma "Kalman sindromi" késelliki heqqide chüshenchige ige bolushini, shu xil késelning azablirini chékiwatqanlarning özi we jem'iyetke toghra yüzlinishide insaniy yardemde bolushini ümid qilidighanliqini ipadilidi.

Yighindiki mutexessislerning bergen doklatlirida, gerche "Kalman sindromi" dep atilidighan kem uchraydighan bu késellik, irsiyet xaraktérlik tughma kemtüklük bolsimu, nöwette bu késellikni dawalash jehette bösüsh xaraktérlik tereqqiyatlar körülüwatqanliqi otturigha qoyulghan. Mutexessisler bu késellikni baldur bayqash we muntizim klinikiliq dawalashtin kéyin, bimarlarda késellik alametlirining pütünley ghayib bolush we perzent körüsh éhtimalliqining barliqini misal élip ötken.

Toluq bet