Abduraxman Uyghur öztürk türkiyede "Kalman sindromi" üchün fondi qurush iltimasi sun'ghan

Muxbirimiz gülchéhre
2018-04-19
Élxet
Pikir
Share
Print
Tunji qétim échilishigha türkiyediki kino rézhissori abduraxman öztürk ependi(ongdin birinchi)ning "Men kalman" namliq kitab seweb bolghan "Kalman sindromi" témisidiki xelq'araliq yighindin körünüsh. 2018-Yili aprél, türkiye.
Tunji qétim échilishigha türkiyediki kino rézhissori abduraxman öztürk ependi(ongdin birinchi)ning "Men kalman" namliq kitab seweb bolghan "Kalman sindromi" témisidiki xelq'araliq yighindin körünüsh. 2018-Yili aprél, türkiye.
RFA/Gülchéhre

Ötken shenbe "Kalman sindromi" témisida türkiyede tunji xelq'araliq yighin échildi. Mezkur yighinning échilishigha türkiyediki kino rézhissori abduraxman öztürk ependining "Men kalman" namliq kitabi seweb bolghan idi.

Yighinning muweppeqiyetlirimning biri bolsa abduraxman öztürk ependi we mezkur yighinining échilishini iqtisadiy jehettin qollighan yaponiyelik saxawetchi furusi mamiko xanim hemde yighin'gha qatnashqan tébbiy mutexessisler birlikte, türkiyede "Kalman sindomi" késellikini dawalash qatarliq xizmetler üchün xelq'araliq fondi qurushqa iltimas sun'ghan. Mubada bu fondi jem'iyetning qurulushi ishqa ashsa, bu "Kalman sindromi" üchün türkiyede qurulghan tunji fondi jem'iyet bolup qalidiken.

Türkiyede yashawatqan Uyghur rézhissor abduraxman Uyghur öztürk ependining teshebbusi bilen "Kalman sindromi" késelliki heqqide istanbulda échilghan xelq'araliq yighinning bash uyushturghuchisi, programma mudiri duygu xanim, "El alem", we "B fikir" shirketlirining hemkarliqida uyushturulghan bu yighinda méditsina we ijtima'iy sahediki mutexessisler, erlerde 10 de bir, ayallarda 50 ming de bir, irsiyet xaraktérlik hormon kemtüklüktin bolidighan "Kalman sindromi" késellik tetqiqati heqqide intayin ehmiyetlik tetqiqat maqalilirini sun'ghanliqini bildürdi. U yene yaponiyelik psixologiye doktori takakusa mamoru ependining yighinda kalman késelliki we uning psixikiliq alametliri témisida ilmiy tetqiqat maqalisini sun'ghanliqini alahide tilgha élip, kalman bimarlirining dawalinip saqiyalmighanlirining sewebining eslide, purash iqtidarini yoqitish bilen bashlinidighan özidiki perqliq alametlerni waqtida bayqiyalmasliqi we yoshurushi ikenliki, emeliyette baldur bayqap, baldur dawalash élip barghan bimarlarning saqiyidighanliqi heqqidiki misallirining, "Bu xil késellik bilen yashawatqan we nurghun rohiy azab tartiwatqan bimarlarghila ümid béghishlaydu", dep ishinidighanliqini ipadilidi.

Biz yaponiyedin mezkur yighin'gha qatnishish üchün türkiyege kelgen doktor takakusa mamoru ependini téléfon arqiliq ziyaret qilduq. U kishi "Kalman sindromi" késelliki heqqide qisqiche chüshendürüsh bergendin kéyin, bu késelni dawalashta, bimarning özidiki alametlerni balaghetke yétishtin burun, qanche baldur bayqap dawa izdishining, shundaqla rohiy tosalghuni yéngishining halqiliq rol oynaydighanliqini tekitlep ötti.

Yighinning programma mudiri duygu xanim yene yighinning eng muhim netijisining "Kalman sindromi" fondi jem'iyitining türkiyede qurulushi üchün iltimas sunulghanliqi ikenlikini bildürdi. U yene mubada, aldimizdiki aylarda bu iltimas qobul qilinsa buning mezkur sahede xelq'aradimu tunji fondi jem'iyet bolup qalidighanliqi heqqide uchur berdi.

"Kalman sindromi" témisida échilghan mezkur xelq'araliq yighin, türkiyediki kino rézhissori shundaqla özimu kalman késelliki bilen yashap kelgen abduraxman Uyghur öztürk ependining teshebbusi we shundaqla yaponiyening "Pilatinum wu wu shirkiti" sahibi, ijtima'iy sahelerge meblegh salghuchi we dangliq saxawetchi furusé mamiko xanimning iqtisadiy yardimi bilen royapqa chiqqan bolup, biz bu yighinning échilishi we qurulghusi "Kalman sindromi fondi jem'iyiti" ni iqtisad bilen temin etküchi mamiko xanimni ziyaret qilduq.

U özining kalman késelliki bilen tonushushining, eslide Uyghur bolghan hazir türkiyede yashawatqan rézhissor abduraxman Uyghur bilen tonushush bilen bashlan'ghanliqini éytti we shundaqla "Kalman sindromi fondi jem'iyiti" qurushqa iltimas qilghanliqini, buning aldimizdiki 7- aylarda emelge éshishi mumkinlikini bildürdi.

Rézhissor abduraxman Uyghur öztürk ependining "Men kalman" namliq kitabi 2018- yili, yil béshida yoruq körgendin buyan türkiye jem'iyitide we kalman tetqiqati élip bériwatqan mutexessislerde zor qiziqish qozghighan.
Rézhissor abduraxman ependi kéyin yene bu heqte kino ishlesh pilanliri üchün izdenmekte iken.

Toluq bet