Aratürk nahiyesining nom yézisi gu'angxuy guruhi qurghan ximiye zawutining éghir bulghishigha duch kelgen

Muxbirimiz qutlan
2015.08.13
guanghui-gwangxuy-goruhi-araturk-bulghanghan-su.jpg Gwangxuy guruhi aratürk nahiyesining nom yézisigha qurghan ximiye zawutidin qoyup bériliwatqan kislataliq paskina su (menbe: ijtima'iy taratqu, 2015-yil awghust)
Social Media


Yéqinda aratürk nahiyesining nom yézisidiki yerlik Uyghurlar ündidar qatarliq ijtima'iy taratqulargha inkas yézip, yurtidiki muhit bulghinishidin shikayet qilghan.

Melum bolushiche, gu'angxuy guruhi nom yézisida achqan kömür we néfit pishshiqlap ishlesh zawutidin tinimsiz halda kislataliq paskina su qoyup bergen. Uningdin bashqa zawut turxunidin künde qoyup bériliwatqan zeherlik is - tütek nom yézisidiki kéwez we qoghunluqlargha tesir qilipla qalmastin, belki yéza tewesidiki xelqning normal turmushighimu bulghinish élip kelgen.

Bu yil yazdin buyan nom teweside témpiratura biraqla örlep uda 40 giradustin chüshmigen. Zawuttin qoyup bérilgen kislataliq sésiq suning destidin nomdiki xelq shunche issiqta ishik - derizilirini him étip olturushqa mejbur bolghan.

Melumki, nom yézisi aratürk nahiyesidiki meshhur jay. U shimalda monggholiye xelq jumhuriyiti bilen chégralinidu.

Qedimiy tarixqa ige bu yurt qomul wangliqi dewride gunahkarlarni palaydighan lagér bolghan. Kéyinki mezgillerde nom hawasining sap, tupriqining munbet bolushi bilen “Qomul qoghuni” ning ésil sortlirini östürüshtiki asasliq bazigha aylan'ghan.

Halbuki, 1990 - yillarning axirilirigha kelgende, wang léchu'enni arqa tirek qilip zor iqtisadiy paydigha érishken gu'angxuy guruhi aratürk nahiyesidiki bu xilwet yézigha köz qizartqan.

Buning bilen gu'angxuy guruhi bashchiliqidiki birqanchilighan xitay shirketliri arqa - arqidin nom yézisida kan échish hemde kömür we néfit pishshiqlap ishlesh zawutlirini qurghan.

Yerlik xelqning inkaslirigha qarighanda, birqanche yilgha barmayla nom yézisini öz ichige alghan aratürk nahiyeside hawarayining issip kétishi, qurghaqchiliq, éghir derijidiki bulghinish hemde tengritaghliridiki qarliqlardin éqip kélidighan su menbelirining aziyip kétishidek ehwallar körülgen.

Ilgiri aratürk nahiyesining melum yézisida yéza bashliqi bolghan nöwette nahiyelik siyasiy kéngeshte xizmet qiliwatqan bir kadirning bayanliri bu ehwallarni yenimu delilleydu.

Uning bildürüshiche, gu'angxuy guruhi nom yézisida qurghan pishshiqlap ishlesh zawutida türlük ximiyelik mehsulatlar ishlepchiqirilidiken. Zawutning téxnik xadimliridin tartip adettiki ishchilirighiche hemmisini xitay ölkiliridin élip kélin'gen köchmenler teshkil qilidiken.

Nom yézisining melum kentide olturushluq bir Uyghur déhqanmu hawadiki éghir bulghinish destidin kéwez we qoghun mehsulatida chékinish boluwatqanliqini, hetta paxtilarning qaridap kétiwatqanliqini bildürdi.

Nom yézisidiki yene bir péshqedem Uyghur déhqan ziyaritimizni qobul qilip zawutlardin künde kislataliq sésiq su qoyup bérilidighanliqini, xitay shirketlirining öz waqtida “Yer - hökümetning” dégen söz bilenla nomdiki boz yerlerni igilep zawut quruwalghanliqini ashkara qildi.

Aratürk nahiyesige qoshna qomul shehirining tömürti taghliq kentide olturushluq bir Uyghur déhqanmu bu heqte ziyaritimizni qobul qildi. U “Pütün qomul bostanliqini su bilen teminlewatqan qarliq tagh ilgiri bedendiki terdek asta - asta aqqan bolsa, hazir muhittiki buzulush tüpeylidin xuddi tomurdiki qandek érip kétiwatidu,” dégen oxshitish bilen sözini yekünlidi.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.