Qazaqistanning tashkensaz mehelliside yash putbolchilar musabiqisi ötküzüldi

Ixtiyariy muxbirimiz oyghan
2016-05-09
Élxet
Pikir
Share
Print
10-Nöwetlik jumhuriyetlik putbol musabiqiside chémpiyon bolghan gheyret komandisi musabiqe uyushturghuchiliri bilen xatire sürette. 2016-Yili 8-may almata.
10-Nöwetlik jumhuriyetlik putbol musabiqiside chémpiyon bolghan gheyret komandisi musabiqe uyushturghuchiliri bilen xatire sürette. 2016-Yili 8-may almata.
RFA/Oyghan

10-Nöwetlik jumhuriyetlik putbol musabiqisi 7-we 8-mayda almata wilayitining emgekchiqazaq nahiyisige qarashliq Uyghurlar zich olturaqlashqan tashkensaz yézisida ötti. Almata shehiri we almata wilayitidiki mektep oqughuchiliridin terkib tapqan qiriqqa yéqin komandidin tallinip chiqqan sekkiz komanda ikki kün mabeynide mukapatliq orunlar üchün küresh qildi. Emgekchiqazaq nahiyilik hakimchiliqi we "Kéntawr" talantliq tenheriketchilerni qollash fondining uyushturushi, "Inayet"jem'iyetlik birleshmisining qollap-quwwetlishi bilen ötken bu nöwetlik musabiqe sowét-gérman urushidiki ghalibiyetning 71 yilliqigha we Uyghurlardin chiqqan qehriman mesim yaqupof xatirisige béghishlandi. Musabiqige almata shehirining dostluq mehellisi, chélek, tashkensaz, gheyret, chonja we bashqimu yézilarning yash putbolchiliri qatnashti.

Ikki kün dawam qilghan bu musabiqide tashkensaz komandisi üchinchilikni, dostluq mehellisi ikkinchilikni, gheyret komandisi birinchi orunni igilep, her bir komanda alahide longqa we axchiliq mukapatlar, oyunchilar we komanda mes'ulliri pexriy yarliq we médallar bilen teqdirlendi. Buningdin tashqiri alahide közge chüshken putbolchilar we heweskarlarmu mexsus mukapatlargha érishti.

Musabiqining yépilish murasimida sözge chiqqan "Kéntawr" talantliq tenheriketchilerni qollash fondining prézidénti mexmut iskenderof, fondning jawabkar katipi telet hemrayéf, tashkensaz yézisining hakimi muhemmetjan sultaniyarof, "Inayet" jem'iyetlik birleshmisining re'isi hakimjan arupoflar yash putbolchilarning maharitini yuqiri bahalap, qizghin tebriklidi.

Radi'omiz ziyaritini qobul qilghan gheyret komandisining eng yaxshi oyunchisi atalghan nazim hakim hem komanda trénéri rishat imremziyéflar mezkur musabiqidin alghan tesiratlirini bildürdi.

Saghlam hayat ülgisini shekillendürüsh, balilarning salametlikini mustehkemlesh, yash putbolchilarning maharitini kücheytish oxshash meqsetlerni közligen mezkur fond deslepki musabiqini 2007-yili yash-ösmür tenheriketchilirining mexsus mektepliri arisida bashlighan idi. 2010-Yili musabiqe xelq'ara da'iride ötüp, Uyghur élining ürümchi shehiridin kelgen putbolchilar birinchilikni yéngiwaldi. 2011-Yildin bashlap musabiqe almata shehiri we wilayitidiki mekteplerning yuqiri sinip oqughuchiliri arisida ötüp kéliwatmaqta.

Ziyaritimizni qobul qilghan "Kéntawr" talantliq tenheriketchilerni qollash fondining jawabkar katipi telet hemrayéf buningdin on yil ilgiri m. Iskenderofning teshebbusi bilen deslepki qétim jumhuriyetlik medeniyet merkizi namidin yash putbolchilar arisida musabiqe uyushtulghanliqini bildürüp, mundaq dédi: "Birinchi töt yil dawamida bu musabiqini almata shehiride ötküzduq. 4-Musabiqe xelq'araliq boldi. U yili Uyghur aptonom rayoni putbolchiliri birinchi orunni alghan idi. Bizning aldimizgha qoyghan asasiy meqset yashlarni tenheriket bilen terbiyileshtur. Biz töt yildin kéyin musabiqilerni sheherde emes, belki yézilarda ötküzüshni qarar qilduq. Hazir almata wilayiti nahiyeliride ötküzüwatimiz."

T. Hemrayéf on yil mabeynide bu musabiqilerning barliq chiqimlirini m. Iskenderoflar a'ilisining öz höddisige élip kéliwatqanliqini, kéyinki yillarda bu ishni bolupmu "Inayet" birleshmisining sabiq re'isi, merhum turghanjan rozaxunof, ataqliq qazaqistanliq putbolchi ruslan baltiyéfning dadisi tahir baltiyéf we m. Iskenderoflar bilen birliship yürgüzüwatqanliqini otturigha qoydi. Shundaqla t. Hemrayéfning éytishiche, memliket prézidénti nursultan nazarbayéfning "Saghlam jem'iyet, saghlam memliket" dep aldigha qoyghan körsetmisi boyiche yashlarni tenheriket bilen terbiyilesh ishliri keng qanat yaymaqta. Kéyinki waqitlardila putbol musabiqisini ötküzüsh höddisini öz üstige alghuchi Uyghur yurtliri köpiyiwatqan bolup, bu musabiqiler alahide bir medeniy bayram süpitide qobul qilinmaqta.

Toluq bet