3 Yashliq abdullah abduwéli taylandta yerlikke qoyuldi

Taylandta hayatidin ayrilghan 3 yashliq abdullah abduwélining méyiti. 2014-Yili 23-dékabir, tayland.

Taylandta hayatidin ayrilghan 3 yashliq abdullah abduwélining méyit namizi. 2014-Yili 23-dékabir, tayland.

12-Ayning 23-küni yérim kéche sa'et 1:50 de taylandning jenubidiki xatya'i shehiridiki xatya'i doxturxanisida késellik sewebidin alemdin ötken abdullah abduwéli 1-ayning 3-küni chüshtin kéyin son'gkla musulmanlar mazarliqida yerlikke qoyuldi.

3 Yashliq abdullaning tubérkulyoz késelliki bilen taylandning xatya'i shehiridiki xatya'i doxturxanisida qaza qilishi muhajirettiki Uyghur jama'etchilikini chongqur qayghugha chömdürgen idi. Uning méyitini türkiyege élip kélip yerlikke qoyush ümidi, türkiyening taylandta turushluq elchixanisi we Uyghurlar köp tirishchanliq körsetken bolsimu, her xil sewebler tüpeylidin emelge ashmighan. Shuning bilen awstraliyedin kelgen abdusalam alim, türkiyedin barghan abdulqadir tümtürk, abdusalam ablikim we taylandta turushluq abdullah tursun qatarliq kishiler bu heqte muzakire élip bérip 3 yashliq abdullah abduwélini taylandta yerlikke qoyushni qarar qilghan.

3 Yashliq abdullah abduwélining méyiti 3-chésla doxturxanidin chiqirilip, taylandning jenubidiki xatya'i shehirining merkizidiki eng chong meschitte namizi chüshürülgendin kéyin, son'gkla musulmanlar mazirida yerlikke qoyulghan. Türkiyening qeyseri shehiride pa'aliyet élip bériwatqan sherqiy türkistan medeniyet we hemkarliq jem'iyitining wekili abdulqadir tümtürkning éytishiche, abdullah abduwélining jinaza murasimigha yerlik musulmanlar we Uyghurlardin bolup 200 etrapida kishi qatnashqan. Hemme birdek qolini kötürüp, allah, abdullah abduwélining yatqan jayini jennet qilsun dep du'a qilghan.

Abdulqadir tümtürkning éytishiche, hazir taylandtiki türmilerde 365 Uyghur bar bolup, 4 etrapida bala wapat bolghan, hazir yene doxturxanida dawaliniwatqan Uyghurlar bar iken. Eger bu Uyghurlar baldurraq qutuldurulmisa, bu xil ölümler köpiyishi mumkin iken.