Partlashtin kéyin tyenjin préstani urushtin kéyinki xarabilikke aylinip qaldi

Muxbirimiz gülchéhre
2015-08-13
Share
tianjin-tyenjin-partlash-2015.jpg Tyenjin préstanidiki partlash
Wikipedia/Public Domain


Xitay da'irilirining tyenjin binxey yéngi rayonida yüz bergen éghir derijidiki partlash weqesi heqqide tarqatqan eng yéngi axbaratidiki sanliq melumatlargha qarighanda, 13 - awghust sa'et 17:00giche jem'iy 50 adem qaza qilghan, 701 adem doxturxanilargha dawalinishqa apirilghan, buning ichide 71ademning yarisi intayin éghir. Yene nurghun ademning iz - dériki yoq. Hazirghiche weqening kélip chiqish sewebi we partilashning qandaq buyumdin bolghanliqimu éniq emes. Hawadiki bulghinish heqqidimu tekshürüsh dawam qilmaqta, qayta partlash yüz bérish éhtimaldin xali dégilimu bolmaydiken. Xelq'ara axbaratlar, hetta xitay ammisimu ijtima'iy alaqe wasitiliri arqiliq da'irilerning bu weqening emeliy ehwalini yushuruwatqanliqidin guman qilmaqta hemde weqening keltürgen balayi apetlirining xitay axbaratlirida tarqitilghandin éghir bolushi mumkinlikini ilgiri sürmekte.

Bu shiddetlik partlash awazi, urush meydanidin kelgen bombardiman awazi bolmastin 8 - aynng 12 - küni kech sa'et 11 din 20 minut ötkende tyenjin shehiri xelq'ara oborot merkizi rayonigha jaylashqan "Rüyxey" shirkiti qarmiqidiki xeterlik boyumlar iskilatida yüz bergen küchlük partlashning neq meydan awazi.

Xelq'ara axbaratlarda 8 - ayning 13 - küni xewer qilinishiche, xelq'ara ölchemlik waqit 15:00, béyjing waqti kech sa'et 23:00 etrapida, tyenjin binxey yéngi rayonida éghir derijide partlash weqesi yüz bergen. Bu partlashning küchi 21 tonna partlatquch bombining küchige barawer kélidiken.

Bu ariliqta yaponiyining "Aptapperes" 8 - nomurluq sün'iy hemrahi, mtsat - 2 sün'iy hemrahi we koriye koms - 1 sün'iy hemrahi boshluqtin bu qétimqi partlashning infira qizil nur dolquni bölikidiki küchlük issiqliq signalini tekshürgen. Neq meydanda ot uchquni pelekke yétip, 10 kilométir da'iride ichide tewresh sizimi bolghan. Igilinishiche, tyenjin shehiri binxey yéngi rayoni xeterlik buyumlar iskilatida partlash yüz bérishtin burun ot ketken, ot öchürüsh jeryanida arqa arqidin ikki qétim küchlük partlash yüz bérip, nechche on kilométir da'iride turupmu quyuq is - tütekni köreleydighan haletke yetken.

Sarasimide tyenjindiki ammining uyqusi haram bolghan, partlash yüz bergen neq meydan etrapidiki nurghun ahaliler shu küni kéchini kochida ötküzgen. Doxturxanilar toshup ketken.

Xitay da'irilirining shinxu'a torida bu heqte bügün axiriqi qétim tarqatqan axbaratidiki sanliq melumatlargha qarighanda, 13 - awghust sa'et 17:00 giche jem'iy 50 adem qaza qilghan, buning ichide 12 si ot öchürüsh xadimi؛ 701 adem doxturxanilargha dawalinishqa apirilghan, buning ichide 71ademning yarisi intayin éghir. Yene nurghun ademning iz - dériki yoq.

Xitay ammiwi uchur menbeliride tarqalghan süretlik xewerlerde körsitilishiche, partlash neq meydanidin 400 métir yiraqliqtiki 4 - 5 putbol meydanichilik kélidighan aptomobil toxtitish meydanigha toxtitip qoyulghan mingdin artuq yép - yéngi aptomobillar pütünley köyüp, bu aptomobil toxtitish meydani hesh - pesh dégüche aptomobil qebristanliqigha aylinip qalghan.

En'gliye b b s agéntliqi muxbiri neq meydan xewiride, partlashtin kéyinki bu menzirini urushta weyran qilin'ghan haletke oxshitip teswirlidi.

Qizziq yéri, bu pewqul'adde partlash weqesi, chet'el axbaratlirida nuqtiliq xewer süpitide diqqet qozghawatqan bir peytte, xitay metbu'atlirida, bolupmu weqe yüz bergen jayda tarqitiliwatqan téléwiziye programmisida 10 sa'etkiche kino, élan, sen'et kéchilikliri we qisimliq téléwiziye tiyatirlarni qoyulghandin bashqa bu heqte xewer bermigen.

Weqe yüz bergendin kéyin - 13awghust, xitay re'isi shi jinping tyenjin binxey yéngi rayoni xeterlik buyumlar iskilatida yüz bergen partlash weqesige qarita muhim yolyoruq bérip, munasiwetlik karxanilarning rehberlirini kontrol qilishni, ehwalini tézrek kontrol qilip, weqening sewebini tekshürüp éniqlap, mes'uliyiti barlarni qattiq tekshürüshni buyrighan. Emma u özi neq meydan'gha barmighan, xitay axbaratlirining körsitishiche, shi jinping we li kéchyangning körsetmisi boyiche, dölet komissari, jama'et xewpsizliki ministiri go shéngkün gowuyüenning xizmet guruppisini bashlap neq meydan'gha yétip kélip, weqediki qutquzush we jiddiy birterep qilish, weqening sewebini tekshürüsh qatarliq xizmetler jiddiy élip bérilmaqta iken.

Eljezire, b b s qatarliq xelq'araliq axbaratlarning neq meydan'gha ewetken muxbirliri bügün tarqatqan xewerlerge qarighanda, neq meydandin kötürülüwatqan is - tütek sel peseygen bolsimu, téxi pütünley bixeter dégili bolmaydiken, her zaman yene qayta partlash yüz bérish éhtimalidin xali dégilimu bolmaydiken.

13 - Awghust sa'et üch bolghanda ehwal yene yamanlashqan, neq meydandin yene bir qétim küchlük partlash awazi anglinip, sériq we ang renglik is - tütek kötürülgen, yene ikki nuqtidiki ot yenila köyiwatmaqta.

Partlash weqesining tesiride, yéqin etraptiki nurghun ahalilikler olturaq rayoni we ishxana binasi buzghunchiliqqa uchrighan. Tyenjin da'iriliri bügün partlashtin kéyin zeherlik maddilarning kontrol qilin'ghanliqini, téximu kengri muhit bulghinish apetlirining aldi jiddiy élin'ghanliqini, peqet bixeterlik yüzisidin etraptiki 3 rayon tewelikide su we tok waqitliq toxtitilghanliqini uqturghan.

Tyenjin bingxey rayoni bashliqi jang yung axbarat élan qilish yighinida bügün, neq meydandiki qalduq ximiyilik we radi'atsiyilik maddilarni tekshürüsh mashina ademler arqiliq élip bériwatqanliqini, hawa boshluqigha kötürülgen is tütekning qoyuqluq derijisi we uning terkipidiki zeherlik maddilar téxi tekshürüp bolmighanliqini eskertti. Partilash yüz bergen rayonning etrapida su we tok toxtighan, qatnash toxtitilghan. Bir qisim alaqe wastilirimu eslige kelmigen.

Hazirghiche weqening sewebi éniqlanmighan, partlashning qandaq buyumdin bolghanliqimu éniq emes. Ammining ijtima'iy taratqularda tarqatqan uchurlirida weqede ölgen we yaridarlarning sani heqqide perqliq sanliq melumatlar tarqalmaqta. Ammida muhitqa zeherlik maddilar ning yamrishi özlirining hayatigha xeter élip kélishi toghriliq ensizlik dawam qilmaqta.

Chet'el axbaratliri xitay da'irilirining burunqigha oxshashla bu weqening emeliy ehwalinimu yushuruwatqanliqini bildürmekte. Chünki tünügün amérika s n n muxbiri wil ripley Will Riplening tiwétirda tarqatqan uchurigha qarighanda, u doxturxanida partlashta yaridar bolghanlar heqqide neq meydanda xewer bériwatqanda tosqunluqqa uchrighan.

Xitay taratquliri yene bügün da'irilerning tiyenjindiki partlash weqesini köptürüp ighwa tarqatqanliqi seweblik, xongkong kündilik géziti qatarliq tor betlerni qamal qilghanliqini we yene bir qisim bloglarni taqighanliqini élan qildi, emma ularning zadi qandaq mezmunda ighwa tarqatqanliqigha chüshendürüsh bermidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet