Uyghur dewasining aktip qollighuchisi shewket barutju alemdin ötti

Ixtiyariy muxbirimiz erkin tarim
2015-09-22
Share
dolet-baghcheli-shewket-barutju-jinaza.jpg Dölet baghcheli rehmetlik shewket barutju ependining ayaligha sewr tilidi. 2015-Yili 21-séntebir, enqere.
RFA/Erkin Tarim

Türkiyediki sherqiy türkistan ammiwi teshkilatlirining pa'aliyetlirini izchil halda qollap kelgen shewket barutju merhumning jinaza murasimi 21-séntebir küni enqere haji bayram meschitide ötküzülgendin kéyin qarshiyaqa qebristanliqida yerlikke qoyuldi. Merhumning jinaze murasimigha türkiye parlaméntidiki öktichi partiyelerdin milletchi heriket partiyesi re'isi, sabiq bash ministir mu'awini dewlet baghcheli ependi, büyük birlik partiyesi re'isi mustafa destechi ependi, köp sanda parlamént ezaliri, uniwérsitétlarning mudirliri, dewa dostliri we enqerediki Uyghurlar qatnashti.

Uning tawutining üstige türkiyening ay yultuzluq qizil bayriqi bilen sherqiy türkistanning ay yultuzluq kök bayriqi yépilghan bolup, murasimda uning sepdashliri uning 84 yilliq hayatida esir türkiy xelqlerning erkinliki, bolupmu sherqiy türkistan dewasi üchün qoshqan töhpilirini esleshti. Jinaze murasimi axirlashqandin kéyin uning ay yultuzluq türk bayriqi bilen ay yultuzluq kök bayraqqa yögelgen tawutini nöwet bilen mürisige élip kötürüp qarshiyaqa mazarliqida depne qildi.

84 Yashta alemdin ötken shewket barutju pütün ömrini türkiy xelqlerning erkinliki üchün, jümlidin Uyghurlarning dawasi üchün atighan erbab bolup, u, tonulghan Uyghurshunas, köp sanda Uyghur doktorlirini yétishtürgen proféssor sema barutju öz'önder xanimning dadisi idi.

U qandaq bir kishi idi? uning sherqiy türkistan dewasigha qoshqan töhpisi néme? dégen so'allargha jawab tépish üchün sabiq parlamént ezasi proféssor orxan qawunju we hamit göktürk ependiler bilen téléfon söhbiti élip barduq.

Sabiq parlamént ezasi proféssor orxan qawunju ependi, merhum shewket barutju heqqidiki eslimiliri toghrisida toxtilip, uning pütün hayati boyi qérindash türkiy milletlerning erkinliki üchün küresh qilghan bir kishi ikenlikini bayan qilip, rehmetlik shewket barutjuning sherqiy türkistandiki Uyghurlarning weziyitini, iraqtiki türkmenlerning mesilisini, sabiq sowét ittipaqining ishghali astidiki 5 türkiy jumhuriyetni yaxshi bilidighan we ularning erkinliki üchün küresh qilghan kishi ikenlikini tekitlidi.

Proféssor orxan qawunju özining bir türkistanliq a'iliside dunyagha kelgenlikini, emma türkistan dewasini shewket barutju merhumgha oxshash kishilerdin ögen'genlikini éytti.

Rehmetlik shewket barutjuning Uyghur dewasigha qoshqan töhpisi toghrisida köz qarishini élish üchün hamut göktürk ependi bilenmu téléfon söhbiti élip barduq. U, merhumning sherqiy türkistan dewasining türkiyede tonulushi üchün zor töhpilerni qoshqanliqini tekitlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet