Uyghur éli sayahetchilikidiki qalaymiqanchiliq 10 cheklesh bilenla tizginlinemdu?

Kündin-kün'ge köpiyiwatqan sayahetchilerning Uyghur élidiki sayahet pa'aliyitide exlaqsizliq, muhitni asrimasliq, yerlik milletlerning milliy örp-adet we diniy étiqadigha hörmet qilmasliqtek medeniyetsiz qilmishliri, zor muhit bulghinish, buzghunchiliq élip kelgendin sirt, yerlik xelqning naraziliqini, bizarliqini qozghimaqta. Uyghur élidiki shinjang sayahet idarisi, sayahetchiliktiki mushu xil qalaymiqanchiliqlarni tertipke sélish üchün öktebirdin bashlap “Sayahette 10ni cheklesh” charisini yolgha qoyidiken, undaqta da'irilerni bu yéngi charini chiqirishqa mejbur qilghan qandaq mesililer saqlanmaqta, bu 10 türlük chare bilenla Uyghur diyarida sayahetchilikning élip kéliwatqan selbiy tesirlirini tügetkili bolarmu?

Uyghur élide yéqinqi 20 yillardin buyan alahide tebi'iy jughrapiyilik orunlar, güzel menzirilik jaylar, qimmetlik medeniy yadikarliq orunliri, qedimiy sheher xarabiliri, ulughlarning meqbere-büzrükwarliri ishqilip yétip barghili, köz bilen körgili, qol bilen tutqili bolidighanla bolsa, héchnéme qalmay sayahetchilikke échiwétildi we dawamliq échilmaqta. Hazir Uyghur élide dölet a 5 derijilik sayahet ornidin beshi bar... Uyghur diyari az tépilidighan güzel séhirlik zémin, shunga sayahetke baridighan sayahetchilermu köpeymekte. Aldinqi yérim yilda Uyghur éli sayahet rayonliri xitay ichidin kelgen sayahetchidin 21 milyon 627 adem qétim sayahetchi kütüwalghan bolup, bu bulturqi oxshash mezgildikidin 28.73% Köp bolghan. Nöwette, aptonom rayondiki munasiwetlik tarmaqlar sayahet menzire rayonlirigha bolghan sélinmini künsayin köpeytmekte iken.

Yaxshighu! sayahetchilik sahesi tereqqiy qilsa iqtisadiy tereqqiyatqa paydiliqqu? déyishingiz mumkin, shundaq, emma mesile shuki, sayahetchiliktiki medeniyetsizlikning élip kéliwatqan selbiy tesirliri tebi'iy muhit, ijtima'iy we siyasiy muhit bixeterlikigiche kéngeymekte. Medeniy, inaq sayahet muhiti berpa qilish her bir sayahetchining janijan menpe'etige munasiwetlik. Medeniyetlik sayahetchi bolush biz köpchilikning mejburiyiti. Halbuki, Uyghur élidiki yerlik xelqlerning ijtima'iy alaqe wasitiliri, ammiwi tor béketlerdiki inkasliridin melumki, gerche xitayning puqralirigha qaratqan medeniy sayahetchilik belgilimiliride hetta “Bashqilargha qarap chüshkürmeslik”tin tartip diqqet qilishqa tégishlik ishlar heqqide agahlandurush, sayahetchilik qa'idiliri körsitilgen bolsimu, Uyghurlar güzel yurtigha kelgen xitay sayahetchilerning muhit taziliqini qoghdimasliqi, tamaka chékish, haraq ichish men'i qilin'ghan sorunlardimu hetta mazarliq, tawap orunliridimu haraq, sharab ichip exlet qilish, ammiwi tertipke ri'aye qilmay, jama'et sorunlirida warang-churung qilip, shu jaydiki ahalilerningmu normal turmushigha selbiy tesir körsitishi, ékologiyilik muhitni qoghdimay chimliq, del derex,gül we méwilirini üzüp, haywanlarni qoghdash uyaqta tursun, zexm yetküzüsh.Medeniy yadikarliq orunlirigha xet yézip, üstige yamiship, resimge tartqanda belgilimige ri'aye qilmasliq, ammiwi eslihelerni asrimasliq, buzghunchiliq qilish, bashqilarning hoquqigha hörmet qilmasliq, mulazimetchilerning emgikini hörmet qilmasliq, meschitlerge, diniy sorunlargha ixtiyariche kiyip kirip, taziliqqa, ammiwi exlaqqa muxalip heriketlerde bolush arqiliq her millet xelqining diniy we milliy örp-adetlirige hörmet qilmasliqtek qilmishlirigha shahit bolmaqta. Shundaqla sayahetchilerning yurtigha, tebi'etke, ijtima'iy exlaqqa, özlirige élip kéliwatqan yaman tesirliri heqqide süretlik uchurlarni tarqitip ghulghula qilmaqta.

Tengritagh torining 18-séntebir xewirige qarighanda, Uyghur aptonom rayonluq sayahet idarisi, Uyghur éli sayahet saheside mewjut mesililerni yenimu tertipke sélish üchün, Uyghur aptonom rayoni sayahetchilikide 10ni chekleshtin ibaret yéngi belgilimini chiqarghan we bu belgilimini Uyghur élidiki barliq sayahet kopiratipliri we sayahet shirketliri 1-öktebirdin bashlap yolgha qoyidiken, mezkur belgilimilerge xilapliq qilghanlarning tégishlik jazagha tartilidighanliqi agahlandurulghan.

1-Öktebirdin bashlap Uyghur éli sayahetchilik saheside yolgha qoyulidighan 10ni cheklesh da'irisige xitayning sayahet qanunigha yenimu konkrét halda “Sayahetchilerge süpetsiz sayahet xatire buyumlirini satmasliq, qanunsiz halda sayahet orunlashturmasliq” qatarliq sayahet uyushturghuchi orunlargha qarita cheklimilerdin bashqa, sayahetchilerge qarita “Sayahetchilerning, yerlik xelqning örp-adet we diniy étiqadigha muxalip söz-heriketliri, sayahetchilerning sayahet mulazimiti bilen shughullan'ghuchi orun we mulazimlarning xizmitige tosqunluq qilishi, sayahetchilerning yerlik saqchi, amanliq qoghdash da'irilirining xizmitige dexli qilishi qatarliqlarningmu cheklinidighanliqi belgilen'gen.

Da'irilerning Uyghur élining sayahetchilik ishlirini bashqurushta bu 10ni cheklesh charisini chiqirishqa néme mejbur qildi?
Xitayning Uyghur élidiki qimmetlik medeniy yadikarliq orunlirining qara qoyuq échiwétilishini izchil tenqidlep kéliwatqan amérikidiki tarix penliri doktori qahar barat ependi, yerlik xelqning inkasi we sayahetchilerning élip kéliwatqan ré'al buzghunchiliqlirining da'irilerni bu xil 10ni chekleshni yolgha qoyushqa mejbur qilghan bolsimu, emma bu xil tüzülme konkrétlashmay turup, sayahetchilerning sapasi kötürülmey muhimi da'irilerde némini hemmidin bekrek qoghdash aydinglashmay turup, sayahetchilik mushundaq tereqqiy qilip mangsa, uningdin kélidighan eslige keltürgüsiz apetningmu oxshashla chongiyidighanliqini otturigha qoydi.

Shinjang iqtisad géziti xewirige qarighanda, yilda bir ötküzülidighan junggo shinjang xelq'ara alahide sayahet bayrimi 1-öktebir bashlinidighan bolup, 4-qétim ötküzülidighan bu bayramgha bu yil eslidiki jenubiy shinjang liniyisi asasida yéngidin shimaliy shinjang liniyisi qoshulghan.

1-Öktebirdin 6-öktebirgiche ötküzülidighan bu nöwetlik bayram jeryanida “Ming aptomobil, on ming kishining teklimakanni késip ötüshi”, “Tengritaghni söyimen” témisidiki öz aptomobilini heydep sayahet qilish pa'aliyiti élip bérilidiken.

Uyghur aptonom rayoni sayahet idarisi yéngi chiqarghan 10 ni cheklesh belgilimisimu-1 öktebirdin bashlap Uyghur élide omumyüzlük yolgha qoyulidiken.