Түркийәдә хитайда ишләнгән оқуш қораллирини сетивалмаслиқ тәшәббус қилинди

Ихтиярий мухбиримиз арслан
2015-09-17
Share
oqush-buyumliri-dukini-turkiye.jpg Мәктәп оқуш мәдәнийәт буюмлири сетиш дукинидин көрүнүш. 2015-Йили сентәбир, түркийә.
RFA/Arslan

Түркийәдә оқуғучиларниң язлиқ тәтили ахирлишип дәрс башлиниш алдида туруватқан бир пәйттә, түрк истемалчилар мәсилилири җәмийити баянат елан қилип, ата-аниларни оқуғучилар үчүн хитайда ишләнгән оқуш қораллирини сетивалмаслиқ һәққидә агаһландурди вә хитайда ишләнгән оқуш мәдәнийәт буюмлириниң сүпәтсиз вә өлчәмсиз икәнликини һәмдә оқуғучиларниң саламәтликигә зиянлиқ икәнликини тәкитлиди.

Түркийә истемалчилар мәсилилири җәмийитиниң рәиси айдин ағаоғли, ата-аниларни оқуш қораллири сетивелишта диққәт қилишқа агаһландуруп мундақ деди: ата-анилар пәрзәнтлири үчүн оқуш қораллири, форма кийимләрни сетивелишта сүпәткә диққәт қилиши керәк. Сетивалмақчи болған мәһсулатларниң үстидики марка вә қәйәрдә ишләнгәнликигә диққәт қилип, хитайда ишләнгән сүпәтсиз таварлардин узақ туруши керәк.

Айдин ағаоғли, ата-аниларниң пәрзәнтлири үчүн, сомка, мәктәп форми, дәптәр-қәләм қатарлиқ мәдәнийәт буюмлири сетивалғанда диққәт қилиш керәкликини тәкитлиди вә оқуш башлиниш алдида бәзи пурсәтпәрәсләр өлчәмгә маслашмиған мәктәп қораллирини базарға салғанлиқини илгири сүрди.

Айдин ағаоғли әпәнди йәнә ата-аниларни агаһландуруп мундақ деди: ата-анилар сүпәтсиз кийимләрни пәрзәнтлиригә кийдүрмәслик, оқуш қораллирини қолланмаслиқи керәк. Хусусән пурақлиқ вә рәңлик мәһсулатлардин узақ туруши керәк. Бу хил мәһсулатларда ерза н баһадики пурақ вә рәңлик қилидиған химийилик маддини өз ичигә алған болуп, саламәтликкә зиянлиқтур. Бу хил мәһсулатларни сетивалғанлар тиҗарәт министирлиқи таможна идарисигә шикайәт қилиши керәк. Сүпәтсиз мәһсулатларни сетивелишниң пәрзәнтләр үчүнму яман үлгә болидиғанлиқини унтумаслиқ керәк.

Айдин аға оғли мундақ деди: елип берилған тәкшүрүш нәтиҗисидә сүпәтсиз мәһсулатларда, бөрәк, җигәр вә ашқазан дегәнгә охшаш ички әзаларға зиян қилидиған маддиларниң барлиқи байқалди. Һәтта бәзи мәктәп қораллири вә форм кийимләрдики бәзи маддиларниң тоғмаслиққа сәвәб болидиғанлиқи испатланди.

Айдин ағаоғли, пәрзәнтләр үчүн нәрсә-керәк сетивалғанда өсмүрләрниң һәр халиғинини сетивалмаслиқ тоғрисида тохтилип мундақ деди: зиянлиқ химийилик маддилар билән ишләнгән оқуш қораллириниң базарға селинғанлиқи тоғрисида учурлар алдуқ. Сетивалмақчи болған мәһсулатларда тсә вә чә бәлгилиридин әң аз бири болушиға диққәт қилиш вә яки аб (явропа иттипақи) тәрипидин бихәтәрлик бәлгиси тәстиқланған вә нормал өлчәмлик дегән бәлгә болушиға диққәт қилиш керәк. Бу җәһәттә сетивалған мәһсулатлар гуман пәйда қилған болса ата-анилар дәрһал тиҗарәт министирлиқиға шикайәт қилиши керәк. Шуниң билән тәкшүрүлгән мәһсулатларниң сүпәтсизлики испатланса, у мәһсулат сетилмастин топлиниду вә нурғун балиларниң саламәтликини қоғдап қалған болимиз. Сетивелинған сүпәтсиз бир қәләмни балилар хәт язғанда қоллиниши, мәктәптә йеңидин дәрс башлиған оқуғучиниң у қәләмни ағзиға селиши, кәлгүсидә у оқуғучиларниң саламәтликигә чоң зиян елип келиши мумкин.

Биз йәнә бу һәқтә пикир-қарашлирини елиш үчүн түркийәдә яшаватқан уйғур журналист миркамил қәшқәрли әпәнди билән сөһбәт елип бардуқ.

Миркамил қәшқәрли әпәнди, түркийәдә һәр йили оқуш башлиништин илгири ата-аниларниң хитай маллирини сетивелиштин агаһландурулидиғанлиқини, чүнки хитай маллириниң бәк сүпәтсиз, өлчәмсиз маллар икәнликини, оқуғучиларниң саламәтликигә зиянлиқ икәнликини, әслидә бу хил зиянлиқ маллар хитай тамужнида тәкшүрүлүп тәстиқ қилиши керәкликини, әмма тәкшүрүлмәстинла түркийә қатарлиқ дөләтләргә келишигә көз юмғанлиқини, хитай өз мәнпәәтини көздә тутуп кичик балиларниң саламәтлики билән ойнишиватқанлиқини билдүрди.

Миркамил қәшқәрли әпәнди, пүтүн дунядики уйғурларни, хитай маллирини сетивалмаслиққа чақириқ қилди вә хитай маллириниң сүпәтсиз вә зиянлиқ икәнликини шундақла хитайни бир ишғалчи дәп қарап униң мәһсулатлириға ембарго қоюш арқилиқ иқтисадиниң техиму күчийип кетишигә һәссә қошмаслиқ керәкликини ипадилиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт