Xoten layqa bashlan'ghuch mektepte oqughuchilarning tamaqtin zeherlinish weqesi yüz bergen

Muxbirimiz shöhret hoshur
2013-10-04
Share
hotan-mektep-305.png Xotendiki bir mektepning oqughuchiliri
AFP


Ashkarilinishiche, buningdin bir hepte burun yeni ötken ayning 26 - küni xotenning layqa bashlan'ghuch mektipide oqughuchilarning tamaqtin zeherlinish weqesi yüz bergen. Özini ashkarilashni xalimighan bir kishining radi'omizgha melum qilishiche, weqede 190 neper bala oxshimighan derijide zeherlinip shu küni doxturxanigha apirilghan.

Muxbirimiz bügün bu heqte xotendiki alaqidar orun we shexslerdin melumat igilidi. Alaqidar shexsler weqening yüz bergenlikini inkar qilmidi, emma weqening xaraktéri we kölimini burmilash we kichiklitishke tirishti. Layqa bashlan'ghuch mektep mudiri mettursun, doxturxanigha apirilghan balilar sanini 51 dep körsetse, balilarning tamaqtin zeherlen'genlikini inkar qilip "Bular mektepke nashta qilmay kélip, binormalliship qalghan balilar" dep chüshendürdi.

Töwende muxbirimiz shöhret hoshurning bu heqte teyyarlighan programmisini anglaysiler:

Xadim: xoten nahiyilik ma'arip idarisi!

Muxbir: manga buzaq yéziliq ottura mektepning téléfonini dep bersingiz?

Xadim: yéziliq ma'arip ishliri mudirining téléfonini dep bérey....

Muxbir: tamaqtin zeherlen'gen balilarning ehwali hazir qandaq?

Xadim)ma'arip ishliri mudiri(: u bizning yézida bolmidi, layqa bashlan'ghuch mektepte yüz berdi.

Muxbir: layqida shu weqe yüz bergendin kéyin, siler bu heqte bixeterlik tedbiriliri qollanmidinglarmu?

Xadim: qollanduq, ashxana we yémek ichmeklerni omumyuzluk tekshürduq, bizde gheyriy normal ehwal körülmidi.

Muxbir: layqidiki weqede qanchilik bala tamaqtin zeherlen'gen.

Xadim: doxturxanigha apirilghini 80 nechche bala dep angliduq, buning ichide 3 nepiri jiddiyraqken, nahiyilik doxturxanigha yötkülüptu.

Muxbir: siz layqa bashlan'ghuch mektepning mudiri mettursunmu?

Xadim: he men shu.

Muxbir: men silerning mektepte yüz bergen weqe heqqide bir melumat alay dégentim?

Xadim: nede weqe yüz bériptu? néme weqeken u?

Muxbir: oqughuchilarning tamaqtin zeherlinish weqesi.

Xadim: tamaqtin zeherlinish weqesi emes u!

Muxbir: emise qandaq weqe?

Xadim: weqe yüz bermidi dédimghu?

Muxbir: silerning mekteptiki omumi oqughuchi sani qanche?

Xadim: 2599

Muxbir: hemmisi Uyghurghu deymen?

Xadim: shundaq.

Muxbir: shu küni tamaqtin zeherlen'gen balilarning sani qanche?

Xadim: kim sizge mushundaq melumat yetküzdi?

Muxbir: biz nahiye we wilayetlik ma'arip tarmaqliridin ehwalni igilep bolduq, ular weqening tepsilatini sizdin sorishimizni tewsiye qildi. Shu küni doxturxanigha apirilghan balilarning sani heqqide 20 nechche, 80nechche we 190 dégen üch xil san bar qaysi toghra?

Xadim: 51

Muxbir: tamaqtin zeherlen'gen balilarning omumi sani qanche?

Xadim: tamaqtin zeherlinish yoq, tamaqtin zeherlense 2ming nechche yüz balining hemmisi zeherlenmemdu?

Muxbir: undaqta, u doxturxanigha apirilghan 51 bala némige apirilghan?

Xadim: shu binormal ehwal bayqalghan, tamaqtin zeherlenmigen.

Muxbir: shu binormalliq némidin yüz bergen, u qandaq binormalliq?

Xadim: qizzish, köngül élishish, bash qéyish.

Muxbir: néme sewebtin mushundaq binormalliq kélip chiqqan?

Xadim: etigende nashta qilmay kelgen balilar iken, ata - aniliridin sorap bilduq, uning üstige talada exlet tamaqlarni yep shundaq boptu.

Muxbir: 50 nechche bala tengla nashta qilmay kelgenmiken?

Xadim: yaq, 50 nechche emes 8, deslepte binormalliq körülgini, ularda binormalliq bolghandikin, sinipqa kirip yene qaysinglar binormallishiwatisiler dep sorisaq, kichik bala bolghachqa mendimu, mendimu bar dep 50 nechche balini doxturxanigha aparduq, hemmsi yaxshi bolup mektepte etisi ders bashlidi.

Muxbir: balilardiki binormalliq eng deslep qeyerde, qandaq bayqaldi?

Xadim: balilar mekteptin qaytqan, shu 8 balining mijezi yoq boliwétiptu dep xanimlar yetküzdi, andin ata - anilirini chaqirtip ehwal igiliduq.

Muxbir: siz dégen shu binormallashqan balilar, mu'ellimlirini izdep biz bolalmaywatimiz deptimu yaki bu balilar yiqilip qalghan yaki qusqan ehwalda oqutquchiliri bayqap sizge melum qildimu?

Xadim: bu ehwallarni nahiyilik ma'arip idarisining bashliqidin sorang, shuning téléfonini dep bérey...

Muxbir: yaq sizdin soraymiz, eger jawab bérishtin endishe hés qilsingiz, ochuqini deng, mekteptiki özingizdin bir derije yuqiri bashliq bilen sözlisheyli.

Xadim: mektepning mudiri men. Bu yerde qorqidighan ish yoq.

Muxbir: undaqta, némishqa tepsiliy we éniq jawab bérelmeysiz?

Xadim: bularni sorap néme qilisiz?

Muxbir: jan'gha munasiwetlik mesile, shunga bu ishlar sorilidu.

Xadim: tamaqtin zeherlinish yüz bermidi, undaq ish yoq.

Muxbir: emise weqeni 50 nechche balining nashta qilmay kélip binormallishish weqesi demduq?

Xadim: u özingizning ishi.

Muxbir: némishqa "Sa'et manchide mundaq alamet bayqaldi balilarda, munche balini doxturxanigha aparduq, netijide mundaq boldi" dep rawan gep qilalmaysiz?

Xadim: emise nahiyilik ma'arip idarisining bashliqining téléfonini berdim, shuningdin sorang qalghan ehwllarni. Bizde tamaqtin zeherlinish bolmidi.

Muxbir: layqa ottura mektep mudiri imammemetmu?

Xadim: he, men shu?

Muxbir: layqa bashlan'ghuch mekteptiki weqe silerge qandaq uqturuldi?

Xadim: mektepning ashxana qurulushi téxi pütmigen iken, shu küni mektep sirttin tamaq ekirip tarqatqan iken. Shu tamaqni yigen bir qisim balilarning köngli aynip, béshi qéyip normalsizliq bolghandin kéyin doxturxanigha apirildi. Bizmu shu küni buyruq boyiche neq meydan'gha - doxturxanigha yétip barduq, andin a'ililerni ziyaret qilip yene bashqa balilarda shundaq alametler barmu tekshürduq.

Muxbir: weqede zeherlen'gen balilarning omumi sani qanche? ölgenler barmu?

Xadim: bilishimche ölgenler yoq, zeherlen'genlerning sanini dep bérelmeymen. Bu heqte resmiy xulase téxi chiqmidi.

Hörmetlik radi'o anglighuchilar, yuqirida xotenning layqa bashlan'ghuch mektipide oqughuchilarning tamaqtin zeherlinish weqesi yüz bergenliki heqqide tepsiliy xewer berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet