Qazaqistanliq kompozitor polat hézimof xelq'ara mukapatqa érishti

Ixtiyariy muxbirimiz oyghan
2022.06.29
Share on WhatsApp
Share on WhatsApp
Qazaqistanliq kompozitor polat hézimof xelq'ara mukapatqa érishti Qazaqistandiki “Tarim” ansambilining rehbiri, tonulghan naxshichi, kompozitor polat hézimof “Dunyawi güzellik birleshmisi” xelq'ara teshkilatining “Eng moda” mukapatining “Eng yaxshi kompozitor” türige érishti. 2022-Yili iyun.
RFA/Oyghan

Yéqindin buyan ijtima'iy taratqularda qazaqistanda tonulghan kompozitorlarning biri polat hézimofning dunyawi güzellik birleshmisining mukapatigha érishkenliki heqqide xewerler keng tarqalmaqta.

Melumatlargha qarighanda, dunyawi güzellik birleshmisi xelq'ara teshkilat bolup, 70 tin oshuq memliketning wekilliri uninggha ezadur. Mezkur teshkilat güzellik, sen'et, satirashliq sen'iti we bashqilar boyiche xelq'araliq bir nechchiligen musabiqilerning uyushturghuchisi. Ular her yili musabiqilerni ötküzüp, ularda ghalip chiqqanlarni teqdirleshni en'enige aylandurghan.

Qazaqistandiki “Tarim” ansambilining rehbiri, tonulghan naxshichi, kompozitor polat hézimof shu xelq'ara teshkilatning “Eng moda” mukapatining “Eng yaxshi kompozitor” türige érishken. Polat hézimofqa mezkur mukapat uning köpligen Uyghur naxshiliri we muzikilirini ijad qilghanliqi üchün bérilgen.

Qazaqistandiki “Tarim” ansambilining rehbiri, tonulghan naxshichi, kompozitor polat hézimof “Dunyawi güzellik birleshmisi” xelq'ara teshkilatining “Eng moda” mukapatining “Eng yaxshi kompozitor” türige érishti. 2022-Yili iyun.
Qazaqistandiki “Tarim” ansambilining rehbiri, tonulghan naxshichi, kompozitor polat hézimof “Dunyawi güzellik birleshmisi” xelq'ara teshkilatining “Eng moda” mukapatining “Eng yaxshi kompozitor” türige érishti. 2022-Yili iyun.
Most Fashionable Awards Ceremony Kyrgyzstan

Biz polat hézimof ependi bilen alaqileshkinimizde, u ziyaritimizni qobul qilip, mundaq dédi: “Bu teshkilatning dunyada hemme memliketlerde, qazaqistandimu wekilliri barken. Ular yiligha her bir memlikette buni ötküzidu. 2019-Yili ular ruminiyede ötküzmekchi bolghan. Ular tor betliride hemmini tekshürüp mangidu. Méning naxshilirimni körüp, andin men bilen alaqe qildi. Men körüshüp, ulargha özümning naxshilirini, ömür bayanimni berdim. Töt-besh ay tekshürüp, méni 2019-yili ruminiyege teklip qildi. Lékin korona wirusi wabasi sewebidin toxtap qaldi. Bu yil 19-iyunda ruminiyede ötküzdi”.

Polat hézimof, késellik sewebidin murasimgha qatnishalmighan bolsimu, emma yéqinda mezkur mukapat almutagha élip kélinip biwasite uning qoligha tapshurup bérilgen. Mezkur mukapat polat hézimofning Uyghur muzikisi we sen'itige qoshqan töhpisining étirap qilinishidur.

Polat hézimof shuningdek Uyghur we qazaq artisliri üchün 70 tin oshuq naxsha yazghan. U “Wisal demliri”, “Séghinish”, “Atilar naxshisi” namliq üch toplamning aptori, bir qatar xelq'ara sen'et musabiqilirining uyushturghuchisi. Shundaqla u “Diyar”, “Leyli”, “Adash”, “Irade” ansambillirining asaschisi. Polat hézimof Uyghurlarning dangliq naxshichisi merhum murat nasirof bilen bir nechche yil ijadiy hemkarliqta ishlep, uning naxshilirini terghib qilishta chong rol oynighanidi.

Radiyomiz ziyaritini qobul qilghan “Bint” birleshmisining bashqarma re'isi, tonulghan tijaretchi dilmurat quziyéf ependi dunya güzellik birleshmisining shu jümlidin talantliq kompozitor we naxshichilarni tallap, ularni righbetlendürüsh ishlirini élip bériwatqanliqini, yawropa, amérikaning chong tijaretchilirining, xolliwudning dangliq sen'etchilirining bu teshkilatni maddiy jehettin teminlep kéliwatqanliqini bayan qildi.

Dilmurat quziyéf polat hézimofning bu teshkilatning mukapati bilen teqdirlen'genlikining pütkül qazaqistanliq Uyghurlar üchün chong yéngiliq bolghanliqini otturigha qoyup, mundaq dédi: “Polatni men 15-20 yildin buyan yaxshi bilimen. Polatning naxshiliri addiy tilda yézilghan, hemme tereptin chüshinishlik. Ata-ana, weten, hayat, her sahede polatning naxshiliri mahirliq bilen yézilghan. Polat dangliq kompozitor bolupla qalmay, özi kichikpé'il, exlaqi tereptin her adem pexirlinidighan kompozitorimiz. Bu mukapat pütkül Uyghur xelqige shan-shöhret élip kelmekte. Polat hézimofni qazaqistandila emes, pütkül ottura asiyada, türkiyede yaxshi bilidu”.

Dilmurat quziyéf polat hézimofni pütkül tijaretchiler namidin semimiy tebriklep, uninggha salametlik, ijadiy utuqlar tilidi.

Igilishimizche, polat hézimofning ismi almutada neshr qilin'ghan “Uyghurlar” namliq énsiklopédiyege kirgen bolup, uningdiki melumatlargha qarighanda, u 1964-yili almuta wilayitining yarkent shehiride tughulghan. Ottura mektepni, andin chish téxnikisi kespi boyiche téxnikomni tamamlap, chish doxturxanisida ishligen we Uyghur muzikilirigha bolghan qiziqish uni bu sahege élip kirgen. Polat hézimof deslep “Yarkent bulbulliri” Uyghur milliy ansambili, kéyinki yillarda bolsa, “Tarim” ansambilining bedi'iy rehbiri süpitide köpchilikke yaxshi tonulghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet