“Ixlas” shirkitining lidiri musajan imam türkiye bilen bolghan “Sirliq” alaqisi seweblik tutulghan we 17 yilliq késiwétilgen

Muxbirimiz shöhret hoshur
2021.06.10
“Ixlas” shirkitining lidiri musajan imam türkiye bilen bolghan “Sirliq” alaqisi seweblik tutulghan we 17 yilliq késiwétilgen Uyghur rayonida 50 din artuq top tarqitish orni, 200 din artuq mehsulat türi bolghan “Ixlas” shirkitining sahibi musajan imam ependi. (Waqti we orni éniq emes.)
Oqurmen teminligen

Uyghur rayonida 50 din artuq top tarqitish orni, 200 din artuq mehsulat türi bolghan “Ixlas” shirkitining sahibi musajan imam, türkiye bilen bolghan atalmish “Sirliq” alaqsi seweblik 2018‏-yili tutqun qilin'ghan we 3 yilliq tekshürüshtin kéyin bir qatar atalmish “Jinayet” liri bayqilip, 17 yérim yilliq késiwétilgen. Norwégiyediki “Uyghuryar” fondi igelligen bu uchurmu muxbirimizning atushqa qarita élip barghan téléfon ziyaretliri dawamida delillendi.

2000‏-Yillarda türkiye “Ülker” shirkitining mehsulatlirining wakaletchilikini qilishqa bashlighanda, xitay da'iriliri teripidin “Islahat we échiwitishning ülgiliri” dep medhiyelen'gen musajan imam, 2018‏-yiligha kelgende birdinla “Gumanliq shexs” ke ayilinip qalghan we u shu yili 6-ayning 14‏-küni “Ixlas” kespiy tereqqi'iyat shirkitining ürümchidiki xizmet bi'anasidin tutup kétilgen. Norwégiyediki “Uyghuryar” fondining igilishiche, saqchilar eng deslepki soraqta uning türkiye bilen soda alaqisining bashlinishi we tereqqiyati, shundaqla türkiye tereptin körüshken kishilirining salahiyetliri we qilishqan sözliri heqqide melumatlar sorighan. Musajan soraq dawamida pütün alaqining ruxset bilen we ochuq bolghanliqini, tapshurushqa tégishlik héchqandaq bir mesile yoqluqini bayan qilighan. Shundaqtimu musajan imam shu tutulghan péti qoyup bérilmigen we bu yil 4‏-ayning béshida atushta échilghan sotta oghli muzepper musa we jyeni ekber ela bilen birlikte késwiétilgen.

Qizilsu oblastliq ottura sot mehkimisining bir xadimi musajan imam délosining sezgür délolar qatarida ikenlikini eskertip, melumat bérishni ret qildi. Emma u musajan imamning atushtiki bir türküm soda serkiliri qatarida sotlan'ghanliqini inkar qilmidi.

“Uyghuryar” fondining qurghuchisi abduweli ayupning bayan qilishiche, musajan imamning soraq xatiriside tilgha élin'ghan atalmish “Mesile” ler arsida, “Ixlas” shirkitining halal yémekliklerni kéngeytishi, xizmet binalirining milliy posunda bolushi, zakat bérilgen shexis we orunlarning kimliki, xeyr-saxawet üchün sélin'ghan ikki bashlan'ghuch mektipi qatarliqlar bar iken. Musajan imamning 17 yérim yilliq késiwétilishide uning türkiye bilen bolghan alaqisi bekrek taraza basqan. Melum bolushiche, musajan imam Uyghur rayondiki dangliq soda-karxanichilardin “Qiran bürküt” öy-mölük shirkitining sahibi merhum qudret hajining inisi bolup, uning qudret haji we rozi haji isimlik ikki akisi türkiye wetendashliri iken. Abduweli ayupning déyishiche, musajan imam tekshürülüsh dawamida ikki akisi bilen bolghan alaqisi heqqidimu soraqqa tartilghan.

Atush sheherlik sot xadimi musajan imamning tutulush we késilish sewebi heqqide teptish organliridin melumat élishimizni tewsiye qildi.

Yene weziyettin xewerdar kishilerdin birining déyishiche, musajan imam kütülmigen bir pishkelchiliktin saqlinish üchün türkiyediki ikki akisi bilen 2005-yilidin bashlap sodisi we mal-mülüklirini ayrighan iken.

Abduweli ayupning eskertishiche, musajan imam türkiye wetendishi ikki akisi bilen sodisini ayrishtin ilgiri ürümchide bina séliwatqan mezgilide xitay terep bilen arilirida bir kélishelmeslik yüz bergen. Mesilini hel qilish jeryanida uning ikki akisi özlirining türk wetendishi ikenlikini, bir waste qilip qollan'ghan. Abduweli ayup eyni chaghda bir terep qilinip bolghan bu mesilining 2017-yildin kéyinki alahide weziyette qaytidin otturigha tartip chiqirilghanliqini we uningdin intiqam élin'ghanliqini ilgiri süridu.

Abduweli ayupning déyishiche, musajan imamning délosi mexpiyetliki eng yüksek délolar qatarida bir terep qilin'ghan. U tutulghandin tartip a'ile-tawabi'ati bilen körüshtürülmeslik bilen birlikte, sotlan'ghandin kéyin sot hökümimu a'ilisige bildürülmigen. “Uyghuryar” fondi musajan imamning 17 yérim yilliq késilgenlikini, Uyghur rayonining siyasiy-qanun tarmaqliridiki melum bir alaqe tori arqiliq igiligen. Igilinishiche, musajan imam bilen birlikte shirkitining gholluq bashqurghuchisi-oghli muzepper imam bilen “Hayat” soda shirkitining sahibi bolghan jyeni ekber elamu bille tutulghan we aldinqi aydiki sotta késiwétilgen؛ emma bu ikkisining qanche yilliqtin késilgenliki melum emes.

Atushtiki bir teptish xadimi musajan imamning nöwette atushtiki aghu türmiside jaza mudditini ötewatqanliqini delillidi.

Melum bolushiche, “Ixlas” kespiy tereqqiyat shirkitining 500 din artuq top sétish orni, 200 din artuq mehsulati we 2000 din artuq ishchi-xizmetchisi bar bolup, mezkur shirket Uyghur yashlirini ish pursiti bilen temileshtin bashqa yene soda-karxanichiliqqa atlinishqimu ilham bolghan we yétekchilik qilghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.