Вашингтондики зор намайишниң тәйярлиқ хизмәтлири нәтиҗилик ахирлашқан

Ихтиярий мухбиримиз әкрәм
2019-04-03
Елхәт
Пикир
Share
Принт
Вашингтондики әркинлик мәйданида елип берилмақчи болған намайишниң уқтуруши.
Вашингтондики әркинлик мәйданида елип берилмақчи болған намайишниң уқтуруши.
RFA/Ekrem

4-Айниң 6-күни вашингтондики әркинлик мәйданида елип берилмақчи болған намайишниң тәйярлиқ хизмәтлири ахирлашқан.

Дуня уйғур қурултийи рәһбәрлириниң бүгүн бәргән мәлуматлириға асасланғанда, 6-апрел вашингтонда өткүзүлмәкчи болған хәлқаралиқ бирләшмә зор намайишниң тәйярлиқ хизмәтлири бир айдин артуқ давам қилип, ахирқи басқучни тамамлиған.

Д у қ ниң биваситә рәһбәрлики, америка уйғур бирләшмиси, уйғур кишилик һоқуқ қурулуши қатарлиқ тәшкилатларниң уюштуруши билән өткүзүлмәкчи болған бу бирләшмә намайишқа шималий америка, окянийә, асия вә явропадин ибарәт 4 қитәдин көплигән уйғурларниң келип қатнишиши мөлчәрлиниватқан болуп, бир айдин буян иҗтимаий таратқуларда буниң тәшвиқатлири кәң орун алған иди.

«Вашингтондики намайиш тәйярлиқ гурупписи» ниң әзаси, д у қ ниң муавин рәиси пәрһат муһәммиди әпәндиниң баян қилишичә, бу намайиш америка тарихида уйғурлар тәрипидин өткүзүлгән көлими әң чоң намайишларниң бири болуп қалидикән.

«Вашингтондики намайиш тәйярлиқ гурупписи» ниң мәсули, д у қ иҗраийә комитетиниң рәиси, америкадики уйғур кишилик һоқуқ қурулушиниң мудири өмәр қанат әпәндиниң билдүрүшичә, бу қетимқи намайишқа уйғурлардин сирт америкадики көплигән түрк вә башқа мусулман хәлқлириму иштирак қилидикән.

«Вашингтондики намайиш тәйярлиқ гурупписи» ниң мәсули, д у қ хитай ишлири комитетиниң мудири, америка уйғур бирләшмисиниң рәиси илшат һәсән көкбөрә әпәндиниң тилға елишичә, америкиниң муавин президентлиридин дөләт мәҗлиси әзалириғичә уйғурлар вә җаза лагерлири мәсилисини изчил тилға елип туруватқан вә хитайниң җаза лагерлири сияситини қаттиқ әйипләватқан бир мәзгилдә бу қетимқи намайишниң вашингтонда өткүзүлүши зор әһмийәткә игә бир һадисә болуп һесаблинидикән.

Д у қ ниң баш тәптиши, «вашингтондики намайиш тәйярлиқ гурупписи» ниң әзаси абдулһәким идрис әпәндиниң әскәртишичә, бу қетимқи намайишниң тәйярлиқ хизмәтлири әтраплиқ ишләнгән болуп, төт қитәдики көплигән вәтәнпәрвәр уйғурлар бу намайишни пүтүн күчи билән қоллап чақириқлар елан қилған һәмдә ярдәмләрдә болған.

Бүгүн 3-апрел күни «д у қ тор телевизийәси» йәнә мәхсус программа тарқитип, 6-апрел вашингтонда өткүзүлмәкчи болған бирләшмә намайишниң ахирқи чақириқини елан қилди.

Мәлум болушичә, бу қетимқи намайиш д у қ тәшкиллигән 2018-йили 27-апрел явропа иттипақи алдида өткүзүлгән «5 миң кишилик намайиш» һәмдә 2018-йили 6-ноябир җәнвәдики б д т бинаси алдида өткүзүлгән хәлқаралиқ зор намайиштин кейинки хитайниң җаза лагерлириға қарши 3-қетимлиқ көлими зор намайиш болуп санилидикән.

Пикирләр (0)
Share
Толуқ бәт