Nensiy pélusi xanim en'gliyediki resmiy ziyariti mezgilide Uyghurlarning arzu-teleplirini anglidi

Muxbirimiz irade
2022.02.22
Nensiy pélusi xanim en'gliyediki resmiy ziyariti mezgilide Uyghurlarning arzu-teleplirini anglidi Amérika awam palatasining re'isi nensiy pélusi xanim d u q ning en'gliyediki wekili rehime mehmut xanim we bashqilarni amérikaning londondiki bash elchixanisida qobul qildi. 2022-Yili 21-féwral, en'gliye.
Social Media

Amérika awam palatasining re'isi nensiy pélusi xanim bashchiliqidiki hey'et 21-féwral düshenbe küni en'gliyede resmiy ziyarette bolghan. Nensiy pélusi xanimning ishxanisi teripidin tarqitilghan bayanattin qarighanda ularning en'gliyediki ziyariti bixeterlikni kapaletke ige qilish, iqtisadning güllinishini ilgiri sürüsh we ortaq qimmet qarashlarni ilgiri sürüshtek mesililer heqqide parlaméntlar ara di'alogni chongqurlashturushni meqset qilghaniken.

Diqqet qozghaydighini, awam palata re'isi nensiy pélusi xanim en'gliyediki bu bir künlük ziyaritide xitay hökümitining kishilik hoquqqa qiliwatqan ziyankeshlikinimu muhim téma qilghan. Nensiy pélusi xanim 21-féwral düshenbe küni dunya Uyghur qurultiyining en'gliyediki wekili rehime mehmut xanim, xongkongluq oqughuchilar herikiti rehberlirining biri néytin law we xitay hökümiti teripidin tutqun qilin'ghan shiwétsiye puqraliqidiki öktichi yazghuchi, kitabpurush güy minxeyning qizi an'gila güylerni amérikaning londondiki bash elchixanisida qobul qilip semimiy söhbette bolghan.

Rehime xanimning radiyomizgha éytishiche, amérika awam palata re'isi nensiy pélusi xanim uchrishishta ularning arzu-teleplirini tepsiliy anglap chiqqan.

Rehime xanim söhbitide nuqtiliq halda en'gliye hökümitining Uyghurlar mesiliside téxi yéterlik derijide oyghanmaywatqanliqini, Uyghurlargha qiliniwatqan zulumni téxiche irqiy qirghinchiliq dep tonumighanliqini bayan qilghan.

Rehime xanim bu seweblik amérikaning en'gliyege tesir körsitip, en'gliyeningmu bu zulumni irqiy qirghinchiliq dep tonushi, amérika maqullighan “Uyghur mejburiy emgikige qarshi turush” qanunigha oxshash qanunlarning en'gliyedimu maqullinishi üchün türtke bolushini telep qilghan.

Rehime xanimning éytishiche, u amérika Uyghurlar üchün néme qilip béreleydu, dégen so'algha jawab bergende “Xeter astidiki döletlerde yashawatqan Uyghurlarni amérikadek bixeter döletlerge yötkesh mesilisi Uyghurlarni eng teqezza qiliwatqan mesililerning biri” dégen.

Awam palata re'isi nensiy pélusi xanim tiwittérdiki hésabidimu en'gliyediki Uyghur we xongkongluq wekiller bilen ötküzgen söhbitini élan qilghan bolup, u tiwittérda mundaq dégen:

“Uzundin buyan xitay xelq jumhuriyitining kishilik hoquq depsendichilikige qarshi küresh qilghan bir rehber bolush süpitim bilen men nétin law, rehime mehmut we an'gila güyge oxshash erkinlik, kishilik hoquq we qanun bilen idare qilish hoquqi küreshchiliri bilen uchrashqanliqimdin xursen boldum. Dölet mejlisimizning xitaydiki kishilik hoquq mesilisi heqqide bergen wedisi her ikki partiyege, her ikki palatagha ortaq bolush bilen birge uzun muddetliktur”

Melum bolushiche nensiy pélusi xanim uchrishish jeryanidimu rehime xanimgha amérikining Uyghur mesilisige dawamliq köngül bölidighanliqi we xizmetlirini dawam qilidighanliqini tekitligeniken.

Amérika awam palata re'isi nensiy pélusi xanimning ishxanisi 22-féwral küni nensiy pélusi xanim bashchiliqidiki hey'etning londondiki amérika bash elchixanisida rehime xanim qatarliq kishilik hoquq pa'aliyetchiliri bilen ötküzgen uchrishishi heqqide yazma bayanat élan qilghan bolup, uningda töwendikiler déyilgen:

“Wekiller ömikimiz xitayda erkinlik, kishilik hoquq we qanun bilen idare qilish üchün küresh qiliwatqan batur jengchiler bilen körüshüsh imtiyazigha érishti. . . Rehime mehmut Uyghur xelqi uchrawatqan irqiy qirghinchiliq toghrisida söz qildi, an'géla güy dadisi güy minxey we xitaydiki siyasiy mehbuslar heqqide söz qildi, néytin law xongkongda démokratiye we qanun bilen idare qilishning muhimliqini tekitlidi.”

Bayanatta yene munular déyilgen: “Nechche on yildin buyan xitay hökümiti insanlargha qaritilghan kishilik hoquq depsendichilikini rehimsizlerche kücheytti we tézletti. Yéqinqi yillardin buyan xitay hökümiti yene xongkong xelqige qilghan bir dölet, ikki sistéma wedisini buzdi. Bularning hemmisi xelq'ara qa'idilerge we démokratik qimmetlerge ochuq-ashkara xilapliq qilghanliqtur. Dölet mejlisimizde, démokratchilar partiyesi we jumhuriyetchiler partiyesi oxshashla xitay xelq jumhuriyitige bu xorluqlarning qobul qilinmaydighanliqini we buni derhal toxtitishi kéreklikini bildürüsh üchün tirishiwatimiz. Biz shundaqla soda dunyasi we ittipaqdash döletlirimiznimu biz bilen oxshash heriket qilishqa heydekchilik qilimiz.”

Nensiy pélusi xanim amérika siyaset sehniside amérika prézidénti we mu'awin prézidéntidin qalsila 3-orunda turidighan muhim shexs bolup, u xitay hökümitining Uyghurlargha qiliwatqan irqiy qirghinchiliqini eyiblesh we uni jazalash üchün aktip heriket qiliwatqan erbablarning biri. Uning en'gliye parlaménti we hökümiti wekilliri bilen uchrishish aldida rehime xanim qatarliqlar bilen uchrishishining ehmiyiti yüksek dep qaralmaqta. Rehime xanim buning en'gliye hökümitining Uyghurlar mesiliside kelgüside alidighan qararliri üchünmu belgilik tesiri bolushi mumkinlikini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.