Nensi pélosi xanim: "Uyghur mesilisi dawamliq bizning diqqitimizde!"

Muxbirimiz eziz
2021-03-02
Share
Nensi pélosi xanim: Amérika awam palatasining re'isi, amérika hökümitidiki 3-nomurluq shexs bolghan nensi pélosi xanim washin'gton shehiridiki "Uyghur herikiti" teshkilati bilen Uyghurlar mesilisi heqqide mexsus söhbette boldi. 2021-Yili 1-mart.
Social Media

Uyghur diyaridiki paji'elerni eyiblesh chuqanliri we xitay hökümitining buninggha qarshi türlük teshwiqatliri köplep otturigha chiqiwatqanda, amérika awam palatasining re'isi, amérika hökümitidiki 3-nomurluq shexs bolghan nensi pélosi xanimning washin'gton shehridiki "Uyghur herkiti" teshkilati bilen Uyghurlar mesilisi heqqide mexsus söhbette bolushi, muhajirettiki Uyghurlarni memnun qilghan ishlarning biri boldi. Bolupmu amérika hökümitidiki eng muhim terkibiy qisimlardin bolghan awam palatasi yéqinqi mezgillerde awazgha qoyulup, resmiy qanun'gha aylan'ghan Uyghurlar heqqidiki qanunlarning maqullinishida özining qanchilik muhim orun ikenlikini namayen qilghan idi. Shu sewebtin 1-mart küni ötküzülgen söhbet yighini Uyghurlar üchün köp tereplime ehmiyetke ige bir qétimliq pa'aliyet boldi.

Bu qétimqi söhbet yighinining orunlashturulushi heqqide söz bolghanda Uyghur herkiti teshkilatining alaqe ishlirigha mes'ul juliy milsap xanim bu heqte chüshenche bérip, mushu qétimliq muhakime arqiliq Uyghurlarning yürek sözlirini yene bir qétim amérika hökümitige yetküzüshke mumkin bolghanliqini xoshalliq ichide sözlep ötti.

"'Uyghur herkiti' teshkilati nensiy pélosi xanimning Uyghur hémayigerliki üchün bijanidilliq bilen qiliwatqan xizmetlirige teshekkür éytish yüzisidin bir qétimliq söhbet qilish arzusida boluwatqanliqimizni bildürgen iduq. Chünki nensiy xanim Uyghurlar heqqidiki ikki qétimliq qanun layihisining muzakire qilinishida izchil bu ishlarni eng zor derijide qollap keldi. Shunga bu qétim muhajirettiki Uyghur jama'iti, bolupmu türkiyediki Uyghurlar özlirining xalis köngül sowghisini nensi xanimgha yollighach, uning bundin kéyinki xizmetlerde, jümlidin qishliq olimpk musabiqi'isni bayqut qilish xizmitide dawamliq heqiqet üchün söz qilishigha tilekdashliq bildürdi. Biz yighinda nahayiti azade we keng-kushade söhbetleshtuq. Bolupmu baydin hökümitining Uyghurlar heqqidiki ré'alliqqa nisbeten tewrenmes mewqede bolushining bekmu muhimliqini nensiy pélosi xanimgha alahide chüshendürduq. Bolupmu xitay hökümiti we ular sadir qiliwatqan heqler depsendichilikining xitay bilen bolghan herqandaq söhbette ikkilemchi mesile emes, eksiche merkiziy témilardin bolushi lazimliqini alahide tewsiye süpitide sunduq."

Bu qétimqi muhakime yighinigha qatnashqan Uyghur pa'aliyetchilerdin Uyghur herkiti teshkilatining re'isi roshen abbas xanim idi. U özlirining bu qétimqi söhbet pursitidin paydilinip, nöwettiki Uyghurlar duch kéliwatqan eng éghir mesililerni yüzturane halda amérika hökümitining mushundaq bir yuquri derijilik emeldarigha bayan qilip béreligenlikidin bekmu memnun ikenlikini alahide tekitlidi.

Bu qétimqi muhakime yighinida alahide söz qilghan hökümet xadimlirining biri amérika xelq'ara diniy erkinlik komitétining komssari nuriy türkel idi. Uning qarishiche, nensi pélosi xanimning ötken yillardin buyanqi Uyghurlargha da'ir köpligen mesililerde izchil heqqaniyetni hémaye qilish, shundaqla Uyghurlar heqqidiki qanun layihilirining maqullinishi türlük tosqunluqlargha duch kelgende buninggha daghdam yol échishqa jür'et qilishtek shija'itige alahide apirin oqushqa erziydighan bolup, mushundaq bir halqiliq peytte uning yene bir qétim Uyghurlar heqqidiki mexsus söhbetke qatnishishi hemde ‍öz qarishini ipadilep Uyghurlarni hémaye qilishi zor ehmiyetke ige iken.

Melum bolushiche, yéngi nöwetlik amérika hökümitining wujutqa kélishidin uzun ötmey qismen shexslerning Uyghur diyaridiki ijtima'iy paji'eler we siyasiy basturush qilmishlirini "Qirghinchiliq" dep atash ré'alliqqa anche muwapiq emes, dégendek pikirliri otturigha chiqishqa bashlighan. Buning bilen yéngi nöwetlik hökümetning ilgiriki hökümet élan qilghan "‍Uyghurlar qirghinchiliqqa uchrawatidu" dégen mezmundiki hökümge qandaq mu'amile qilishi köp qisim kishilerning diqqitini tartiwatqan mesililerdin biri bolup qélishqa bashlidi. Ene shu xil weziyette nensi pélosi xanimning mushundaq bir muhakime yighinida Uyghurlar heqqide dawamliq eng zor derijide tirishchanliq körsitishni xalaydighanliqini bildürüshi bekmu qimmetlik hésaplinidiken. Bu heqte söz bolghanda yighin ishtirakchilirining biri, dunya Uyghur qurultiyining bash teptishi abdulhekim idris buning hazirqi peytte bekmu muhim ehmiyetke ige ikenlikini bildürdi.

Komissar nuriy türkelning qarishiche, amérika hökümitining Uyghur qirghinchiliqi heqqidiki qararni élishi hemde uni ijra qilishi, shuningdek buninggha chétishliq mesililer tolimu salmaqliq témilar bolghanliqi üchün buning musapisi we sür'iti unche téz bolup ketmeydiken. Shundaqla buningda birer tüplük özgirishning barliqqa kélishimu undaq asanla emelge ashidighan ishlar emesken.

Bu qétimqi muhakime yighinidin kéyin nensi pélosi xanim ‍özining tiwittér bétide özining mushundaq bir muhakime yighinigha qatnashqanliqidin bekmu xursen bolghanliqini bildürdi. U bu heqte yollighan uchurida "Soda jehettiki menpe'etlerni közlep xitaydiki kishilik heqlirining depsende bolushi heqqide söz qilishtin bash tartsaq, dunyaning héchqandaq yéride kishilik hoquq heqqide söz qilghudek héchqandaq exlaqiy nopuzimiz qalmaydu," dep körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet