Amérika awam palatasi re'isi nensi pélosi Uyghurlar mesilisige dawamliq köngül bölidighanliqini bildürgen

Muxbirimiz jewlan
2022.07.29
Amérika awam palatasi re'isi nensi pélosi Uyghurlar mesilisige dawamliq köngül bölidighanliqini bildürgen Amérika awam palatasi re'isi nensi pélosi(Nancy Pelosi) Uyghur herikiti teshkilatining bashliqi roshen abbas we Uyghur tetqiqat merkizining bashliqi abdulhekim idris bilen körüshti. 2022-Yili 28-iyul, washin'gton.
Photo: RFA

Amérika bilen xitayning munasiwiti yamanlishiwatqan, amérika awam palatasi re'isi nensi pélosining teywen'ge bérish-barmasliqi qiziq nuqtigha ayliniwatqan bu künlerde, nensi pélosi 7-ayning 28-küni Uyghur herikiti teshkilatining bashliqi roshen abbas, Uyghur tetqiqat merkizining bashliqi abdulhekim idris qatarliqlar bilen körüshken. U teywen mesilisidila emes, Uyghurlarni xitayning irqiy qirghinchiliqidin qoghdash kürishide dawamliq Uyghurlarning yénida turidighanliqini bildürgen.

Roshen abbas xanim bilen abdulhekim idris radiyomizgha bergen ziyaritide bu qétimliq uchrishishning nahayiti ehmiyetlik bolghanliqini bildürdi. Bu uchrishish xitay re'isi shi jinping bilen jow baydén söhbet ötküzgen bir kün'ge, shundaqla xitay hökümiti nensi pélosining teywen'ge barmasliqini telep qilip tehdit séliwatqan künlerge toghra kelgen bolup, nensi pélosi Uyghur pa'aliyetchiliri bilen körüshüp, ularni qollaydighanliqini körsitish arqiliq xitayni qattiq bi'aram qilghan.

Uyghur herikiti teshkilatining bashliqi roshen abbas we Uyghur tetqiqat merkizining bashliqi abdulhekim idris amérikaning muhim erbabliri bilen körüshti. 2022-Yili 28-iyul, washin'gton.

Roshen abbas xanim bu qétimliq uchrishish heqqide melumat bérip, nensi pélosi bilen Uyghur irqiy qirghinchiliqini toxtitishqa munasiwetlik qanunlarning ijra qilinishi we yéngi qanunlarning tüzülüshi, amérika we bashqa döletlerdiki Uyghurlarni xitayning chégra halqighan ziyankeshlikidin qoghdash qatarliq mesililer heqqide söhbetleshken. Ular yene dunyadiki musulmanlarning Uyghurlarni qollash mesilisinimu muzakire qilghan. Nensi pélosi xanim xitay tehditige taqabil turup, Uyghurlarni qoghdash mesilisini yalghuz amérikaning iradisi we amérikaning qanuni bilenla emes, dunyaning iradisi we insaniyetning ortaq tirishchanliqi arqiliq hel qilish pikrini bildürgen.

Amérika xelq'ara diniy erkinlik komitétining re'isi nuri türkel, Uyghur kishilik hoquq qurulushining diréktori ömer qanat amérikaning muhim erbabliri bilen körüshti. 2022-Yili 28-iyul, washin'gton.

Abdulhekim idris ependining bildürüshiche, ular bu qétimliq uchrishishta nensi pélosigha yéqinda xitay re'isi shi jinpingning Uyghur rayonigha bérip dawamliq irqiy qirghinchiliq siyasiti élip bérishqa yolyoruq bergenliki, 7-ayning 31-küni dunyaning 10 nechche shehridiki musulmanlar teshkilatining xitayning Uyghurlargha yürgüzüwatqan irqiy qirghinchiliqini toxtitishqa chaqiriq qilip namayish ötküzidighanliqi heqqide melumat bergen. Nensi pélosi xanimmu bu ishta musulmanlar dunyasini heriketke keltürüshning muhimliqini bildürgen.

Washin'gton etrapida heriket qiliwatqan Uyghurlar amérikaning muhim erbabliri bilen körüshti. 2022-Yili 28-iyul, washin'gton.

Igilishimizche, amérika xelq'ara diniy erkinlik komitétining re'isi nuri türkel, Uyghur kishilik hoquq qurulushining diréktori ömer qanat, amérika Uyghur birleshmisining re'isi elfidar iltebir xanim qatarliqlarmu bu ikki künde ilgiri-axir bolup amérika dölet mejlisi ezaliridin jeymés mekgawrénn, tam sozi, jénifér wékston qatarliqlar bilen körüshüp, Uyghurlarning amérika dölet mejliside küntertipte turuwatqan mesililiri we kelgüside qilidighan ishlar heqqide muzakirileshken. Elfidar iltebir xanim ziyaritimizni qobul qilip, bu heqte melumat berdi.

Yuqiridiki söhbet ulinishidin tepsiliy mezmunni anglighaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.