Nensiy pélosi: “Adalet-hemme partiyelerning ortaq nishani!”

Muxbirimiz eziz
2021.09.30
Nensiy pélosi: “Adalet-hemme partiyelerning ortaq nishani!” Amérikadiki üchinchi nomurluq shexs nensiy pélosi xanim Uyghur dawasidiki közge körün'gen shexslerdin örkesh dölet we nuriy türkel ependiler bilen mexsus yüzturane söhbette boldi. 2021-Yili 30-séntebir, washin'gton.
Photo: RFA

Yéqinqi mezgillerde amérika hökümitining ichki qismida maliye xirajiti heqqidiki guwahliq yighinliri dawam qiliwatqan we hökümetning taqilip qélishigha seweb bolidighan bashqa nazuk mesililer hökümetning yuqiri qatlimidiki barliq kishilerni adettin tashqiri pat-paraqchiliqqa séliwatqan bir jiddiy weziyet barliqqa kelgen idi. Ene shundaq shara'itta amérikadiki üchinchi nomurluq shexs, amérika awam palatasining re'isi nensiy pélosi xanimning Uyghur dawasidiki közge körün'gen shexslerdin örkesh dölet we nuriy türkel bilen mexsus yüzturane söhbette bolushi, muhajirettiki Uyghurlarni xursen qilghan weqelerning biri boldi.

Amérikadiki üchinchi nomurluq shexs nensiy pélosi xanim Uyghur dawasidiki közge körün'gen shexslerdin örkesh dölet we nuriy türkel ependiler bilen mexsus yüzturane söhbette boldi. 2021-Yili 30-séntebir, washin'gton.

Bu heqtiki xewerler herqaysi axbarat wasitilirining diqqitini qozghash bilen birlikte amérika hökümitining neziride Uyghurlar mesilisining yenila muhim salmaqni igilewatqanliqiningmu bir ipadisi, dep qariliwatqanliqi melum. Bu qétimqi uchrishishqa ishtirak qilghan Uyghurlarning biri yillardin buyan köp qisim kishilerge tonushluq bolup kelgen siyasiy pa'aliyetchi örkesh dölet bolup, teywendiki “Merkiziy xewer agéntliqi” bu heqte uni mexsus ziyaret qilip, nensiy pélosi xanimning amérika-teywen munasiwiti heqqidiki pikirliridin melumat berdi. Yéqinda teywen parlaménti qarmiqidiki “Kishilik hoquqni algha sürüsh komitéti” ning bash katipliqigha saylan'ghan örkeshmu özining féysbok sehipiside bu heqte alahide yazma élan élan qilip, nensi pélosi xanimning mushundaq bir qatilangchiliq mezgilide özlirini mexsus yüzturane körüshüshke orunlashturghanliqidin bekmu sherep hés qiliwatqanliqini ipadilidi. Uninggha alahide tesir qilghan bir ish shu bolghanki, nensiy pélosi xanim amérika dölet mejlisidiki arqimu-arqidin orunlashturulghan yighinlargha süylep yazma eskertmilerni élip kirgen katipning “Waqit toshup qaldi” dégen teklipini bir yaqqa qayrip qoyup, ular bilen bir sa'etke yéqin amérika-xitay munasiwiti, Uyghur diyaridiki mejburiy emgek mehsulatlirini cheklesh qanuni qatarliq mesililer boyiche sözleshken.

Bu heqte söz bolghanda, bu qétimqi uchrishish telipini deslep bolup otturigha qoyghan hemde buning wujudqa chiqishigha bashtin-axir küch chiqirip kelgen amérika xelq'ara diniy erkinlik komitétining mu'awin re'isi nuriy türkel buning nensiy pélosi xanim bilen bolghan uzun yilliq xizmet munasiwitide köp qétim körülgen uchrishishtin alahide perqliq bolghan bir qétimliq söhbet bolghanliqini tekitleydu.

Bu qétimqi yüzturane söhbette ikki terep nöwette hemmila kishining diqqitini qozghawatqan hemde wasitilik yaki biwasite halda Uyghurlargha munasiwetlik bolghan bir qisim xelq'araliq mesililer heqqide keng-kushade pikir almashturghan. Bu heqte söz bolghanda nuriy türkel buni heqiqetenmu “Netijilik bir qétimliq söhbet boldi” dep qaraydighanliqini bildürdi.

Xelq'ara weziyettiki kütülmigen jiddiy özgirishler hemde amérika hökümitining ichki qismidiki xizmet tertipining alahide xaraktéri tüpeylidin nöwettiki amérika tashqi siyasitide Uyghurlar mesilisining salmiqi ilgiriki waqitlargha sélishturghanda, bir'az töwenlesh barliqqa kéliwatqan idi. Bu heqte söz bolghanda nuri türkel buning démokratiye asasidiki qanun bilen idare qilinidighan döletlerning hakimiyet méxanizmi üchün normal bir ish ikenlikini, shexslerning arzusi boyiche emes, belki omumiy gewdining ortaq pikri boyiche ish körülidighan bundaq sistémida mesililerning otturigha qoyulushi we ilgirilishide köp tereplime amillarning rol oynaydighanliqini alahide tekitleydu.

Melum bolushiche, bu yéngi nöwetlik amérika hökümiti ish bashlighandin buyan Uyghur wekillirining eng yuqiri derijilik amérika siyasiyonliri bilen bolghan bir qétimliq resmiy uchrishishi bolup, bu xildiki uchrishishlarning bundin kéyin yenimu köplep otturigha chiqishi texmin qilinmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.