Германийәдә оқуп қайтқан доктор нәбиҗан һәбибулланиң тутқунда икәнлики дәлилләнди

Мухбиримиз шөһрәт һошур
2021-08-05
Share
Германийәдә оқуп қайтқан доктор нәбиҗан һәбибулланиң тутқунда икәнлики дәлилләнди Доктор нәбиҗан һәбибулла. (Вақти вә орни ениқ әмәс)
Oqurmen teminligen

Доктор нәбиҗан һәбибулла 2014-йили германийәниң готтиңгин университетини пүттүргинидә, чәтәлгә оқуш вә тәтқиқат үчүн чиққан көпинчә уйғур зиялийлириға охшашла әркин дуняда қелип қелиш яки асарәттики вәтинигә қайтип кетиштин ибарәт бир ачалға дуч кәлгән; һәр икки йолдики өзигә хас әвзәллик вә қийинчилиқлар үстидә узун ойланған нәбиҗан һәбибулла ахири юртиға қайтишқа қарар бәргән. Әмма қисмәт, у күткәндәк, әл қойнида хизмәт қилиш пурситини бәрмигән; әксичә бәзи достлири агаһландурғинидәк, қараңғу камерға солинип, әл үчүн хизмәт қилидиған қорали-мунбәр вә қәләмдин айрилип қалған. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Тордики материяллардин мәлум болушичә, доктор нәбиҗан һәбибулла 1983 ‏-йили лоп наһийәсидә туғулған, 2002‏-йили хотән педагогика алий техникоминиң хитай тили кәспини пүттүргән; 2006-йили шинҗаң педагогика университети, 2010‏-йили шинҗаң университети, 2011‏-йили мәркизий милләтләр университетлирида оқуған вә хизмәт қилған. 2012‏-Йили германийәниң готтингин университетиға оқушқа киргән нәбиҗан һәбибула 2014‏-йили мәктәп пүттүргинидә әтраптики савақдашлири тәрипидин уйғур райони вәзийитиниң яманлишип кетиватқанлиқи әскәртилип, юртиға қайтмаслиққа вә әркин дуняда яшаш һәм хизмәт қилишқа дәвәт қилинған.

Нәбиҗан һәбибулланиң достлири билән йеқин алақиси болған, норвегийәдики паалийәтчи абдувәли аюпниң баян қилишичә, нәбиҗан һәбибулла илмий тәтқиқатқа башчилап кириш вә җәмийәттики зиддийәтлик мәсилиләрдин өзини тартиш арқилиқ, өз бихәтәрликини қоғдиялайдиғанлиқини пәрәз қилған вә юртиға қайтқан. У юртиға қайтип 4 йилдин кейин из-дерәксиз ғайиб болған.

Телефонимизни қобул қилған шинҗаң университети кадирлар бөлүми хадими худди мәктәптики башқа тутқунларға охшашла нәбиҗан һәбибулла һәққидиму мәлумат бәрмиди. Һәтта униң хизмәт орнида бар яки йоқлуқи һәққидики соалимизғиму җаваб берәлмиди.

Мәлум болушичә, нәбиҗан һәбибулла германийәдин қайтқандин кейин, аввал бейҗиңдики мәркизий милләтләр университетиға, икки йилдин кейин шинҗаң университетиға ишқа орунлашқан. Дәсләптә ишлар униң күткинидәк оңушлуқ давам қилған: у 2016-йили 6-айда "хәнзучиға тәрҗимә қилинған кона уйғур буддист текистлиридики пеилларниң луғәт мәниси" намлиқ докторлуқ мақалисини мувәппәқийәтлик тамамлиған. Икки йил ичидә икки дөләт дәриҗилик, бир аптоном районлуқ дәриҗилик, бир мәктәп дәриҗилик 4 тәтқиқат түригә еришкән. 10 Нәччә парчә мақалиси нопузлуқ илмий журналларда елан қилинған. 2017‏-Йили "мунәввәр бакалавирлиқ мақалә йетәкчиси", "мунәввәр тәтқиқатчи" болуп баһаланған. Әмма 2018‏-йили 2 ‏-айға кәлгәндә, ишлири бирдинла тәтүригә меңип, мәктәптики бирқанчә сәркә оқутқучилар билән бирликтә "тәрбийәләш" кә елип кетилгән.

Шинҗаң университети хадимлири нәбиҗан һәбибулланиң әһвали һәққидә алақидар органлардин мәлумат елишимизни тәвсийә қилди. Әмма қайси орунниң алақидар икәнликини дәп бәрмиди.

Абдувәли аюп бу йил 3-айда нәбиҗан һәбибулланиң вәтән ичи-сиртидики йеқин достлири билән алақилишиш арқилиқ, униң бир ай бурун 15 йиллиқ кесилгәнлики һәққидә учур алған. Абдувәлиниң баян қилишичә, нәбиҗан һәбибулла мәзкур университетниң тутқундики профессори арслан абдулланиң оқуғучиси болуп, у арслан абдулланиң турсунҗан бәхти қатарлиқ икки докторанти билән бир вақитта тутулған. Абдувәли аюпниң игилишичә, нәбиҗан һәбибулла, 2018-йили 2-айниң мәлум бир күни университет қоғдаш бөлүмигә чақиртилған вә қоғдаш бөлүмидә сақлап турған үрүмчи шәһәрлик дөләт аманлиқ сақчиси тәрипидин қисқа бир сорақ қилинғандин кейин мәктәптин елип кетилгән.

Шинҗаң университети қоғдаш бөлүми хадими нәбиҗан һәбибулланиң шу күнлүктә тутулғанлиқи вә шинҗаң педагогика университетиға елип кетилгәнликини ашкарилиди. Илгири тутқундики шаир абдуқадир җалалидин һәққидә әһвал ениқлишимиз давамида, шинҗаң педагогика университетида мәхсус бир йиғивелиш орни тәсис қилинғанлиқи, үрүмчидики зиялийларниң аталмиш тәрбийәләшкә елип меңилиштин бурун, әнә шу йиғиливелиш орнида бир мәзгил тутуп турулғанлиқи мәлум болғаниди.

Мәзкур қоғдаш хадими, өзлириниң дөләт аманлиқ сақчилириға гумандарларни чақиртип әкелиш вә учраштуруш вә қамақханиға йөткәш ишлиридила һәмкарлишидиғанлиқи, делониң тәпсилатидин хәвири болмайдиғанлиқи, шуңа нәбиҗан һәбибулланиң тутулушидин хәвири болсиму, кесилишидин хәвирини йоқлуқини баян қилди.

Абдувәли аюп игилигән учурлири вә пәрәзлиригә асасән, нәбиҗан һәбибулланиң тутулуши вә 15 йиллиқ кесилишигә униң чәтәлдики оқуш һаяти, арслан абдулланиң оқуғучиси болғанлиқи вә уйғур мәдәнийәт тәтқиқатчиси икәликиниң сәвәб болғанлиқини илгири сүриду.

Юқирида, германийәдә оқуп қайтқан доктор нәбиҗан һәбибулланиң қамақта икәнликиниң дәлилләнгәнлики һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт