B d t ning nyu-yorktiki bash shitabi aldida xitay hökümitige qarshi namayish élip bérildi
2023.09.21

Birleshken döletler teshkilati (b d t) ning nyu-york shehiridiki bash shitabida échiliwatqan 78-nöwetlik yilliq omumi yighini 19-séntebir künidin 26-séntebirgiche dawamlishidighan bolup, xitay hökümitige wakaliten xitayning mu'awin dölet re'isi xen jéng mezkur yighin'gha qatnashqan.
21-Séntebir küni amérika Uyghur birleshmisi birleshken döletler teshkilatining nyu-york shehiridiki bash shitabining aldida xitay hökümitining Uyghurlargha qaratqan qirghinchiliqigha qarshi naraziliq namayishi teshkilligen.
Amérika Uyghur birleshmisining re'isi elfidar iltebir xanim, neq meydandin ziyaritimizni qobul qildi. Uning éytishiche, bu qétim yéghin échiliwatqan b d t bash shitabi etrapidiki bixeterlik tedbirliri alahide qattiq bolup, ular b d t binasining aldida turushqa ruxset qilinmighan. Shundaq bolsimu, namayish üchün toplan'ghan Uyghur kishilik hoquq qurulushi xadimliri, tibet we bashqa Uyghurlarni qollaydighan teshkilatlarning ezaliri b d t binasining qarshi teripidiki yolda turup, “Uyghur irqiy qirghinchliqini toxtat”, “B d t, xitayning jawabkarliqini sürüsh qil!” dégen sho'arlarni towlap, namayishni dawam qilghan.
Birleshme agéntliqning b d t 78-nöwetlik yilliq omumiy yighini heqqidiki xewirige qarighanda, xitayning mu'awin re'isi xen jéng yighin jeryanida b d t bash katipi antonyo guttérés we amérika tashqiy ishlar ministiri antoni bilinkén bilen ayrim-ayrim uchrashqan.
Uyghur kishilik hoquq qurulushining xadimi zubeyre shemsidin xanim radiyomizgha söz qilip, xitay hökümiti Uyghurlargha qarita irqiy qirghinchiliq élip bériwatqan mushundaq bir mezgilde ularning yene b d t dek muhim bir orunda özining teshwiqatini qiliwatqanliqini eyiblidi. U, yene b d t ning héchbolmighanda xitay emeldarliridin özliri élan qilghan Uyghurlar heqqidiki doklatning sürüshtisini qilishi kéreklikini tekitlidi.