Nyu-york we adélayd sheherliride qirghinchiliqqa qarshi namayish uyushturuldi

20-Féwral awstraliyening adélayd shehiride xitay Uyghurlargha yürgüzüwatqan irqiy qirghinchiliqqa qarshi namayish uyushturulghan. Namayishni awstraliye sherqiy türkistan jem'iyiti bilen “Démokratiyeni mudapi'e qilish” teshkilati birlikte teshkilligen bolup, namayishqa bir qisim yerlik parlamént ezalirimu qatnashqan we söz qilghan.

Amérikidiki Uyghur kishilik hoquq qurulushining tetqiqatchisi zubeyre shemshidin xanimning bildürüshiche, bu awstraliye siyasiyonlirining tunji qétim Uyghurlar teshkilligen namayishqa özliri biwasite qatnishi bolup hésablinidiken.

Uningdin bashqa, 20-féwral Uyghur amérika akadémiyesining orunlashturushi bilen nyu-york sheherde “A'ilem nede” herikitige awaz qoshup namayish ötküzüldi.

“A'ilem nede” herikiti türkiyede bashlan'ghan bolup, ötken bir nechche aydin buyan türkiyening istanbul we enqere sheherliridiki xitay elchixaniliri we muhim sayahet orunlirida dawam qilip kéliwatqan idi.

Namayish nyu-york waqti sa'et 1 de, birleshken döletler teshkilatining nyu-yorkta turushluq bash shtabi aldida bashlan'ghan. Kéyin u yerdin xirald meydanigha yötkelgen we eng axirda dewr meydanida chüshtin kiyin sa'et üch yérimighiche dawam qilghan.

Nyu-yorktiki Uyghur ziyaliysi memtimin doxturning radiyomizgha bildürüshiche, namayish jeryanida “Uyghurlargha erkinlik”, “Irqiy qirghinchiliq toxtitilsun”, “Lagérlar taqalsun” dégendek sho'arlar towlan'ghan we teshwiqat matériyalliri tarqitilghan.