25 Yashliq nigare abdushükürning késiwéitilgenliki delillendi, yéngihayat türmiside ikenliki ilgiri sürülmekte

Muxbirimiz shöhret hoshur
2020-02-27
Élxet
Pikir
Share
Print
Türkiyede oquwatqan oqughuchi zöhre abduméjitning 19 yilliq késiwétilgen 25 yashliq newre achisi nigare abdushükür.
Türkiyede oquwatqan oqughuchi zöhre abduméjitning 19 yilliq késiwétilgen 25 yashliq newre achisi nigare abdushükür.
Social Media

Bu yilning béshida ijtima'iy taratqularda ghuljadiki lagérda tutup turuluwatqan 25 yashliq nigare abdushükür bilen anisi merhabaning 19 yilliqtin késiwétilgenliki heqqide ularning chet'eldiki a'ile tawabi'atliri teripidin 4 xil tilda guwahliq bayanati élan qilin'ghan idi. Muxbirimizning ikki aydin artuq élip barghan éniqlashliri dawamida nigare we anisining késiwétilgenliki delillendi. Nöwette mehbus nigare abdushükürning ghulja sheheridiki yéngihayat türmiside jaza mudditini ötewatqanliqi ilgiri sürülmekte.

Türkiyede oquwatqan oqughuchi zöhre abduméjitning Uyghurche, türkche, in'gilizche we erebche 4 xil tilda bergen guwahliq bayanatida déyilishiche, 25 yashliq newre achisi nigare abdushükür bilen 53 yashliq chong'apisi merhaba 2017 ‏-yili28 ‏-noyabirda tutqun qilin'ghan we lagérgha ekitilgen. Ular 2018 ‏-yilning axiri 19 yilliqtin késiwétilgen. Bayanattin melum bolushiche, nigare we anisi ghulja shehiridiki döngmehellige nopusluq iken. 

Biz ghulja sheherlik edliye idarisi teminligen téléfon nomurlirigha asasen dömehellidiki melum bir ahaliler rayoni saqchi xadimidin melumat soriduq. Bu xadim özi mes'ul bolghan tewelikte 19 yilliqtin késilgen bu xil kimliktiki kishilerning yoq ikenlikini éytti. 

Nigare abdushükür we anisi merhaba heqqide ijtima'iy taratqularda yéqinqi ikki ayda köp qétimlap uchurlar tarqalghan we guwahliq bayanatliri bérilgen. Nigarening gérmaniyediki uruq-tughqanliridin gülzire tashmemetning féysbukida bayan qilinishiche, nigare shinjang pédagogika oniwérsitétini2017 ‏-yili7 ‏-ayda püttürgen. Ana tilidin bashqa xitayche we in'gilizchinimu puxta bilgen nigare abdushükür ish kütüp turghan mezgilide atalmish "Kespiy terbiye" ge élip kétilgen. 
Téléfonimizni qobul qilghan ghulja shehiridiki yene bir saqchi xadimimu özi bilidighan tutqunlar tizimlikide nigare abdushükür we merhaba isimlik kishilerning yoqluqini bayan qildi. Gülzire tashmemetning féysbuk we tiwittérdiki yazma bayanatlirida nigare abdushükürning dadisi abdushükür mehemmetning ghulja shehiridiki ronaq tapqan tijaretchilerdin biri ikenliki, uning belgilik derijide muqim mülük sahibi ikenliki, shunga bu a'ile ezalirining xitayning "Kespiy terbiye" leshlirige éhtiyaji yoqluqi eskertilgen. 

Gülzirening yurtidiki tonushliridin anglighanlirigha asasen perez qilishiche, nigare gérmaniyediki akisi bilen téléfonda sözleshkenliki, anisi merhaba bolsa 2015 ‏-yili türkiyege ikki heptilik sayahetke kelgenliki üchün tutqun qilin'ghan iken. Téléfonimizni qobul qilghan bir saqchixana bashliqi nigare bilen merhabaning késilgen mudditi we sewebi heqqidiki so'alimizgha jawap bérishni ret qilish dawamida u ikkisining késilip bolghanliqini delillidi. Emma qanche yilliq késilgenliki heqqide, yuquri derijilik xadighlardin melumat élishimizni tewsiye qildi. 

Téléfon ziyaretlirimiz dawamida döngmehellidiki ahalilerdin biri nigare abdushükürning nöwette yéngihayat türmiside ikenlik éhtimaliqini otturigha qoydi. Téléfonimizni qobul qilghan bir edliye xadimi tizimlikke qarap chiqqandin kéyin nigare abdushükürning yéngihayat türmiside bolush éhtimalliqini tekitlidi. 

Hörmetlik radiyo anglighuchilar, yuqiriqi éniqlashlirimizdin nigare abdushükür we anisi merhabaning késiwétilgenliki delillendi. Emma 19 yilliqtin késilgenliki téxi delillenmidi.

Toluq bet