Uyghur irqiy qirghinchiliqini étirap qildurush guwahliq yighini norwégiye parlaméntida bashlandi

Ixtiyariy muxbirimiz ekrem
2022.10.18
Uyghur irqiy qirghinchiliqini étirap qildurush guwahliq yighini norwégiye parlaméntida bashlandi Norwégiye parlaméntida parlamént ezaliri, lagér shahitliri, Uyghur siyasiy aktipliri we norwégiyediki Uyghur jama'itining ishtirakida ötküzülgen Uyghur irqiy qirghinchiliqi toghrisida guwahliq bérish yighinidin körünüsh. 2022-Yili 17-öktebir.
RFA/Ekrem

Norwégiye Uyghur komitéti, “Uyghur edliye arxip ambiri”, d u q we norwégiye parlaméntidiki 4 chong partiyening hemkarliship uyushturushi bilen 17-öktebir küni norwégiye parlaméntida parlamént ezaliri, lagér shahitliri, Uyghur siyasiy aktipliri we norwégiyediki Uyghur jama'itining ishtirakida Uyghur irqiy qirghinchiliqi toghrisida guwahliq bérish yighini bashlandi.

Guwahliq yighinining muqeddimiside norwégiye yéshillar partiyesining sözchisi hansson rasmus, lébirallar partiyesining re'isi mélbiy guri, xiristiyan démokratlar partiyesining ezasi ulshitayin dag, norwégiye parlaménti da'imiy komitétining ezasi unnéland andériyas, norwégiye Uyghur komitétining sékritari adiljan abduréhimlerning sözliridin kéyin, “Uyghur sot kollégiyesi” ning sotchisi jéfféry nayis ependi Uyghur irqiy qirghinchiliqi toghrisida toxtilip ötti.

Norwégiye parlaméntidiki Uyghur irqiy qirghinchiliqidin guwahliq bérish pa'aliyitige maslashqan halda, norwégiye parlamént binasi aldida Uyghur jama'iti ötküzgen namayishtin körünüsh. 2022-Yili 17-öktebir.
Norwégiye parlaméntidiki Uyghur irqiy qirghinchiliqidin guwahliq bérish pa'aliyitige maslashqan halda, norwégiye parlamént binasi aldida Uyghur jama'iti ötküzgen namayishtin körünüsh. 2022-Yili 17-öktebir.
RFA/Ekrem

17-Öktebir chüshtin burunqi shahitlarning jaza lagérliri toghrisida guwahliq bérishi, aldi bilen shiwétsiyediki lagir shahiti sayragül sawutbayning guwahliqi bilen bashlandi. Uning arqidin gollandiyediki lagér shahiti ömer bék'ali guwahliq berdi. Uning arqisidin fransiyediki lagér shahiti gülbahar xatiwaji söz qildi. Uningdin kéyin gollandiyediki lagér shahiti qelbinur sidiq guwahliq bérip ötti. Ularning guwahliqidin kéyin, amérikadiki kommunizim qurbanliri fondining tetqiqatchisi doktur adriyan zénz guwahliq berdi.

Norwégiye parlaméntidiki Uyghur irqiy qirghinchiliqidin guwahliq bérish pa'aliyitige d u q re'isi dolqun eysa ependimu qatnashqan bolup, u adriyan zénzdin kéyin guwahliq bérip, öz anisining jaza lagérlirida qurban bolghanliqini, akisi we inisining ghayip bolghanliqini tilgha élip ötti.

Norwégiye parlaméntidiki Uyghur irqiy qirghinchiliqidin guwahliq bérish pa'aliyitige maslashqan halda, norwégiye parlamént binasi aldida Uyghur jama'iti ötküzgen namayishtin körünüsh. 2022-Yili 17-öktebir.

17-Öktebir dolqun eysa ependi norwégiye paytexti oslodin bu heqte ziyaritimizni qobul qilghanda, bu qétimqi guwahliq pa'aliyitining nahayiti etrapliq we tesirlik élip bérilghanliqini bildürdi. U, norwégiye parlaméntining Uyghur irqiy qirghinchiliqi toghrisida ijabiy bir qarar qobul qilishigha ümid bilen qaraydighanliqini eskertti. Norwégiye Uyghur komitétining re'isi, “Uyghur edliye arxip ambiri” ning mudiri bextiyar ömer ependimu bu xususta öz qarashlirini bayan qilip ötti.

17-Öktebir bashlan'ghan norwégiye parlaméntidiki Uyghur irqiy qirghinchiliqidin guwahliq bérish pa'aliyitige maslashqan halda, norwégiyediki Uyghur jama'itimu parlamént binasi aldida namayish uyushturghan. Bextiyar ömer ependi bu heqtimu melumat bérip ötti.

D u q ijra'iye komitétining mu'awin re'isi semet abla ependi norwégiyediki guwahliq bérish pa'aliyitining intayin tesirlik bolghanliqini bayan qildi. Lagér shahiti sayragül sawutbaymu bu heqte öz tesiratlirini ipade qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.