Лагерда вәзипә өтигән сақчи нурмәмәт йүсүпниң өзини өлтүрүвалғанлиқи ашкариланди

Мухбиримиз шөһрәт һошур
2021-10-06
Share
Лагерда вәзипә өтигән сақчи нурмәмәт йүсүпниң өзини өлтүрүвалғанлиқи ашкариланди Қораллиқ сақчилар аталмиш "кәспий маарип мәркизи" ниң тәкшүрүш понкитини контрол қилған көрүнүш. 2018-Йили 4-сентәбир, ғулҗа.
REUTERS

Үрүмчидә лагер тутқунини қанат астиға елиш гумани билән сорақ қилинған сақчи нурмәмәт йүсүп өзини өлтүрүвалған.

Радиомзиға инкас қилинишичә, үрүмчи ат бәйгиси мәйдани сақчиханисиниң хадими нурмәмәт йүсүп, лагерда вәзипә иҗра қилиш давамида, бир тутқунға җиддий бир әһвалда инсаний нуқтидин йеқинчилиқ қилған. Униң бу қилғини сақчи даирилири тәрипидин байқилип қелип, үстидин тәкшүрүлүш елип берилған. Тәкшүрүлүш давам қиливатқан мәзгилидә, у өзини өлтүрүвалған. Буниңдин икки айчә аввал йүз бәргән бу вәқә мухбиримизниң үрүмчидики сақчи органлириға қарита елип барған телефон зиярәтлири нәтиҗисидә дәлилләнди. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.

Мәлум болушичә, уйғур районидики лагер вә түрмиләрдә давам қиливатқан ғәйрий инсаний иҗраатлар, тутқунларнила әмәс, бир қисим вәзипә иҗра қиливатқан хадимларниму азабқа салмақта. Бихәтәрлик нуқтисидин өз кимликини ашкарилашни халимайдиған, вәқәдин хәвәрдар кишиниң радийомизға инкас қилишичә, үрүмчи ат бәйгиси мәйдани сақчиханисиниң хадими нурмәмәт йүсүп дәл әнә шу азабниң васитилик бир түрткисидә һаятидин айрилған. Мәлум болушичә, сақчи нурмәмәт йүсүпниң өлүми бир мәзгил җәмийәт вә сақчи хадимлиридинму сир тутулған, әмма йеқинқи икки һәптидин буян сақчи хадимлириниң еғизлирида тарқилишқа башлиған вә бу һәқтә алақидар сақчи органлирида йиғинлар ечилған; әмма бу йиғинларда, нурмәмәт йүсүпниң өлүминиң тәпсилати вә яки бу өлүм хәвирини сир тутуш һәққидә сөз болуватқанлиқи мәлум әмәс.

Радийомизға кәлгән инкаста, нурмәмәт йүсүпиң өлүм сәвәби һәққидә мунулар қәйт қилинған: нурмәмәт йүсүп икки йил илгири үрүмчи мидоң районидики лагерда бир йил вәзипә өтигән болуп, у вәзипә өтәш җәрянида ятиқида қан қусуватқан бир тутқунға, ярдәм қилип униң еғиз бурунлирини сүрткән вә каривитиға ятқузған. Униң бу һәрикитидики силиқ-сипайилиқ униң билән биргә вәзипә өтәватқан хитай сақчиниң диққитини тартқан вә у бу әһвални сақчи башлиқлириға мәлум қилған. Дейилишичә, нурмәмәт йүсүп шу күнниң өзидила сақчи идарисиниң интизам тәкшүрүш хадимлири тәрипидин сөһбәткә чақиртилған, нурмәмәт шу күнлүк сөһбәттә өз қилмишиниң нормал бир вәзипә иҗра қилиш икәнликини доклат қилған.

Алақидар бир сақчи хадими нурмәмәт йүсүпниң бир мәзгил лагерда вәзипә өтигән-яки өтимигәнлики һәққидә мәлумат бәрмиди. Әмма нурмәмәтниң өзини етивалғанлиқидин хизмәтдашлири арқилиқ хәвәр тапқанлиқини, икки һәптиниң алдида, бу һәқтә сақчиханида бир йиғинму ечилғанлиқини ашкарилиди.

Инкас қилинишичә, нурмәмәт йүсүп, лагердики шу тутқунға ярдәм қилғанлиқи сәвәблик аридин икки йил өткәндә, йәни бу йил 8 ‏-айда қайтидин тәкшүрүлгән; тәкшүрүш бу қетим, үрүмчи шәһәрлик дөләт аманлиқ сақчилири тәрипидин елип берилған. Бир дөләт аманлиқ хадими өзиниң нурмәмәт йүсүпни сорақ қилғанлиқини инкар қилмиди. У нурмәмәт йүсүп өзини етивалғандин кейин, нурмәмәт йүсүп һәққидики делониң материяллирини алақидар бөлүмләргә тапшуривәткәнликини тилға алди. Биз униңдин нурмәмәтниң өзини етивелиш сәвәбини сориғинимизда, бу соалға җаваб беришни қопаллиқ билән рәт қилди. Биз униңдин, нурмәмәт йүсүпниң қандақ бир гуман билән сорақ қилинғанлиқини сориғинимизда униң "җинайәтчини қанат астиға елиш" гумани билән тәкшүрүлгәнликини дәлиллиди.

Инкаста дейилишичә, нурмәмәт йүсүп икки қетимлиқ сорақтин кейин, 3 ‏-қетимлиқ сораққа йәни тутуп турулуп тәкшүрүлүш басқучиға кәлгәндә, ат бәйгиси мәйдани сақчиханисидики ишханисида өзини етивалған.

Нурмәмәт йүсүпнң җәситиниң аилисигә берилип берилмигәнлики вә өлүм тәпсилатиниң аилисигә билдүрүлүп-билдүрүлмигәнлики һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт