Нури түркәлниң “қечши йоли йоқ” намлиқ китаби хәлқара “мор фонди мукапати” ға еришкән

Мухбиримиз җәвлан
2023.01.19
nury-turkel-no-escape.jpg Америка хәлқара диний әркинлик комитетиниң рәиси нури түркәл әпәнди вә униң “қечиш йоли йоқ: хитайниң уйғурларға йүргүзүватқан ирқий қирғинчилиқи һәққидики раст вәқәләр” намлиқ китаби.
Photo: RFA

Америка хәлқара диний әркинлик комитетиниң рәиси нури түркәл әпәндиниң “қечиш йоли йоқ: хитайниң уйғурларға йүргүзүватқан ирқий қирғинчилиқи һәққидики раст вәқәләр” намлиқ китаби 2022-йиллиқ хәлқара “мор фонди мукапати” ға еришкән.

“мор фонди мукапати” 1-айниң 13-күни өзиниң тиветтер һесабида “қечиш йоли йоқ” намлиқ китаб һәққидә мундақ баһа бәргән: “нури түркәл әпәндиниң дадиллиқ билән йезип чиққан бу алаһидә һекайиси тунҗи оқуштила бизни һәйран қалдурди. Биз бу йил оқуған көплигән есил китаблар ичидә бу китаб кишини алаһидә җәлп қилиду. Китабта хитайда һелиһәм давамлишиватқан ирқий қирғинчилиқ вә мәҗбурий әмгәк қуллириға айланған бир милләтниң һаяти әтраплиқ, җанлиқ, образлиқ йорутуп берилгән”.

Нури түркәл әпәнди бу китабниң мукапатлинишиға аит тәсиратлирини биз билән ортақлашти. Униң ейтишичә, бу китаб нәшр қилинған 7 айдин бери уйғурларниң бешиға кәлгән ирқий қирғинчилиқ апитини дуняға аңлитишта, шундақла хитайниң дуняға кәлтүрүватқан апитини чүшәндүрүштә муһим рол ойниғачқа өз қиммитини йоқатмиған вә техиму кәң оқурмәнләрниң диққитигә сазавәр болған.

Нури түркәл әпәнди өзиниң тивиттер һесабида “бу мукапат хитайниң йиғивелиш лагерлирида вә түрмилиридә йетиватқан милйонлиған уйғурларға тәвә” дәп язған. У радийомизға қилған сөзидиму “мор фонди мукапати” ниң әһмийити вә шан-шәрәпниң йәнила өз хәлқигә мәнсуп икәнликини тәкитлиди.

Нури түркәл әпәнди бу китабиниң мукапатқа еришишидики сәвәбни “бу китабниң “бир нуқтида һәммини йорутуш” услубида йезилғанлиқи; шәхсниң һекайиси арқилиқ бир коллектип дуч кәлгән қирғинчилиқни аңлатқанлиқи; хитайниң хәлқара тәһдитини дуняға һес қилдуруп, һечкимниң бу мәсилидин қачалмайдиғанлиқини оттуриға қойғанлиқи” дәп қарайдиғанлиқини билдүрди.

“мор фонди мукапати” (Christopher G Moore Foundation) 2015-йил тәсис қилинған болуп, дунядики кишилик һоқуқ қиммәт қаришини қоғдайдиған вә уни илгири сүридиған ахбарат түридики әсәрләргә берилидикән.

Нури түркәл әпәнди йәнә бу китабниң инглиз тилидин башқа тилларғиму тәрҗимә қилиниш алдида туруватқанлиқини, чәт әлдики китаб йәрмәнкилиридә техиму көп оқурмәнләргә тонулуватқанлиқи вә сетиливатқанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.