Uyghur, tibet, mongghul we xongkongluqlar yaponiyede béyjing qishliq olimpik musabiqisige qarshi namayish qildi

Ixtiyariy muxbirimiz erkin tarim
2021-04-27
Share
Uyghur, tibet, mongghul we xongkongluqlar yaponiyede béyjing qishliq olimpik musabiqisige qarshi namayish qildi Uyghur, tibet mongghul we xongkongluqlar yaponiyening nagasaki shehiride ötküzgen birleshme namayishidin körünüsh. 2021-Yili 25-aprél.
RFA/Erkin Tarim

Yaponiyediki Uyghur, tibet mongghul we xongkongluqlar yaponiyening nagano shehiride birleshme namayish ötküzüp her qaysi döletlerni 2022-yili xitayda ötküzülmekchi bolghan qishliq olimpik musabiqisige qarshi turushqa chaqirdi.

25-Aprél küni ötküzülgen namayishqa dunya Uyghur qurultiyi, yaponiyede pa'aliyet élip bériwatqan tibetlikler jem'iyiti, mongghul, xongkongluqlarning ammiwi teshkilatliri we yaponluqlarning ammiwi teshkilatidin bolup 11 teshkilattin 60 etrapida kishi ishtirak qildi. Namayishta qollirida bayraqlirini we xitaygha qarshi luzunkilarni kötürüwalghan namayishchilar dunyadiki her qaysi döletlerni 2022-yili xitayda ötküzülmekchi bolghan qishliq olimpik musabiqisini bayqut qilishqa chaqirish bilen birlikte, xitayni Uyghur, tibet, mongghul we xongkongluqlargha élip bériwatqan basturush siyasitini derhal toxtitishqa chaqirdi.

Mezkur birleshme namayish toghrisida dunya Uyghur qurultiyining yaponiyediki wekili ilham mexmut ependi melumat berdi.

Ilham maxmutning éytishiche, 2008-yili 4-ayning 18-küni béyjing olimpik mesh'ilige ot yéqishtin burun yaponiyening nagasaki shehiride xitayda ötküzülmekchi bolghan olimpik musabiqisige qarshi naraziliq namayishi ötküzülgeniken.

13 Yildin kéyinki bügünki künde oxshash waqitta oxshash meydanda kéler yili xitayda ötküzülmekchi bolghan qishliq olimpik musabiqisini bayqut qilish pa'aliyiti ötküzülgen. 13 Yil burunqi namayishqa ishtirak qilghan ilham maxmut ependi, 13 yil burun namayishchilar pütün dunyani xitaydiki kishilik hoquq depsendichilikini toxtitishqa chaqirghan bolsimu herqaysi döletlerning pisent qilmighanliqini, bügünki künde xitayning dunyaning tinchliqini buzuwatqanliqini bayan qildi.

Ilham maxmut ependi birleshme namayish jeryanida tibet teshkilatining re'isi sözligen sözide xitayning Uyghurlargha élip bériwatqan qattiq basturush siyasiti heqqide toxtalghanliqini bildürdi.

Ilham maxmut ependi döletlerni 2022-yili xitayda ötküzülmekchi bolghan qishliq olimpik musabiqisini bayqut qilishqa chaqirish pa'aliyitide söz qilghan yaponiyede pa'aliyet élip bériwatqan mongghul jem'iyiti mes'uliningmu Uyghur mesilisi toghrisida toxtalghanliqini bayan qildi.

Ilham maxmut ependi pa'aliyetning muweppeqiyetlik ötkenlikini, axbaratlardimu orun bérilgenlikini tekitlidi.

Mezkur namayishta 11 ammiwi teshkilat ortaq élan qilghan metbu'at bayanatta eger 2022-yilidiki qishliq olimpikning béyjingda échilishigha ruxset qilinsa, olimpik rohi ziyan'gha uchraydighanliqini, olimpik musabiqisining rohini qoghdap qélish üchün, eger xitay azsanliq milletlerge élip bériwatqan bésim siyasitini toxtatmisa béyjingda ötküzülmekchi bolghan 2022-yili qishliq olimpik musabiqisini bayqut qilishqa dawam qilidighanliqi bayan qilin'ghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet