Yawropadiki Uyghur ösmürliri bérlin'gha jem bolup, “Ötmüshke qaytish” pa'aliyiti ötküzgen

Yawropa döletliridin kelgen Uyghur ösmürliri gérmaniye paytexti bérlinda “Ötmüshke qaytish” pa'aliyitige qatnashqan.

D u q tetqiqat merkizining orunlashturushi bilen Uyghur ana til mektepliride derske qatnishiwatqan en'giliye, fransiye, bélgiye, norwégiye, shiwétsiye, finlandiye qatarliq yawropa döletliridiki Uyghur ösmürliri 7-aprildin bashlap gérmaniye paytexti bérlinda “Ötmüshke qaytish” pa'aliyitige qatnashqan.

Bérlindin ziyaritimizni qobul qilghan d u q ijra'iye komitétining mu'awin re'isi semet abla ependining bildürishiche, yawropa döletliridiki Uyghur ösmürlirini bir sorun'gha jem qilip, öz'ara tonushush pursiti yaritip bérish we ularni Uyghurlarning tarixiy medeniyiti bilen uchrashturush tunji qétimliq ish bolup, bu ishtin balilarmu, ata-anilarmu köp xursen bolghan. “Ötmüshke qaytish” namliq bu pa'aliyetke 10 yashtin 15 yashqiche bolghan ariliqtiki 26 neper Uyghur ösmürliri ishtirak qilghan. Pa'aliyet 10-aprilgha qeder dawamlashqan.

Bu qétimqi pa'aliyetning yétekchiliridin biri bolghan d u q tetqiqat merkizining mudiri abduweli ayup ependining bayan qilishiche, ular sepirining tunji qedimide Uyghur ösmürlirige gérmaniyening paytexti bérlin toghrisida izahat bérip, bérlinning 2-dunya urushida weyran bolghan bir sheher ikenlikini, xuddi bérlin'gha oxshash nöwette Uyghur qedimiy sheherliriningmu xitaylar teripidin weyranchiliqqa uchrawatqanliqini, gérmanlar bérlinni qayta qurup chiqqan'gha oxshash, Uyghurlarningmu öz wetinini, öz medeniyitige layiq Uyghur sheherlirini qaytidin qurup chiqishqa ihtiyaji barliqini chüshendürgen.

Abduweli ayup ependining bildürüshiche, Uyghur ösmürliri bérlinda yene 2-dunya urushi mezgilide yehudilar qirghin qilin'ghan jaza lagérlirini ziyaret qilghan. Pa'aliyet yétekchiliri bu arqiliq nöwette Uyghurlar uchrawatqan irqiy qirghinchiliq mesilisini Uyghur ösmürlirige téximu inchikilep chüshendürgen we yehudilar aqiwet qed kötürgendek, Uyghurlarningmu haman bir küni qed kötüridighanliqini ilgiri sürgen. Shuning bilen birge, Uyghur ösmürliri bérlinda xumboldt muzéyidiki Uyghurlargha a'it ming öy resimlirini ziyaret qilip, öz ejdatlirining shanliq medeniyiti bilen tonushush pursitigha érishken.

Qazaqistandin kelgen ressam gülnaz xanim bu pa'aliyet munasiwiti bilen ziyaritimizni qobul qilghanda, Uyghur ösmürlirining ijil-inaqliqidin bek memnun bolghanliqini tilgha aldi.

En'giliye Uyghur ana til mektipining oqutquchisi atikem xanimmu bu pa'aliyetlrining ehmiyiti heqqide öz qarashlirini ipade qilip ötti.