Öy bézeshni "Üchleshtürüsh" dolquni Uyghur medeniyitige buzghunchiliq, xitay shirketlirige bayliq élip kelgen

Muxbirimiz shöhret hoshur
2020-01-06
Élxet
Pikir
Share
Print
"Bawdi" bazirida sheher ahaliliri chaghanliq asma buyumlarni tallawatqan körünüsh. 2016-Yili 16-yanwar, korla.
"Bawdi" bazirida sheher ahaliliri chaghanliq asma buyumlarni tallawatqan körünüsh. 2016-Yili 16-yanwar, korla.
uy.ts.cn

Xitay da'irilri "Diniy esebiylikke qarshi turush" namida meschitlerni, "Sotsiyalistik yéngi yéza qurush" namida milliy qiyapettiki mehellilerni buzghan bolsa, emdilikte "Üchleshtürüsh" nami bilen öy bézeshnimu xitaychilashturuwatqanliqi ashkarilandi. Melum bolushiche, Uyghur medeniyitige buzghunchiliq élip kelgen bu "Üchleshtürüsh", yeni xitaychilashturush dolquni rayondiki öy saymanliri sodisi qilidighan xitay karxanilirigha zor miqdarda pul tépish pursiti yaritip bergen.

Weziyettin xewerdar kishiler aldinqi aylarda radiyomizgha uchur yollap, qeshqer nezerbaghda "Sotsiyalistik yéngi yéza" berpa qilish namida mewjut qedimiy mehellilerning, bostanliq kochilarning buzuluwatqanliqi we ahalilerning katekche shekilde sélin'ghan qorular bilen tolghan chet-yaqidiki del-derexsiz ahaliler rayonigha köchürülüwatqanliqi, ahalilerning yene yéngi öylerge köchkende ilgiriki milliy tüstiki öy-saymanlirini tashliwétishke mejburliniwatqanliqini melum qilghan idi. Bu heqte élip barghan éniqlashlirimiz dawamida nezerbaghdiki alaqidar xadimlar bu heqte éghiz échishni ret qildi.

Yenimu ilgirilep élip barghan éniqlashlirimiz dawamida qeshqer yéngisheherde inkastiki ehwalning eynen dawam qiliwatqanliqi melum boldi. Yéngisheherde xizmet guruppisida wezipe ötewatqan bir xadim öydiki gilemlerning tökülüwatqanliqi, kigizlerning élip tashlan'ghanliqi, bularning ornigha safa, benchang qoyulghanliqini ashkarilidi. U yene bu ishlarning "Üchleshtürüsh" dégen nam astida mexsus xizmet süpitide orundiliwatqanliqini tilgha aldi.

Lagér guwahchisi zumret dawut rayonda dawam qiliwatqan öy bézeshni xitaychilashturush dolquni sewebidin ürümchidiki öy-saymanliri dukanlirining 2018‏-yili bir mehel ambarlirining quruqdilinip qalghanliqini, özining soda-sétiq kechürmishlirige asasen bayan qildi. U sözide öy bézeshni xitaychilashturushning Uyghur medeniyitige qarita bir buzghunchiliq élip kelgen bolsa, rayondiki xitay shirketlirige pul tépish pursiti yaritip bergenlikini ilgiri sürdi.

Xitay taratqulirida ilgiri xitay da'irilirining yézilarda atalmish zamaniwi turmush aditige köchüsh üchün 4 milyard 196 milyon yüen pul ajratqanliqi, bu pul bilen yéza ahalilirining öy bézeklirini yéngiche tüske kirgüzgenlikini xewer qilghan idi. Emma xewerlerde milliy posun, milliy zoq we adetlerning chetke qéqiliwatqanliqi tilgha élinmighan idi.

Guma nahiyesidin téléfonimizni qobul qilghan bir ahalimu öz mehelliside öy bézeshte özgirish bolghanliqini, öyliride kégiz-gilemler ornigha safalar orunlashturulghanliqi, hetta jöriliri lagérdin chiqip qalsa, öylirini tonumay qélishi mumkinlikini tilgha alghan idi. Zumret dawut buning tebi'iy bir qiziqishtiki özgirish bilen emes, belki da'irilerning telipi, tewsiyesi, nöwiti kelgende buyruqi bilen ijra qiliniwatqanliqini ilgiri sürdi.

Toluq bet