Pakistanning panahliq izdep chiqqan Uyghurlargha zerbe bériwatqanliqi melum

Muxbirimiz memetjan jüme
2021-05-23
Share
omer-ugyhur-wexpi-omerjan-duq-wekili-1.jpg Urush rayonlirida yashawatqan Uyghur muhajirlarning ehwalini éniqlash we tégishlik yardemde bolush üchün afghanistan'gha kelgen ömer Uyghur wexpining mes'uli ömerjan. 2015-Yili öktebir.
RFA

Pakistanning xitayning ziyankeshlikidin qéchip, mezkur döletke panahliq izdep chiqqan Uyghurlargha zerbe bériwatqanliqi melum.

"Ways" agéntliqining xewer qilishiche, pakistandiki "Ömer Uyghur wexpi" ning qurghuchisi ömer Uyghur ependim yillardin buyan xitaydin qachqan onlighan Uyghurning pakistan'gha kélip panahlinishigha yardemde bolghan.

U munda dégen: "Eger men ulargha yardem qilmisam, kim yardem qilidu? men nurghun Uyghur a'ililirining mesilisini hel qilishigha yardem qildim. Xuda xalisa, buningdin kéyinmu shundaq qilimen."

Halbuki, nöwette hazir pakistanning weziyiti nacharlashqan. Xitay hökümitining bésimi astida pakistan saqchiliri Uyghurlarni xitaygha qayturushqa bashlighan bolup, pakistanni emdi bu döletke qéchip chiqqan Uyghurlarning bixeter panahgahi, dep qarashqa bolmaydiken.

Xewerge qarighanda, pakistan da'iriliri "Xitay-pakistan iqtisadiy karidori" qurulushi üchün xitaydin alghan 60 milyard dollarliq qerz meblighi sewebidin xitayning qattiq bésimigha duch kelgen.

Xewerde körsitishiche, ömer Uyghurning himayisige érishken Uyghur musapirlardin biri bolghan niyaz ghopur: "Pakistan hökümiti xitay buyrughan her qandaq ishni qilidu. Uyghurlar 'xitay-pakistan iqtisadiy karidori' sewebidin qattiq iztirap chékiwatidu," dégen.

Melum bolushiche, xitay pasportluq Uyghurlarning pakistanda turushi qéyinlashqandin kéyin "Ömer Uyghur wexpi" ulargha 3-bir dölettin panahgah izdeshke bashlighan. Ömer Uyghurning éytishiche, xitay hökümiti xitay pasporti bar Uyghurlarning pakistandin ayrilishini hessilep tesleshtürgendin kéyin, ömer Uyghur b d t ning munasiwetlik organlirigha muraji'et qilishqa bashlighan.

Xewerde körsitishiche, nöwette pakistan da'iriliri pakistanda turuwatqan Uyghurlarning bi'ologiyelik uchurlirini toplashqa bashlighan.

Ömer Uyghurning pakistandiki Uyghurlargha tarqitilghan bir jedweldin misal élip körsitishiche, "Diniy étiqadi", "A'ile tarixi" qatarliq so'allar mezkur jedweldin orun alghan iken.

2019-Yili, xitayning 1. 8 Milyondin 3 milyon'ghiche Uyghurni lagérlargha tashlighanliqi heqqidiki so'allargha duch kelgen pakistan bash ministiri imran xan Uyghurlarning weziyitidin xewersiz ikenlikini éytqan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet