Doktor turdi muhemmed abdulla tébbiy dawalash matériyali tetqiqatida 7 qétim patént hoquqigha érishken

Muxbirimiz méhriban
2021-10-18
Share
Doktor turdi muhemmed abdulla tébbiy dawalash matériyali tetqiqatida 7 qétim patént hoquqigha érishken "Istanbul téxnologiye uniwérsitéti" ximiye fakultétining, bi'o-ximiye matériyallar tetqiqatchisi doktor turdi muhemmed abdulla ependi tejribixanisida xizmet üstide. 2021-Yili 14-öktebir, istanbul, türkiye.
Dr. Turdi Muhemmed Abdulla teminligen

"Istanbul téxnologiye uniwérsitéti" ximiye fakultétining, bi'o-ximiye matériyallar tetqiqatchisi doktor turdi muhemmed abdulla, 14-öktebir küni amérika patént idarisidin, öz tetqiqat türidiki yene bir keshpiyatining paténti heqqide xosh xewer tapshuruwalghan.

Doktor turdi muhemmed ependining 15-öktebir radiyomizgha bildürüshiche, bu uning 2020-yili 6-aydin buyan tébbiy dawalashta ishlinidighan bi'oximiyelik matériyallar tetqiqatida érishken 7-qétimliq tetqiqat netijisi iken.

Doktor turdi muhemmet ependi amérika patént idarisi teripidin étirap qilin'ghan 7 qétimliq tetqiqat netijisini tonushturdi. Uning bildürüshiche, uning tetqiqat netijiliri tébbiy dawalashta, yeni opératsiyede adem bedinige ishlitilidighan bi'oximiyelik matériyallar tetqiqatigha tewe iken.

Tetqiqatchisi doktor turdi muhemmed abdulla ependige amérika patént idarisidin 2020-yili iyun we 2021-yili öktebirde kelgen xetliri. (Bu xette doktorning ismi xitay pasportidiki ismi asas qilin'ghan)
Tetqiqatchisi doktor turdi muhemmed abdulla ependige amérika patént idarisidin 2020-yili iyun we 2021-yili öktebirde kelgen xetliri. (Bu xette doktorning ismi xitay pasportidiki ismi asas qilin'ghan)

Doktor turdi muhemmet abdulla ependining bildürüshiche, bu qétim paténtqa érishken tetqiqatini u 2016-yili bashlighaniken.

Doktor turdi muhemmed 2011-yili "Shangxey tungji uniwérsitéti" ning ximiye inzhénériliqi kespini tügetken. 2011-Yili yil axirida se'udi erebistandiki "Abdul eziz xanliq uniwérsitéti" da ximiye inzhénériliqida magistirliq oqushini bashlighan. 2015-Yili yene mezkur uniwérsitétta doktorluq oqushini bashlighan. Uning bildürüshiche, hazirgha qeder 7 qétim patént hoquqigha érishken bi'oximiyelik matériyallar tetqiqati uning 2016-yili bashlighan doktorluq tetqiqati we uningdin kéyinki "Postdok", yeni doktor ashtiliq tetqiqat netijisining dawami iken. U 2019-yildin bashlap, ustazliri we bu sahediki adwokatning teklipi bilen özining tetqiqat netijilirini birqanche tür boyiche, amérika patént idarisige yollighaniken.

Turdi muhemmet ependi yene "Abdul eziz xanliq uniwérsitéti" da doktorluq oquwatqan mezgilide, tetqiqatida yétekchi bolghan ustazliridin, mezkur uniwérsitétning nanu téxnika merkizidiki proféssor annan mémik ependige bolghan minnetdarliqini alahide tekitlep ötti.

U özining 1986-yili xoten shehiri laskoy baziridiki bir déhqan a'iliside tughulghanliqini, bashlan'ghuch we ottura mektepni Uyghur tilida oqughanliqini eskertti. Uning tekitlishiche, Uyghur ana til ma'aripi nechche ewlad munewwer Uyghur ziyaliylirini terbiyelep yétishtürgen. Halbuki bügünki kün'ge kelgende Uyghur ana til ma'aripining xitay hökümiti teripidin cheklinip, weyran qilinishi Uyghurlar üchün ornini toldurghusiz zor yoqitish élip kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet