Aqsudiki emeldarlardin perhat namanning "Ikki yüzlimichilik" gumani bilen tutulghanliqi ilgiri sürülmekte

Muxbirimiz shöhret hoshur
2020-06-09
Share
perhat-naman.jpg "Ikki yüzlimichilik" gumani bilen tutulghan, aqsu wilayetlik soda-sana'etchiler birleshmisining mu'awin re'isi perhat naman.
Oqurmen Teminligen

Ötken ayda Uyghur aptonom rayonluq partkom intizam tekshürüsh komitéti aqsu wilayetlik soda-sana'etchiler birleshmisining mu'awin re'isi perhat naman qatarliq 3 neper emeldarning "Intizamgha éghir derijide xilapliq qilghanliqi" üchün ular üstidin tekshürüsh élip bériliwatqanliqini élan qilghan, emma ularning konkrét qaysi tüzümge xilapliq qilghanliqini tilgha almighan idi. Muxbirimizning radiyomizgha kelgen bir inkasqa asasen élip barghan éniqlashliri dawamida perhat namanning "Ikki yüzlimichilik" gumani bilen tutulghanliq éhtimalliqi ashkarilandi.

Xitay taratquliri 5-ayning 23‏-küni keng-kölemde tarqatqan bir xewiride Uyghur rayonida nahiye we nahiye derijiliktin yuqiri 3 neper emeldarning "Intizamgha éghir derijide xilapliq qilghanliqi" üchün ular üstidin tekshürüsh élip bériliwatqanliqini tilgha alghan idi. Xewerde bulardin bir nepiri Uyghur ikenliki we aqsu wilayetlik soda-sana'etchiler birleshmisining mu'awin re'isi ikenliki qeyt qilin'ghan. Emma xewerlerde ularning konkrét qaysi türdiki xataliq gumani bilen tutulghanliqi bildürülmigen. Bu heqte radiyomizgha kelgen bir inkasta perhat namanning 2015‏-yili küzde xizmet munasiwiti bilen gérmaniyege barghanliqi we gérmaniyediki waqtida qilghan téléfon alaqe xatiriside mesile körülgenliki üchün "Ikki yüzlimichilik" gumani bilen tutulghanliqi ilgiri sürülgen.

Biz aqsudiki alaqidar organlargha téléfon qilip, aldi bilen bilen uning tutup turup tekshürülüwatqanliqi yaki a'iliside ikenlikini sürüshte qilduq. Aqsu wilayetlik soda-sana'etchiler birleshmisining bir xadimi bu idaride nöwette bundaq bir kishining yoqluqini éytti.

Weziyettin xewerdar kishining bayan qilishiche, perhat namanning 2015‏-yili gérmaniye sepiridiki bir téléfon alaqe xatirisi da'iriler teripidin "Sherqi türkistan bölgünchiliri" bilen bilen körüshüsh dep qaralghan. Perhat naman shu chaghdiki tekshürüshte özining gérmaniyediki chéghida peqet türkiyede oquwatqan perzentliri bilen körüshkenlikini chüshendürüp, ötkeldin ötken.

Téléfonimizni qobul qilghan soda-sana'etchiler birleshmisining bir xadimi perhat namanning gérmaniye sepiridin xewiri yoqluqini éytsa, yene bir mes'ul xadim uning gérmaniye sepiridin xewiri barliqini éytti.

Weziyettin xewerdar kishining inkas qilishiche, perhat naman 2019‏-yili kadirlar arisida élip bérilghan mesile tapshurush dolqunida gérmaniyediki téléfon alaqisi seweblik yene bir qétim so'al-soraqqa duch kelgen. Bu yil 5‏-aygha kelgende aqsu wilayetlik partkom intizam tekshürüsh komitéti uni mexsus tekshürüsh obyékti qilip békitken we bu tekshürüsh heqqide mexsus omumiy uqturush chiqarghan.

Aqsu wilayetlik j. X. Idarisining idarisi xadimi perhat naman délosining qaysi basquchta ikenliki heqqidiki so'alimizgha jawab bérishtin özini qachurdi.

Türkiyede yashawatqan aqsuluq muhajirlardin biri perhat namanning ikki perzentining türkiyening chet bir wilayitide uniwérsitétta oquydighanliqi, emma ularning Uyghur jama'iti bilen ariliship ketmeydighanliqini bayan qildi.

Weziyettin xewerdar kishining melum qilishiche, perhat naman 1990‏-yili shinjang yéza-igilik uniwérsitétini püttürgen. U aqsu wilayetlik soda-sana'et birleshmisige mu'awin re'is bolushtin ilgiri aqsuning aykül we toqay yézisida yéza bashliqi, aqsu sheherlik partkomda da'imiy hey'et, toqsu nahiyesige mu'awin sékrétar we siyasiy kéngeshning mudiri, aqsu wilayetlik yéza-igilik mashiniliri idarisi we qizilbayraq déhqanchiliq meydanida partkom sékrétari bolup wezipe ötigen iken. Inkasta déyilishiche, u 2015‏-yili qizilbayarq déhqanchiliq meydanida sékrétar bolghan mezgilide yéza-igilik naza'irtining naziri ekber ghopur qatarliq kishiler bilen birlikte gérmaniyede ziyarette bolghan. "Jenubi xitay etigenlik pochtisi" géziti pénsiyege chiqqan nazir ekber ghopurning 2019‏-yili tutulghanliqi we bu yil 4‏-ayda qolgha élin'ghanliqini xewer qilghan idi.

Téléfonimizni qobul qilghan aqsudiki bir alaqidar xadim perhat namanning birla sewebtin emes, belki atalmish "Jinayetchilerge hésdashliq qilish", "Dölet ma'aripini közge ilmasliq" qatarliq 5-6 xil xataliq bilen tutulghanliqi, bularning ichide eng jiddiyekining uning gérmaniye sepiridiki téléfon alaqisi ikenlikini tilgha aldi. U perhat namanning partiye yaritip bergen pursettin paydilinip, atalmish "Yaman niyetlik kishiler bilen alaqe ornatqanliqi" ni ilgiri sürdi.

Bu xadim sözliride perhat namanning partiyege xiyanet qilghanliqini isharet qilghan bolsimu, emma "Ikki yüzlimichi" dégen eyiblimini tilgha almidi.

Xitay da'irilirining bir türküm Uyghur emeldalirini "Ikki yüzlimichilik" bilen eyiblep jazalishi bir qisim xelq'ara jama'et teripidin hem tenqidke hem mesxirige uchrighan idi. Xitay da'iriliri ötken hepte ilgiri "Ikki yüzlimichilik" bilen eyiplen'genliki xewer qilin'ghan sabiq ormanchiliq nazaritining naziri memet abdullaning "Ikki yüzlimichilkik" bilen emes, belki parixorluq bilen eyiblen'genliki heqqide mexsus xewer bergen idi. Eslide ikki yil awwalqi éniqlashlirimiz dawamida mezkur nazaretttiki bir xadim memet abdullaning "Ikki yüzlimichilik" bilen eyiblen'genlikini ashkarilighan idi.

Perhat naman heqqide igiligen uchurlirimizdin uning atalmish "Jinayiti" ning békitilip bolghanliqi melum, emma tekshürüshtin kéyin ashkarilashqa toghra kelse bu atalmish "Jinayet" ke qandaq nam bérilidighanliqi hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet