Тәшвиқат нәмуничиси: “пиланлиқ туғут дориси ичип чечим чүшүп кәткәчкә, қизимни оператсийә қилғузивәттим”

Мухбиримиз шөһрәт һошур
2020.07.24
pilanliq-tughut-305.png Хитайда көп учрайдиған пиланлиқ туғут тәшвиқатлири
AFP

Уйғур районида йолға қоюлуп келиватқан пиланлиқ туғут тәдбирлири йеқинқи һәптиләрдин бери хәлқараниң күчлүк диққитини тартти.

Бәзи органлар бу тәдбирләрни типик бир ирқий қирғинчилиқ васитиси дәп әйиблисә, хитай даирилири бу тәдбирләрниң мәвҗутлуқини яки зийинини инкар қилмақта.

Бүгүн мухбиримизниң телефони уланған уйғур райондики бир он аилә башлиқи, өзиниң актип бир пиланлиқ бир туғут тәшвиқатчиси болуш билән бирликтә, пиланлиқ туғут тәдбирлириниң зиянкәшликигә учриғучиси икәнликини пакитлири билән ашкарилиди.

Уйғур райониниң йеқинқи 3 йиллиқ нопус статистикисида уйғур нопусида тик сизиқлиқ чүшүш көрүлгәнлики, мутәхәссисләрниң күчлүк диққитини тартти вә мутәхәссисләр бу чүшүшкә, уйғур районида йеқинқи 3 йилда қурулған лагерлардин башқа, йеқинқи йиллардин бери техиму күчәйтип қоллинип келиватқан пиланлиқ туғут тәдбирлириниң сәвәб болғанлиқини оттуриға қойди. Хитай тәрәп болса, уйғур нопусиниң йеқинқи 40 йилда ‏4-5милйондин 11 милйонға йүксәлгәнликини илгири сүрүп, пиланлиқ туғут тәдбирлириниң зиянкәшлик ролини инкар қилмақта. Қорғас наһийәлик пиланлиқ туғут идариси, пиланлиқ туғут тәдбирлири һәққидики соалимизға җавабән, өзиниң бу идаригә йеңи кәлгәнлики; әмәлий иҗраатлардин толуқ хәвири йоқлуқини ейтти. Биз униңдин, бу һәқтә тәпсилий мәлумат вә җаваб бериш салаһийити бар кишиләрни сориғинимизда, сүйдүң базиридики бир он аилә башлиқиниң алақә учурини тәминлиди. Телефонимизни қобул қилған бу он аилә башлиқи, өзиниң узун йиллиқ бир тәшвиқат нәмуничиси икәнлики, пиланлиқ туғут хизмитидә көрсәткән хизмәтлири сәвәблик көп қетим мукапатланғанлиқини баян қилди. Мәлум болушичә, у өткән 30 йилда өйму өй кирип, пиланлиқ туғутқа хилаплиқ қилғанлардин җәриманә топлашта актип рол ойниған.

Баянлиридин мәлум болушичә, 57 яшқа киргән бу нәмуничи, пиланлиқ туғутниң актип иҗрачилиридинла әмәс, бәлки өз нөвитидә йәнә бу иҗраатниң зиянкәшликигә учриғучилардин икән. Дейилишичә, у, пиланлиқ туғут дорисини уда 10 йил ичкән. 4 Пәрзәнтидин иккисиниң һаят икәнлики, иккисиниң җан үзгәнликини баян қилған бу хадим икки пәрзәнтиниң өлүшидә ичкән пиланлиқ туғут дорилириниң тәсири бар-йоқлуқи һәққидә мәлумат берәлмиди. Өзиниң һечқанчә зиянға учримиғанлиқини әскәрткән бу хадим “пәқәт” дора ичип бир йилдин кейин чечи чүшүшкә башлиғанлиқи вә ахирида бешида бир тутамға йәтмәйдиған чач қалғанлиқини ашкарилиди. У йәнә йегән пиланлиқ туғут дорилириниң тәсиридә һейиз адитиниң 40 яштила тохтап кәткәнлики вә әстә тутуш қабилийитидә пәвқуладдә чекиниш болғанлиқини илгири сүрди.

Пиланлиқ туғут дорисиниң тәсиридә чечи төкүлгәнләрдин 40-50 чә кишини билидиғанлиқини әскәрткән бу хадим; охшаш қисмәтниң қизиниң бешиғиму келип қалмаслиқи үчүн, қизини 3 пәрзәнтлик болуп болғандин кейин, пиланлиқ туғут операсийәси қилғузивәткәнликни тилға алди.

Баянлиридин мәлум болушичә, бу хадим өзиниң пиланлиқ туғут тәдбири сәвәбидин чечи чүшүп кетиш, әстә тутуш қабилийити төвәнләп кетиш вә адити балдур тохтап кетиш қатарлиқ ақивәтләргә дуч кәлгән болсиму, бу зиян-зәхмәтләрниң һеч биригә наразилиқ билдүрмигән; һәтта пиланлиқ туғут дорисини буйруған дохтурларға дорилириниң сәлбий тәсирлири һәққидә мәлуматму сунмиған.

Һөрмәтлик радио аңлиғучилар, юқириқи баянлардин мәзкур хадимниң, һаяти бойи һеч бир иштин, өзи учриған пиланлиқ туғут тәдбирлириниң зиянкәшликидин һечқачан вә һечкимгә шикайәт қилип бақмиғанлиқи мәлум; әмма бу шәртсиз итаәтниң һөкүмәткә болған садақәттин яки ишәнчсизликтин икәнлики вә яки мәлуматсизлиқтин икәнлики һазирчә мәлум әмәс.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.