Teshwiqat nemunichisi: "Pilanliq tughut dorisi ichip chéchim chüshüp ketkechke, qizimni opératsiye qilghuziwettim"

Muxbirimiz shöhret hoshur
2020-07-24
Élxet
Pikir
Share
Print
Xitayda köp uchraydighan pilanliq tughut teshwiqatliri
Xitayda köp uchraydighan pilanliq tughut teshwiqatliri
AFP

Uyghur rayonida yolgha qoyulup kéliwatqan pilanliq tughut tedbirliri yéqinqi heptilerdin béri xelq'araning küchlük diqqitini tartti.

Bezi organlar bu tedbirlerni tipik bir irqiy qirghinchiliq wasitisi dep eyiblise, xitay da'iriliri bu tedbirlerning mewjutluqini yaki ziyinini inkar qilmaqta.

Bügün muxbirimizning téléfoni ulan'ghan Uyghur rayondiki bir on a'ile bashliqi, özining aktip bir pilanliq bir tughut teshwiqatchisi bolush bilen birlikte, pilanliq tughut tedbirlirining ziyankeshlikige uchrighuchisi ikenlikini pakitliri bilen ashkarilidi.

Uyghur rayonining yéqinqi 3 yilliq nopus statistikisida Uyghur nopusida tik siziqliq chüshüsh körülgenliki, mutexessislerning küchlük diqqitini tartti we mutexessisler bu chüshüshke, Uyghur rayonida yéqinqi 3 yilda qurulghan lagérlardin bashqa, yéqinqi yillardin béri téximu kücheytip qollinip kéliwatqan pilanliq tughut tedbirlirining seweb bolghanliqini otturigha qoydi. Xitay terep bolsa, Uyghur nopusining yéqinqi 40 yilda ‏4-5milyondin 11 milyon'gha yükselgenlikini ilgiri sürüp, pilanliq tughut tedbirlirining ziyankeshlik rolini inkar qilmaqta. Qorghas nahiyelik pilanliq tughut idarisi, pilanliq tughut tedbirliri heqqidiki so'alimizgha jawaben, özining bu idarige yéngi kelgenliki؛ emeliy ijra'atlardin toluq xewiri yoqluqini éytti. Biz uningdin, bu heqte tepsiliy melumat we jawab bérish salahiyiti bar kishilerni sorighinimizda, süydüng baziridiki bir on a'ile bashliqining alaqe uchurini teminlidi. Téléfonimizni qobul qilghan bu on a'ile bashliqi, özining uzun yilliq bir teshwiqat nemunichisi ikenliki, pilanliq tughut xizmitide körsetken xizmetliri seweblik köp qétim mukapatlan'ghanliqini bayan qildi. Melum bolushiche, u ötken 30 yilda öymu öy kirip, pilanliq tughutqa xilapliq qilghanlardin jerimane toplashta aktip rol oynighan.

Bayanliridin melum bolushiche, 57 yashqa kirgen bu nemunichi, pilanliq tughutning aktip ijrachiliridinla emes, belki öz nöwitide yene bu ijra'atning ziyankeshlikige uchrighuchilardin iken. Déyilishiche, u, pilanliq tughut dorisini uda 10 yil ichken. 4 Perzentidin ikkisining hayat ikenliki, ikkisining jan üzgenlikini bayan qilghan bu xadim ikki perzentining ölüshide ichken pilanliq tughut dorilirining tesiri bar-yoqluqi heqqide melumat bérelmidi. Özining héchqanche ziyan'gha uchrimighanliqini eskertken bu xadim "Peqet" dora ichip bir yildin kéyin chéchi chüshüshke bashlighanliqi we axirida béshida bir tutamgha yetmeydighan chach qalghanliqini ashkarilidi. U yene yégen pilanliq tughut dorilirining tesiride héyiz aditining 40 yashtila toxtap ketkenliki we este tutush qabiliyitide pewqul'adde chékinish bolghanliqini ilgiri sürdi.

Pilanliq tughut dorisining tesiride chéchi tökülgenlerdin 40-50 che kishini bilidighanliqini eskertken bu xadim؛ oxshash qismetning qizining béshighimu kélip qalmasliqi üchün, qizini 3 perzentlik bolup bolghandin kéyin, pilanliq tughut opérasiyesi qilghuziwetkenlikni tilgha aldi.

Bayanliridin melum bolushiche, bu xadim özining pilanliq tughut tedbiri sewebidin chéchi chüshüp kétish, este tutush qabiliyiti töwenlep kétish we aditi baldur toxtap kétish qatarliq aqiwetlerge duch kelgen bolsimu, bu ziyan-zexmetlerning héch birige naraziliq bildürmigen؛ hetta pilanliq tughut dorisini buyrughan doxturlargha dorilirining selbiy tesirliri heqqide melumatmu sunmighan.

Hörmetlik radi'o anglighuchilar, yuqiriqi bayanlardin mezkur xadimning, hayati boyi héch bir ishtin, özi uchrighan pilanliq tughut tedbirlirining ziyankeshlikidin héchqachan we héchkimge shikayet qilip baqmighanliqi melum؛ emma bu shertsiz ita'etning hökümetke bolghan sadaqettin yaki ishenchsizliktin ikenliki we yaki melumatsizliqtin ikenliki hazirche melum emes.

Toluq bet