Майк помпейониң әркин асия радийоси уйғур бөлүмигә хитаби: "силәрниң хизмитиңлар пидакарлиқ вә җасарәт тәләп қилиду"

Мухбиримиз җәвлан
2021-01-12
Share
Майк помпейониң әркин асия радийоси уйғур бөлүмигә хитаби: Америка ташқи ишлар министири майк помпейо әпәнди дөләтлик ахбарат кулубида сөз қилмақта. 2021-Йили 12-январ, вашингтон.
REUTERS

Америка ташқий ишлар министери майк помпейо 11-дикабир чүштин кейин "америка авази" радийосиниң вашингтондики баш шитабида ахбарат әркинлики вә американиң қиммәт қариши һәққидә сөз қилди. Йиғинға америка йәр шари таратқу оргини (USAGM) баш иҗраийә әмәлдари майкол пәк (Michael Pack), "америка авази" радийосиниң директори роберт релли (Robert. R. Reilly) Вә башқа мунасвәтлик хадимлар қатнашти.

Майк пампейо сөзидә америка дөләт болуп қурулғандин буян пикир әркинлики вә ахбарат әркинликини қоғдап кәлгәнликини, "америка авази", "әркин асия" қатарлиқ радийоларниң бу саһәдә авангартлиқ ролини ойнап, дуняниң һәр қайси җайлиридики инсанларға һәқиқий хәвәр-учурларни йәткүзүп, мустәбит һөкүмәтләрниң қатму қат тосақлирини бөсүп өтүп әркинлик авазини аңлитип кәлгәнликини вә буниң бүгүнки күндә техиму муһим икәнликини баян қилди.

Майк помпейо нәччә он йилдин буян "америка авази" радийоси ишлигән хәвәрләргә изчил диққәт қилип келиватқанлиқини, 1980-йиллири ғәрбий германийәдә әскәрликтә турған мәзгилидила бу радийо билән көңүл риштисиниң бағланғанлиқини, шу чағда ғәрбий германийә билән шәрқий германийәни "берлин теми" тосуп турсиму "америка авази" ниң бу тосақларни бөсүп өтүп, һөкүмәт тәшвиқатидин башқа нәрсә аңлиялмайдиған шәрқий германийә хәлқигә һәқиқәт авазини аңлиталиғанлиқини әсләп өткәндин кейин, мундақ деди: "хәвәр дегәндә яхши хәвәрму болиду, яман хәвәрму болиду; әмма мән раст гәп қилимән, растчиллиқни яхши көримән. Оғлум чоң болғичә униңғиму тиришчан бол, етиқадиңда чиң тур, раст гәп қил дәп туримән. Дегәнлиримгә алди билән өзүм әмәл қилимән. Буниң униңға вә өзүм яхши тонуйдиған кишиләргә көп пайдиси болди. Бүгүнки дуня ‹америка авази' ниң әркинлик чақириқиға һәр қандақ вақиттикидинму бәк муһтаҗ. Мән қачан, қәйәргила барсам униң авазини аңлап туралишим керәк. Чүнки униң растчиллиқи америкичә алаһидиликни әкс әттүриду, бу наһайити муһим."

Майк помпейо америка һөкүмитиниң әслидинла инсанларниң тәбиий һоқуқини қоғдаш үчүн қурулған һөкүмәт икәнликини, бу тәбиий һоқуқ, йәни кишилик һоқуқниң әң муһим қисми болған диний әркинлик, пикир әркинлики вә ахбарат әркинликини қоғдаш принсипида чиң туруп кәлгәнликини, "америка авази" қатарлиқ таратқуларниң бу җәһәттики алаһидә орнини тәкитләп мундақ деди: "силәрниң вәзипәңлар дуняда демократийә, әркинлик вә американиң қиммәт қаришини илгири сүрүш. Силәр дуняниң зулмәтлик җайлирида авазини чиқиралмиғанларниң авази болуңлар, силәр күрәш қиливатқан америкалиқларниң вә дуняда алаһидә орни болған америка дөлитиниң авази болуңлар."

Майк помпейо "америка авази" радийосиниң әркинлик вә демократийәгә вәкиллик қилиши, башқа бәзи медияларға охшаш тәрәпбазлиқ қилидиған яки ноқул һалда американиң ташқий сияситини тәшвиқ қилидиған қорал болуп қалмаслиқи керәкликини, чүнки униң американиң демократийә, әркинлик ғайисигә вәкиллик қилидиғанлиқини билдүрүп, мундақ деди: "америка ташқий ишлар минситири болуш сүпитим билән буларни дейишимдики сәвәб, мән бу орган вә бу йәрдә ишләйдиғанларниң һәммә ишлириниң яхши болуп кетишигә тиләкдашмән. Чүнки силәр американиң нурини дуняниң әң қараңғу җайлириға йәткүзүштә һалқилиқ рол ойнайсиләр. ‹Америка авази' ниң хизмити муһим, чүнки у әркинликни әң көп тәшвиқ қилиду, һәр һәптидә 200 милйон 780 миң киши униңдин 47 хил тилда хәвәр аңлайду."

Майк пампейо йәнә коммунист хитай, шималий корийә, венсуила вә моллилар контроллуқидики иранға охшаш мустәбит дөләтләрдә қамал қилинған пикир әркинлики вә ахбарат әркинлики һәққидә тохтилип, инсанлиқ һәқ-һоқуқ вә әркинликни дәпсәндә қилидиған түзүмниң американиң қиммәт қариши билән тамамән зит икәнликини, америкада һөкүмәт хәлқ үчүн ишлисә, мустәбит дөләтләрдә хәлқниң һөкүмәт үчүн ишләйдиғанлиқини вә бу чирик һөкүмәтләрниң барлиқ тәшвиқат васитилирини контрол қилип, пуқралирини бекинмә һаләттә башқуридиғанлиқини, әркинликкә тәшна инсанларниң "америка авази" дин һәқиқәт вә үмид нури издәйдиғанлиқини баян қилди.

Майк пампейо сөзиниң ахирида әркин асия радийоси уйғур бөлүмини алаһидә тилға елип мундақ деди: "дуня миқясида бирдинбир уйғурчә хәвәр аңлитиш әркин асия радийоси арқилиқ елип бериливатиду. Бу йәрдә олтурғанлар бәлким хитай һөкүмитиниң шинҗаңдики уйғурларға йүргүзүватқан қәбиһ җинайәтлирини аңлиған болуши мумкин. Бу җинайәт бу әсирлик ар-номустур, еримас дағдур. Өткән мәзгилдә коммунист хитай аз дегәндә алтә мухбирниң уруғ-туғқанлирини тутқун қилди. Шинҗаңда лагерға солаш давам қилмақта, уруғ-туғқанлириңлар мушу хизмәтни қилғиниңлар үчүнла тәһдиткә учримақта. Силәрниң хизмитиңлар пидакарлиқ вә җасарәт тәләп қилиду. Чүнки силәр дуняниң әң хәтәрлик, әң қараңғу җайида йүз бериватқан ишларни әйнән хәвәр қилисиләр. Төвәндики бир җүмлә сөз мениң бүгүн демәкчи болғанлиримни яхши ипадиләп бериду. Җорҗ вашингтон мундақ дегән: ‹биз һәқ сөз арқилиқ дуняни йорутсақ, һәқиқәт ахир дунядики инсанлар ортақ чиң туридиған нәрсигә айлиниду'."

Ахирда майк помпейо "америка авази" радийосиниң директори роберт реллиниң соаллириға җаваб бәрди. У бу җаваблирида өзиниң өткән икки йиллиқ хизмәтлиридин пәхирлинидиғанлиқини, пүтүн дуняға кишилик һоқуқ, диний әркинлик вә сөз әркинликини қоғдашни изчил тәкитләп кәлгәнликини билдүрди. У йәнә трамп һөкүмитиниң хитайни әң чоң тәһдит дәп қаришиниң тоғра икәнликини, хитай компартийәси билән болидиған күрәшниң узунға созулидиғанлиқини оттуриға қоюп: "хитай компартийәси та һазирғичә вирусниң мәнбәсини тәкшүргили қоймайватиду. Силәрниң вәзипәңлар хитай қамал қиливалған хәвәрләрни яки йошуруп кәлгән учурларни ашкарилаш. Хитайниң тәһдитигә тақабил туруш һазир америкидики икки чоң партийәниң ортақ тонушиға айланди, мән келәр нөвәтлик һөкүмәтниң бу сиясәтни давамлаштурушини үмид қилимән" дегәнләрни билдүрди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт